Kan die Slagting weer plaasvind?
DEUR ONTWAAK!-MEDEWERKER IN SWEDE
VAN 26-28 Januarie 2000 het staatshoofde en verteenwoordigers van 48 regerings van regoor die wêreld in die hoofstad van Swede vergader vir die Stockholm- Internasionale Forum oor die Slagting. Party dinge wat van die verhoog af gesê is, het aan die lig gebring dat wêreldleiers bang is dat Nazisme sal herlewe. Israel se voormalige eerste minister, Ehud Barak, het gesê: “Hierdie konferensie dra ’n universele boodskap uit: Om nooit weer ’n regime van boosheid en moord en diskriminasie op grond van mense se godsdiens, ras of kleur op enige plek te duld nie.”
Nie net ’n Joodse vrees nie
Baie mense oor die wêreld assosieer die woord “Slagting” net met die Jode. Maar daar was ook ander slagoffers. By ’n Joodse seremonie ter herdenking van die Slagting wat gedurende die forum by die Groot Sinagoge van Stockholm gehou is en groot publisiteit gekry het, het Swede se eerste minister voorgestel dat lande hulle daartoe verbind om alle argiewe regoor die wêreld oop te stel om die publiek oor die Slagting in te lig. “Laat mense ingelig word”, het hy gesê, “oor die volksmoord op die Sigeuners, die massamoord op gebreklikes en hoe homoseksuele, andersdenkendes en Jehovah se Getuies vervolg en vermoor is.”
Die Sweedse regering het ’n boek oor die Slagting vrygestel met die titel Tell Ye Your Children, wat landwyd gratis versprei is onder huisgesinne met kinders. Hierdie boek sê dat Jehovah se Getuies “geweier het om ’n eed van getrouheid aan Hitler en Nazi-Duitsland af te lê. Sulke verset is uitsonderlik omdat hulle die vervolging kon beëindig het deur bloot ’n dokument te onderteken waarin hulle trou aan die regering gesweer het—maar min het hierdie opsie gekies.”
Die Slagting en Jehovah se Getuies
In 1933 was daar ongeveer 25 000 Getuies van Jehovah in Duitsland. Duisende van hulle was onder die eerste mense wat in die Nazi-kampe en -gevangenisse gegooi is. Hulle het hulle neutraliteit as Christene ten opsigte van alle soorte politieke en militêre bedrywighede bekend gemaak. Hulle het nie “heil Hitler” gesê nie. Hulle het geweier om die rassistiese ideologie van die Nazi’s te aanvaar en deel van Hitler se oorlogsmasjien te wees. Omtrent 2 000 het gesterf, van wie meer as 250 tereggestel is.
Daarbenewens het Getuiegevangenes hulle medegevangenes gehelp om te volhard, met inbegrip van Jode en ander. Hulle het dit gedoen deur ander van hulle Bybelse hoop te vertel en deur alles wat hulle gehad het met die siekes en swakkes te deel; dikwels het hulle hulle laaste stukkie brood gedeel. Gedurende die vroeë jare van die Nazi-vervolging het hulle ook inligting uitgesmokkel oor die bestaan van konsentrasiekampe en wat daarin plaasvind. Sedertdien het daar in hulle tydskrifte, Die Wagtoring en Ontwaak!, wat wêreldwyd versprei word, baie artikels oor Nazi-gruweldade en lewensverhale van oorlewendes verskyn.
Vrees vir ’n herlewing van Nazisme was duidelik te bespeur onder die afgevaardigdes by die Stockholm- Internasionale Forum oor die Slagting. Professor Jehoeda Bauer, direkteur van die Internasionale Sentrum vir Navorsing oor die Slagting aan die Instituut van die Hedendaagse Jodedom, Israel, het dit so gestel: “Omdat dit een keer gebeur het, kan dit weer gebeur, nie in dieselfde vorm nie, nie noodwendig met dieselfde mense nie, nie deur dieselfde mense nie, maar met enigiemand deur enigiemand. Dit was sonder presedent, maar nou is daar wel ’n presedent.”
[Prent op bladsy 12]
Die pers driehoekie het Jehovah se Getuies in die kampe geïdentifiseer
[Prente op bladsy 12, 13]
1. Julius Engelhardt, een van Jehovah se Getuies, is op 14 Augustus 1944 in Brandenburg deur die Nazi’s tereggestel
2. Drie Getuies van Jehovah op pad huis toe nadat hulle van Sachsenhausen bevry is, 1945
3. Elsa Abt, ’n Getuie wat van haar dogtertjie geskei is en byna drie jaar lank opgesluit was
[Erkenning]
Nordrhein-Westfälisches Hauptstaatsarchiv, Düsseldorf
[Prente op bladsy 13]
Getuie-oorlewendes vertel hulle verhale op hierdie video’s