Waardeer jy godsdiensvryheid?
Deur Ontwaak!-medewerker in Estland
PERNOE is ’n hawestad en vakansieplek in die kleinerige Baltiese land Estland, wat vroeër ’n republiek van die Sowjetunie was. Die stad het ’n bevolking van meer as 50000. Die mense geniet tans die vryheid om die godsdiens van hulle keuse te beoefen—’n vryheid wat hulle ’n paar jaar gelede nie gehad het nie. Op 17 Junie 1995 het die Pernoe Let, ’n plaaslike koerant, gesê dat daar 11 godsdienste in Pernoe is en dat die koerant van plan was om ’n reeks artikels daaroor te publiseer.
Die eerste artikel het verduidelik: “Ons begin met die gemeente waarvan die werksaamhede ons almal blykbaar geraak het—Jehovah se Getuies—wat nou hulle vergaderinge in die saal van ’n brouery hou. . . . In 1931 het die Bybelstudente hulleself Jehovah se Getuies begin noem, en dit is die naam wat hulle tot vandag toe het. Daar is meer as vyfmiljoen Jehovah se Getuies dwarsoor die wêreld. Die hoofkwartier van Jehovah se Getuies in Estland is in Tallinn geleë.”
Die artikel het voorts gesê: “Die gemeente van Jehovah se verkondigers is een-en-’n-half jaar gelede in Pernoe gestig. In die begin was daar 25 lede; nou het hulle tot 120 toegeneem . . .
“Die eerste indrukke van hulle is redelik positief. Die mense—meestal jong paartjies—is vriendelik, netjies aangetrek en het ’n oop gemoed. Dit is verbasend dat die kinders so gedissiplineerd is, want dit is nie maklik vir ’n kleintjie om een-en-’n-half uur lank op een plek stil te sit nie—maar hulle het.”
Die koerant het verduidelik in watter opsigte Jehovah se Getuies van ander godsdienste verskil: “Hulle vestig die aandag op die toekomende Paradys. Dit is ook opmerklik dat die gemeente die Bybel baie goed ken, en hulle haal so dikwels moontlik daaruit aan.” Ter afsluiting het die artikel gesê: “Daardie 120 mense, wat Jehovah se verkondigers is, het hulle besluit geneem, en hulle is seker dat dit reg is. Hulle geloof en die verkondiging daarvan is die spil waarom hulle lewe draai.”
Nie almal in Pernoe was ingenome met hierdie eerste artikel van die voorgenome reeks oor die godsdienste van die stad nie. Op 8 Julie 1995 het die Pernoe Let berig: “Ons wil graag ’n versoekskrif publiseer wat ons van vier kerke ontvang het in verband met ’n nuwe rubriek.” Hierdie versoekskrif, of brief, aan die koerant is onderteken deur verteenwoordigers van die Ortodokse Kerk in Estland, die Evangeliese- Lutherse Kerk van Estland, die Estlandse Unie van Evangeliese Christene en Baptiste sowel as die Metodistekerk van Estland.
Hierdie vier godsdiensverteenwoordigers het gekla: “Ons vind dit uiters vreemd dat julle die reeks met ’n artikel oor Jehovah se Getuies begin het.” Daarbenewens het hulle gesê: “In verband met hierdie reeks wil ons graag sê dat dit vir ons onmoontlik sal wees om ’n onderhoud aan Pernoe Let toe te staan.”
Die godsdiensverteenwoordigers het ten slotte gesê: “In ’n gemeenskap waar talle verward is weens die druk wat uitgeoefen word deur verskillende nuwe godsdienste en sektes wat ‘geestelikheid’ propageer, meen ons dat publikasies die plaaslike godsdienssituasie in ag moet neem en historiese kerke moet kan onderskei van sektes en ekstremistiese bewegings. Die lede van die Estlandse Raad van Kerke, wat Christelike kerke verteenwoordig wat ekumeniese samewerking geniet, behoort ’n duidelike riglyn in hierdie verband te voorsien.”
Ná hierdie brief het die skrywer vir Pernoe Let egter die volgende stof tot nadenke gegee: “Alles wat ons as reg beskou, is dalk nie reg nie. En hoe God die verskillende godsdienste beskou en beoordeel, is dalk nie dieselfde as die beskouings van hierdie vier vername kerke nie, en andersom. Geeneen van ons is onfeilbaar nie, selfs nie die kerke met eeue oue tradisies nie.”
Hoe voel jy oor die veranderde gesindheid teenoor godsdiens in die voormalige republieke van die Sowjetunie? Ons is seker daarvan dat waarheidsoekers regoor die wêreld die godsdiensvryheid waardeer wat daar geniet word.
[Kaart op bladsy 23]
(Sien publikasie vir oorspronklike teksuitleg)
FINLAND
Helsinki
Die Oossee
ESTLAND
Tallinn
Pernoe
LETLAND
Riga
LITAUE
Vilnius
RUSLAND
St. Petersburg
Moskou
BELARUS
Minsk
[Prente op bladsy 24]
Die gemeente van Jehovah se Getuies in Pernoe