Van ons lesers

Droefheid Baie, baie dankie vir die artikel “Die Bybelse beskouing: Hulp in jou tyd van droefheid” (8 Maart 1994). My man, ’n ouere man in die Christengemeente, het onlangs in ’n ongeluk gesterf. Woorde kan nie die verlies beskryf wat ek en my drie kinders ondervind het nie. Wat ’n seën was dit tog om die artikel te lees en te sien dat die gevoelens wat ons ervaar normaal is!

N. S., Verenigde State

Dit was drie jaar gelede dat my ma, en drie maande gelede dat my pa, gesterf het. Hoewel die opstandingshoop seker is, is die skeiding wat deur die dood veroorsaak word steeds pynlik. Julle artikel het my gemotiveer om my aandag meer as ooit op die Koninkrykshoop te vestig en aan te hou om God getrou te dien.

K. S., Japan

Ek het my pa ’n maand gelede verloor. Daar is geen woorde om ’n dogter se droefheid te beskryf nie. Julle artikel was baie tydig en het my gehelp om voort te gaan ten spyte van die pyn wat ek voel.

A. P. L., Brasilië

Tekenprente Ek wil julle bedank vir die artikel “Is gewelddadige TV-tekenprente skadelik?” (8 Desember 1993). Ek is agt jaar oud en ek het altyd na hierdie tekenprente gekyk. Maar toe ek julle tydskrif lees, het ek besef dat sulke tekenprente sleg is, en nou kyk ek nie meer daarna nie.

L. T., Italië

Die nuwe era Ek het so pas die Ontwaak! van 8 Maart 1994 gelees oor “Die nuwe era—Sal dit kom?” Ek was in die laat sestiger- en vroeë sewentigerjare by meditasiegroepe, selfverbetering en psigodinamika betrokke. Ek was op soek na iets, maar het dit nie gevind nie. Toe het my vrou met Jehovah se Getuies in aanraking gekom, en ek het tydens ’n studie bygesit. Ek het die waarheid gevind! Ek is gedoop en het nou die voorreg om as ’n sendeling hier in Ghana te dien. Dankie vir hierdie tydskrif. Daar is baie ander mense wat ook op soek is na iets.

D. D., Ghana

Hoewel die New Age-beweging ’n wye veld dek, het julle die verskeie aspekte daarvan op ’n interessante manier in so ’n klein spasie gedek! Ek waardeer hoe julle dié dinge bespreek het wat met die New Age-beweging verband hou, maar wat op sigself nie onskriftuurlik is nie, soos gesondheid, musiek en omgewingskwessies. Die artikels is taktvol geskryf; tog het julle nie gehuiwer om die duidelike waarheid te vertel wat mense moet hoor nie. My suster stel in die New Age-filosofieë belang, en ek sal vir haar ’n eksemplaar van hierdie nommer stuur.

R. H., Verenigde State

Wêreldwye verwarming Ek skryf na aanleiding van die venstertjie “Wêreldwye verwarming en malaria” wat saam met die artikels “’n Wêreld sonder siekte—Is dit moontlik?” (8 Desember 1993) verskyn het. Ek is ’n wetenskaplike wat ekologie bestudeer, en dit word al hoe moeiliker om met enige mate van vertroue ’n standpunt oor wêreldwye verwarming in te neem. Ons kan weliswaar verwag dat ’n temperatuurstyging ’n uitwerking op ’n hele aantal dieresamelewings sal hê. Maar of wêreldwye verwarming werklik bestaan, is baie moeiliker om vir seker vas te stel. Die navorsing wat gedoen is, berus op statistieke wat baie twyfelagtig is. Party wetenskaplikes glo selfs dat verhoogde koolstofdioksiedvlakke in die atmosfeer die aarde se oppervlakte in werklikheid sal laat afkoel!

K. O., Engeland

Die teorie van wêreldwye verwarming is baie deeglik bespreek in ons nommer van 8 September 1989, en dit ís weliswaar ’n ietwat omstrede onderwerp. Ons kort vensterartikel het dus nie hierdie teorie onderskryf nie, maar is ’n geldige waarskuwing van wat kán gebeur as wêreldwye verwarming wel plaasvind.—RED.