Van ons lesers
Slagting Ek het nog altyd gewonder waarom niemand hulle ooit teen die Slagting uitgespreek het nie. Die reeks “Die Slagting—Wie het hulle daarteen uitgespreek?” (22 Augustus 1995) het my vraag beantwoord. Jehovah se Getuies het hulle daarteen uitgespreek, en ek is baie trots op my mede-Getuies!
C. B., Verenigde State
Mag ek—’n nielid—julle gelukwens met die manier waarop julle die onderwerp van die Slagting behandel het. Julle objektiewe behandeling van hierdie bose blyk van mense se onmenslikheid teenoor ander is die insiggewendste wat ek nog teëgekom het. Die moed van julle mede-Getuies gedurende daardie tyd is iets waarvan die wêreld ongelukkig min weet.
L. B., Engeland
My vader het in Sachsenhausen gesterf. My oudste broer het ook as gevolg van Nazi-gevangenskap gesterf. Ek kan die Nazi’s se vervolging van Jehovah se Getuies nog duidelik onthou. Daarom wil ek my waardering vir die artikels uitspreek. Knap gedaan!
F. D. J., Kanada
Ek is baie beïndruk deur die artikels. Maar ek stem nie saam dat Jehovah se Getuies die enigste “stem te midde van stilte” was nie. Die Kommuniste het ook mense teen Hitler gewaarsku voordat hy aan bewind gekom het. Baie het in konsentrasiekampe beland.
B. W., Duitsland
“Ontwaak!” erken geredelik dat Hitler baie politieke teenstanders gehad het. Maar die artikels het spesifiek na die versuim van godsdiensorganisasies verwys, waarvan die meeste met die Nazi-regime saamgewerk het. Die Nazi’s self het Jehovah se Getuies as hulle vernaamste godsdiensteenstanders geïdentifiseer. Daarom was die Getuies die enigste godsdiensgroep wat as gevangenes hulle eie identifikasiesimbool in die konsentrasiekampe gekry het—die berugte pers driehoek.—RED.
Aardbewing in Japan Ek het gehuil toe ek die artikel “Japan se skielike ramp—Wat mense gedoen het” (22 Augustus 1995) gelees het. Ek het my geliefde Christensuster in daardie aardbewing verloor. Sy was baie ywerig. Ek weet dat sy opgewek sal word en dat ek haar weer sal sien. Ek is innig dankbaar vir al die geestelike en materiële bystand wat ons van die gemeente en die Genootskap ontvang het. Maar ek huil nog steeds wanneer ek dink aan wat daardie dag gebeur het.
T. M., Japan
Die georganiseerde en vinnige optrede van die Getuies het my heeltemal verstom. Toe ek die mooi boodskap van die broers in die gemeente in Korea gelees het, kon ek nie ophou huil nie. Ek was so bly om te dink dat ek aan so ’n liefdevolle organisasie behoort.
M. K., Japan
Seksuele teistering Dankie vir julle artikel “Jongmense vra . . . Seksuele teistering—Hoe kan ek my beskerm?” (22 Augustus 1995). Ek is 17 jaar oud en het ’n seun by die skool ontmoet wat nie ’n ware Christen is nie. Ek het hom vertrou, maar later het hy en sy vriende my met onkuise voorstelle en dreigemente begin teister. Ek moes daardie skool verlaat om van die situasie af weg te kom. Ek het baie uit hierdie artikel geleer. Nou weet ek hoe om teenoor die ander geslag op te tree.
T. G., Portugal
Iemand by die werk het my seksueel geteister en gedreig. Aangesien ek as kind gemolesteer is, is dit dikwels vir my moeilik om my man te staan. Ek het hom nogtans herhaaldelik gevra om my uit te los. Ek het hom uiteindelik by ons werkgewers gerapporteer, en toe het hy my uitgelos. Ek is baie dankbaar vir die artikel. Vroue moet weet hoe om hierdie probleem te hanteer.
V. A., Verenigde State