Van ons lesers

Luister Die artikel “Luister jy met empatie?” (8 Desember 1994) was net wat ek nodig gehad het. ’n Vriend het my al verskeie kere vertel dat hy nie daarvan hou wanneer ek sê dat sy probleme nie regtig so erg is nie en hom dan ongevraagde raad gee. Ek het eerlikwaar gedink dat hy die verkeerde gesindheid het. Nou besef ek dat ek verkeerd was!

S. H., Verenigde State

Ek sien al lank uit na so ’n artikel, maar dit het al my verwagtinge oortref. Ons onderskat alte dikwels die belangrikheid daarvan om te weet hoe om te luister. Nogtans het die meeste van ons al gewens dat ons sulke aandag kan kry.

S. D., Italië

Ek is 18 jaar oud en vind dikwels dat ek nie weet wat om in sekere situasies te sê nie. Maar nadat ek daardie uitstekende artikel gelees het, dink ek dat ek met empatie sal kan luister.

J. M., Australië

Dit is gerusstellend om te weet dat ons nie elke probleem wat ons aanhoor, hoef op te los nie, maar dat dit dikwels voldoende is om net te luister. Veral dié van ons wat uit disfunksionele gesinne kom, moet dalk basiese kommunikasievaardighede aanleer. Dankie dat julle aanhou om die Bybel te gebruik om ons te leer hoe om te lewe.

J. D., Verenigde State

Verbeterde kunswerk Ek het grafiese kuns as hoofvak op skool gehad. Ek het terselfdertyd die Bybel saam met Jehovah se Getuies gestudeer. Maar wanneer ek die Ontwaak! saamgeneem het skool toe, het my skoolmaats gekla oor die ontwerp daarvan—dat die ‘kleurgevoel’ swak was, ensovoorts. Maar die afgelope paar maande was die ontwerp waarlik uitstaande. Ek is regtig trots op die tydskrifte!

N. I., Japan

Beskadigde atmosfeer Ek het so pas die artikel “Wanneer ons atmosfeer beskadig word” gelees en het dit baie geniet (22 Desember 1994). Julle het beslis die vermoë om betekenisvolle onderwerpe te kies om oor te skryf. Julle het egter verskeie kere melding gemaak van wêreldwye verwarming, maar sonder om bewyse daarvoor te gee. Wees versigtig! Indien die teendeel eendag bewys sou word, sal julle joernalistieke geloofwaardigheid bevraagteken word.

M. L., Verenigde State

Ons het nie die teorie van wêreldwye verwarming onderskryf nie, maar het bloot die feit gemeld dat ’n aantal gesaghebbende wetenskaplikes glo dat dit wel plaasvind. Ons sal moet wag en sien of hierdie omstrede teorie deur verdere navorsing bevestig of weerlê sal word.—RED.

Klasuitstappies Ek was baie in my skik toe ek julle artikel “Jongmense vra . . . Wat van klasuitstappies?” gelees het (22 Oktober 1994). Jare gelede het my klas ’n uitstappie beplan wat ’n week sou duur. Nadat ek die saak biddend oorweeg het, het ek besluit om nie te gaan nie. Toe hulle teruggekom het, het ek verneem dat verskeie van my klasmaats hulle aan geslagsonsedelikheid skuldig gemaak het. Sulke uitstappies kan voorwaar ’n baie moeilike toets vir ’n jong Christen wees.

J. S., Noorweë

Die artikel het my regtig gehelp, want ek het al op ’n aantal velduitstappies gegaan. Die vrae wat julle geopper het, stel ’n jongmens in staat om die situasie goed te oorweeg. Dankie dat julle my gehelp het om klasuitstappies in perspektief te bring.

M. R., Verenigde State

Ek is onlangs uitgenooi om op ’n klasuitstappie te gaan, na ’n plek wat ek nog altyd graag wou sien. Ek het besluit om nie te gaan nie, alhoewel ek reeds die kaartjie gekoop het. Later het ek begin dink aan die geleentheid wat ek deur my vingers laat glip het. Maar julle artikel was baie tydig. Nadat ek dit gelees het, was ek seker dat ek die regte besluit geneem het.

L. S. B., Brasilië