Jongmense vra . . .
Sal dit my help as ek God se vriend is?
BAIE jongmense word vandag groot onder spanning wat ’n geslag gelede ongelooflik sou gewees het. Die opstellers van ’n nasionale opname onder 160 000 jeugdiges het verduidelik: “Tieners vertel vir ons dat baie van hulle verwardheid te wyte is aan druk waarteen hulle nie opgewasse voel nie; aan ontmoediging en droefheid wat die oorhand oor hulle selfvertroue kry en aan ouers wat nie van hulle probleme bewus is nie.” Jy voel dalk ook dat ander net nie verstaan hoe pynlik die lewe soms vir ’n jongmens kan wees nie.
Jy kan natuurlik ’n boesemvriend hê tot wie jy jou om emosionele ondersteuning kan wend, en dit gee moontlik ’n mate van verligting. Maar is dit nie waar dat daar kwellende probleme is wat jy op jou eie die hoof moet bied nie? Dit is weliswaar soms net ‘’n mens self wat die bitterheid van jou eie gemoed ken’ (Spreuke 14:10, NAV). Maar daar is Iemand wat jou heeltemal verstaan, en hy bied jou sy vriendskap aan. Baie jongmense het gevind dat sy vriendskap selfs gedurende die pynlikste tye ’n groot hulp is.
Vriendskap met God
Een jeugdige is gevra waarvoor sy Jehovah God die meeste dank. Haar antwoord: “Dat ons hom kan leer ken en sy intieme vriende kan wees.” Ja, dit is moontlik om die beste vriendskap in die heelal aan te knoop! Die psalmis het geskryf: “Die intimiteit met Jehovah behoort aan dié wat hom vrees.”—Psalm 25:14, NW.
“Intimiteit met Jehovah”—wat ’n kosbare voorreg! Die oorspronklike Hebreeuse woord dra die gedagte oor van openhartige, vertroulike geselsery met iemand wat ’n spesiale vriend is. Dit is dus ’n hegte verhouding wat op liefde gegrond is, ’n bevoorregte intimiteit wat uit wedersydse vertroue voortspruit. As ’n vriend van God besef jy dat hierdie een wat jou werklik verstaan jou werklike waarde as mens op prys stel. Maar wat is die voordele van hierdie vriendskap?
“My vertroue van my jeug af”
Baie jongmense het, ondanks ’n uiterlike bravade, min selfvertroue. “Ek spreek my menings uit en iemand sal met hulle s’n kom en myne heeltemal verander”, het die 13-jarige Judy gesê. “Ek is nie baie selfversekerd nie.” Ons hemelse Vriend voorsien egter in sy geskrewe Woord, die Bybel, spesifieke rigsnoere vir ’n suksesvolle lewe. Trouens, die raad wat in die Bybelboek Spreuke gegee word, is bedoel om “aan die jongeling kennis en oorleg” te gee en hom in staat te stel om sy paaie gelyk te maak (Spreuke 1:1-4; 3:1-6). Dit kan jou selfvertroue gee! Jy kan weet wat die beste manier van lewe is.
Die Bybel, tesame met Bybelhulpe soos hierdie tydskrif, voorsien raad oor feitlik elke aspek van die lewe—van hoe om vriende te kies tot die behoorlike gesindheid teenoor jou ouers (Spreuke 1:8, 9; 13:20). Diegene wat aan sulke riglyne gehoor gee, kan dus ‘van die strikke van die dood afwyk’ (Spreuke 14:27). ’n Meisie met die naam Mae het byvoorbeeld gesien hoe haar vleeslike suster Bybelbeginsels verontagsaam. Daardie suster het tragies ’n vroeë dood gesterf weens haar promiskue lewenstyl. Mae het verduidelik hoe sy sulke onsedelikheid kon weerstaan: “Ek kan goed oor Jehovah se beginsels van sedelikheid nadink, en dit versterk my. Hierdie beginsels help my om te sien hoe werklik Jehovah is en dat sy manier die beste is.”
Maar om Jehovah as ’n vriend te hê, behels meer as om net sy standaarde te leer ken. Jy kan sy persoonlike belangstelling in jou lewe ondervind. Die Bybel vertel van koning Dawid, wat van sy jeug af deur God geleer is. Dawid het ’n vriend van God geword, en hoewel hy ‘baie node’ ondervind het, het hy werklik die hand van God in sy lewe gesien. Dawid het oor God se “wonders” om sy ontwil gepraat asook oor Jehovah se “arm”, oftewel krag, wat in sy lewe uitgeoefen is. Op grond van sulke persoonlike ondervindings het Dawid geskryf: “U is my verwagting, Here HERE, my vertroue van my jeug af.” (Psalm 71:5, 17, 18, 20, ons kursiveer.) Jy kan dieselfde vertroue hê wanneer jy Jehovah se seën in jou lewe ervaar. Wanneer jy daarna streef om sy rigsnoere te volg—ten spyte van die uitdagings—sal jy inderdaad in ’n kosbare verhouding met God wandel.—Vergelyk Genesis 6:9.
God help ons om die regte weg te volg
Met al die versoekings en druk wat daar in die lewe is, is dit nie maklik om God se rigsnoere te volg nie. Dit was veral die geval met Peggy, wat as ’n jongmens ’n dwelmverslaafde en ’n prostituut was. Sy kon haar verslawing oorkom en sedelike veranderings aanbring deur die Bybel te bestudeer, en sy het sodoende ’n vriendskap met God aangeknoop. Maar Peggy het nog steeds voor dieselfde druk te staan gekom wat voorheen veroorsaak het dat sy deur middel van dwelms uitkoms gesoek het. Toe sy gevra is hoe sy aangehou het om dit te weerstaan, het sy geantwoord: “Ek kan net sê dat dit deur Jehovah se gees is.”
Peggy het geweet dat God sy heilige gees, oftewel werkende krag, aan sy vriende gee en dat dit hulle die krag kan gee om volgens sy standaarde te lewe (Handelinge 5:32; 1 Korintiërs 6:9-11). “Daar is nog tye wanneer ek daardie ou gevoelens terugkry, veral wanneer ek alleen is”, erken Peggy, “maar ek begin net onmiddellik bid. Die vermoë om hierdie probleme te oorkom, is vir my opwindender as enigiets wat ek nog in my lewe bereik het.” Hoe bemoedigend is dit tog om te weet dat God ons as ’n vriend kan help “ooreenkomstig sy krag wat in ons aan die werk is [en] oneindig meer kan doen as alles wat ons vra of wat ons ons voorstel”.—Efesiërs 3:20.
God se gees help ons om eienskappe soos lankmoedigheid, sagmoedigheid en selfbeheersing aan te kweek (Galasiërs 5:22, 23). In die gemeentes van Jehovah se Getuies voorsien God ook ouer manne, oftewel herders, wat deur heilige gees aangestel is, om praktiese bystand te verleen. Peggy voeg by: “Ek het baie ondersteuning van die gemeente gekry, veral van die ouer manne. Dit was ’n groot hulp.”
“Die rots van my hart”
“’n Vriend is te alle tye liefdevol en word ’n broer in tye van nood.” So sê Spreuke 17:17 in The Basic Bible. ’n Vriend is veral nodig gedurende “tye van nood”. Die psalmis Asaf het ernstige emosionele ontsteltenis ondervind, maar hy het as ’n vriend nader aan God gekom. Selfs al was sy hart deur innerlike pyn “bitter gestemd” het hy derhalwe gesê: “God is die rots van my hart” (Psalm 73:21, 26, 28). Jehovah, wat Asaf se gevoelens werklik verstaan het, het hom emosionele ondersteuning gegee. Jehovah het ’n stabiliserende invloed op Asaf uitgeoefen sodat hy nie hoop en moed sou verloor nie.
Ons hemelse Vriend kan gedurende teenspoed ook vir jou ’n rotsagtige fondament wees. Een tiener het dit deur persoonlike ondervinding geleer. Toe Bonnie 13 jaar oud was, het party van die meisies in haar plattelandse skooltjie ’n wrede, lasterlike gerug oor haar versprei. Dit het vir Bonnie gelyk of almal hierdie leuen glo. Baie van haar klasmaats het haar koud behandel en haar selfs uitgeskel. “Baie aande het ek huis toe gekom en gehuil”, het Bonnie verduidelik. “Ek het selfs lus gehad om myself om die lewe te bring omdat ek so seergemaak gevoel het.” Sy het haar tot party van haar vriende om ondersteuning gewend. “Ek het met mense probeer praat, maar dit het nie gelyk of hulle verstaan nie. Hulle het dit laat klink asof my probleem niks is nie. Partykeer het ek so alleen gevoel.” Wat het gekeer dat sy te midde van sulke ontsteltenis moed verloor? Sy sê voorts: “As Jehovah nie daar was nie, sou ek myself om die lewe gebring het. Ek het hom so lief. Hy is my beste vriend.” Nou weet sy dat dit haar vriendskap met God was wat haar gehelp het om daardie emosioneel verpletterende ondervinding te verduur.
Die wete dat Jehovah ons omstandighede verstaan en presies weet wat gebeur het, is baie bemoedigend wanneer ander nie die simpatie toon wat ons dalk verwag nie. Die wete dat ons Vriend “die Vader van tere barmhartighede” is, is ook ’n groot hulp wanneer ons onvriendelik behandel of selfs misbruik word. Partykeer veroordeel ons eie hart ons dalk, maar “God is groter as ons hart en weet alles” (2 Korintiërs 1:3, 4; 1 Johannes 3:20). Dit kan werklik bemoedigend wees as ons Jehovah se beskouing van ’n saak het. Een 13-jarige seun is byvoorbeeld wreedaardig deur drie mans gemolesteer. “Daarna het ek baie skaam gekry en myself blameer vir wat met my gebeur het”, het hy erken. “Ek was baie terneergedruk.” Toe het hy in Bybelse publikasies van die Wagtoringgenootskap oor verkragting navorsing begin doen. “Toe ek hierdie inligting gelees het, het ek in trane uitgebars. Dit het gevoel of ’n swaar las van my skouers afgeneem is. Ek was ’n slagoffer. Deur op Jehovah, familie en vriende te steun, kon ek deur hierdie moeilike tyd kom.” Watter ondersteuning het daardie Bybelse woorde tog verleen!
’n Vriendskap met God kan op baie maniere help! Ons kan ware vertroue in die lewe hê, die innerlike krag ontwikkel om God se weg te volg en rotsagtige ondersteuning gedurende teenspoed hê. Maar hoe kan ons so ’n vriendskap opbou? ’n Toekomstige artikel in hierdie reeks sal dit verduidelik.
[Prent op bladsy 13]
God kan ‘die rots van jou hart’ word