Jong mense vra . . .

Wat van klasuitstappies?

“JY HOEF nie skool toe te gaan nie.” “Jy sien iets nuuts vir ’n verandering.” “Jy leer jou klasmaats beter ken.” Dit is waarom drie Duitse jongmense klasuitstappies geniet. Sulke uitstappies is wêreldwyd baie gewild onder jongmense.

Dit is egter nie net leerlinge wat klasuitstappies hoog aanskryf nie. “’n Goedgeorganiseerde klasuitstappie is werklik voordelig vir ’n jongmens omdat dit sy horison verruim en hom help om op sy eie bene te staan”, meen een onderwyser. “Wat meer is, die verhouding tussen die onderwyser en die klas word versterk.” Pligsgetroue onderwysers en ’n goed gemanierde klas kan ongetwyfeld saamspan om ’n klasuitstappie opvoedkundig en aangenaam te maak.

Maar daar is dalk ’n aantal faktore wat jong Christene en hulle ouers tereg bekommer. In Duitsland en in ander Europese lande gaan seuns sowel as meisies byvoorbeeld saam op lang klasuitstappies. Dit behels dikwels dat leerlinge uitslaap. Dit beteken baie keer moeilikheid. Die 14-jarige Anna-Laura vertel: “Ná ’n paar dae op die uitstappie het dinge eenvoudig handuit geruk. Selfs snags het ons geen rus en vrede gehad nie. Die meeste leerlinge het selfsugtig en onbedagsaam opgetree.”

Wat moet jy dan doen as jy die geleentheid kry om op ’n klasuitstappie te gaan?

Bereken die koste

In Lukas 14:28 het Jesus Christus gesê: “Wie van julle wat ’n toring wil bou, gaan nie eers sit en die koste bereken, of hy die middele het om dit uit te voer nie?” Voordat jy en jou ouers besluit of die klasuitstappie vir jóú is, moet julle alles wat daarby betrokke is versigtig oorweeg. Hier is ’n paar vrae om te oorweeg:

Waarheen is die uitstappie? Of dit ’n dagbesoek aan ’n nabygeleë museum is of ’n langer uitstappie waar julle moet uitslaap, kan ’n groot verskil maak. As jou ouers daarvoor moet betaal, sal hulle moet besluit of hulle dit kan bekostig.

Wat is op die program? As elke dag goed georganiseer word met heilsame en interessante bedrywighede, sal dit die klas besig hou en die kanse verminder dat iets skeef loop. Bestudeer dus die program versigtig voordat jy besluit om op die klasuitstappie te gaan. Om museums te besoek of op ’n natuurhistoriese velduitstappie te gaan, kan opvoedkundig wees. Maar om met joga en Asiatiese godsdienste te eksperimenteer—soos daar vir een klasuitstappie beplan is—is beslis nie gepas vir ’n Christen nie.—1 Korinthiërs 10:21.

Sal daar voldoende en voortdurende toesig wees? ’n Vyftienjarige Christenmeisie genaamd Julia vertel: “Ek was in ’n baie goedgemanierde klas en daarom het my ma en pa nie omgegee dat ek op die uitstappie gaan nie. Die onderwysers het baie goeie toesig oor ons gehou.” Maar sulke toesig kan deesdae skaars wees. Soos ’n Duitse onderwyser toegee, word noukeurige en betroubare toesig “hoegenaamd nie verseker nie”. Trouens, een seun het ná ’n klasuitstappie gespog: “Toe ons eers albei onderwysers uitoorlê het, het ons gedoen net wat ons wou.”

Party leerlinge sal moeilikheid veroorsaak al doen die onderwysers hulle bes om hulle te beheer. ’n Voormalige onderwyseres vertel: “Die kinders het vindingryke maniere gevind om alkohol in te smokkel, en daarom was dit nie die moeite werd om hulle kamers te deursoek nie. Toe een van die meisies naar geword het, het ek besef dat hulle baie alkohol drink.” Dit is duidelik dat dit baie moeilik is om te verseker dat daar behoorlike toesig oor ’n uitstappie is. Nogtans sal dit jou baie kommer en verleentheid spaar as jy en jou ouers presies uitvind watter reëlings daar vir toesig getref is. Spreuke 22:3 sê: “’n Verstandige mens sien onheil kom en vermy dit; onervare mense loop oop oë daarin en boet daarvoor.”

Hoe reageer jou skoolmaats gewoonlik op jou onderwysers se riglyne? Dit sal jou ’n goeie idee gee van hoe hulle hulle op ’n skooluitstappie sal gedra. ’n Duitse hoërskool moes glo hulle klasuitstappie van drie dae kortknip omdat onbeheerbare leerlinge “die duidelike en geduldige instruksies” van die onderwysers eenvoudig geïgnoreer het.

’n Jong Duitse vrou met die naam Stephanie het in die verlede op sulke uitstappies gegaan, en op grond van haar ondervinding raai sy aan dat jy jou afvra: ‘Is my klasmaats verstandig genoeg om na die onderwysers te luister? Probeer die skool ’n goeie naam handhaaf? Is die onderwysers streng genoeg om behoorlike leiding te voorsien? Is behoorlike sedes vir die jongmense ’n saak van erns? Gebruik hulle alkohol en dwelms?’ Stephanie erken weliswaar dat baie “van jou as persoon afhang, of jy maklik voor druk swig of nie”. Maar hoe kan jy bid dat Jehovah ‘jou nie in versoeking lei nie’ en jouself dan doelbewus in ’n gevaarlike situasie plaas?—Mattheüs 6:13.

Die 17-jarige Petra het gevolglik nie op die klasuitstappie gegaan nie. “Ek het geweet wat my klasmaats sou aanvang”, verduidelik sy. “Ek het geweet dat situasies waarby alkohol en seks betrokke is my gewete werklik sou beproef. Op die ou end het vyf seuns ’n meisie se klere uitgetrek en foto’s van haar geneem, wat hulle later op die skoolgrond versprei het.”

Sal jou godsdiensoortuiging gerespekteer word? Die jong Timon het byvoorbeeld gesê: “Daar is dikwels ’n verjaarsdagpartytjie wat moeilik is om te vermy.” As een van Jehovah se Getuies weier hy om aan sulke vierings deel te neem.a Sal jou onderwysers en klasmaats jou standpunt respekteer as so ’n viering deel van ’n klasuitstappie word?

Aan watter soort assosiasie sal jy blootgestel word? Christene weet dat rook, dwelmgebruik, alkoholmisbruik en voorhuwelikse seks deur God veroordeel word (1 Korinthiërs 6:9, 10; 2 Korinthiërs 7:1). Daarom is dit verstandig om omgang te vermy met jongmense wat sulke dinge beoefen (1 Korinthiërs 15:33). Spreuke 13:20 waarsku: “Hy wat met dwase verkeer, versleg.” Op ’n klasuitstappie bestee jy meer tyd as gewoonlik saam met sulke jongmense, en dit in ’n ontspanne atmosfeer. Die jong Andreas het dit so gestel: “Op ’n klasuitstappie word jy deurgaans aan die gees van die wêreld blootgestel, met al die wêreldse musiek en vuil praatjies wat daarmee gepaardgaan.”

Nog ’n faktor is die feit dat jy maklik eensaam kan voel wanneer jy van die huis af weg is. Klasuitstappies het al aanleiding gegee tot menige tienerromanse. Bestaan daar ’n gevaar dat jy romanties by ’n ongelowige betrokke kan raak? Eerste Korinthiërs 10:12 waarsku: “Wie meen dat hy staan, moet oppas dat hy nie val nie.” En sal jy, al is jy sterk genoeg om versoekings te weerstaan, vir ander jong Christene ’n struikelblok wees as jy op so ’n uitstappie teenwoordig is?—Vergelyk 1 Korinthiërs 8:7-13; 10:28, 29.

Die 14-jarige Yvonne het besluit om nie saam met die klas op ’n ski-uitstappie te gaan nie. Sy verduidelik: “Ek sou ’n hele week net met wêreldse jongmense en onderwysers moes deurbring. Daarbenewens sou ek my broers, die predikingswerk en die vergaderinge regtig mis. Nog ’n rede was die manier waarop die meeste jongmense hulle gedra wanneer niemand ’n oog oor hulle hou nie.”

Behaag God in alles

Aangesien klasuitstappies gewoonlik nie godsdiens, politiek of ander bedrywighede insluit wat vir Christene verbode is nie, sal ’n leerling en sy ouers moet besluit of so ’n uitstappie raadsaam is. (Vergelyk Jesaja 2:4; Openbaring 18:4.) Toestande en omstandighede verskil van plek tot plek en van een klas tot die volgende; daarom het Christene in een gebied dalk met probleme te kampe wat van dié in ander gebiede verskil.

“My ma het die kinders in my klas geken en geweet dat die onderwyser verantwoordelik was. Die klasuitstappie was dus ’n sukses”, sê Stephan. “Maar toe ek ouer geword het en die laaste uitstappie nader gekom het, was dit heeltemal ’n ander saak of ek sou saamgaan of nie.” Waarom? Hy sê voorts: “Net drie jaar vroeër was my klasmaats aangenaam en ordentlik. Maar dwelms en onsedelikheid het sedertdien ’n deel van hulle alledaagse lewe geword. Daarom het ek nie saam op die uitstappie gegaan nie. Terloops, die laaste uitstappie moes voor die tyd beëindig word.”

Uiteindelik moet jy en jou ouers egter al die faktore opweeg en julle eie besluit neem. Maak seker dat, wat julle ook al besluit, dit jou doelwit is om “waardiglik voor die Here [te] wandel om Hom in alles te behaag”.—Kolossense 1:10.

[Voetnoot]

[Prent op bladsy 25]

Aan watter soort assosiasie sal jy blootgestel word as jy op ’n klasuitstappie gaan waar julle moet uitslaap?