Van ons Lesers

Grootste Kunstenaar Dankie vir die reeks “Op soek na die grootste Kunstenaar” (8 November 1995). As ’n kunstenaar het ek die artikels baie waardeer. Die groot verskeidenheid in God se skepping, die digkuns van die Psalms en ander pragtig bewoorde Bybelverse toon alles dat Jehovah nie net kuns skep nie, maar dit self ook geniet!

B. R., Verenigde State

Aangesien ek al meer as 30 jaar by kuns betrokke is, wil ek almal prys wat gehelp het om so ’n wonderlike artikel voor te berei! Dit was nege bladsye van uitstekende logika en redenering met betrekking tot ons groot God, Jehovah, en sy dinamiese skeppingsvermoëns.

P. M., Verenigde State

Mormone Ek het die artikel “Die Mormoonse Kerk—’n Herstelling van alle dinge?” in afwagting gelees (8 November 1995). Ek het in ’n Mormoonse huis grootgeword en is gedoop en tot Mormoonse priester georden voordat ek ’n Getuie van Jehovah geword het. Een stelling het egter my aandag getrek. Julle sê dat die Mormone “beweer . . . dat die sonde van die eerste egpaar geslagsomgang en die voortbring van kinders ingesluit het”. Soos ek onthou, is ons geleer dat Adam en Eva gesondig het deur letterlike vrugte te eet.

D. A., Verenigde State

Ons is jammer as hierdie stelling verwarring veroorsaak het. Ons het nie bedoel dat die Mormone glo dat die sonde geslagsomgang was nie, alhoewel ’n mens miskien hierdie indruk kan kry uit die verslag van “Die Boek van Mormon” (2 Nefi 2:22, 23, 25). Ons het egter gesê dat die sonde geslagsomgang “ingesluit het”. Hoe? Omdat dit, volgens Mormoonse teologie, die weg vir menslike voortplanting gebaan het. Volgens die boek “Mormon Doctrine”, deur Bruce R. McConkie, “kon [Adam] voor sy sonde nie kinders hê nie. . . . Volgens die voorbestemde plan sou Adam tot ’n val gebring word . . . As ’n sterfling kon hy nou kinders hê.” In teenstelling hiermee leer die Bybel nie dat Adam moes sondig om te kon voortplant nie (Genesis 1:28). Dit sê ook nie dat hulle val die gevolg van ’n voorbestemde plan van God was nie. Dit sê eerder dat dit die gevolg van hulle eie begeerte na onafhanklikheid was (Prediker 7:29). Hoewel ons dus die Mormone se reg respekteer om te glo wat hulle wil, toon hierdie saak duidelik dat die leringe van “Die Boek van Mormon” eenvoudig nie met die Bybel verenig kan word nie.—RED.

As iemand wat nooit werklik geweet het waaroor om met Mormone te gesels nie, kan ek sê dat ek danksy hierdie artikels behoorlik omtrent hulle ingelig is. Hoe kan die Mormone sê hulle glo dat die Bybel en Die Boek van Mormon albei van God af kom, maar nie sien dat hulle mekaar weerspreek nie?

J. M., Verenigde State

Rekenaarpornografie Ek wil julle bedank vir die berig “Rekenaarpornografie aan kinders beskikbaar” in “Ons beskou die wêreld” (8 November 1995). Ek het dit gelees, en my hart het amper gaan staan! Dit het werklik getoon hoe gevaarlik hierdie programme is en hoe maklik kinders toegang daartoe kan kry. Hierdie artikel sal Christene help om die positiewe en die negatiewe aspekte van sulke rekenaartegnologie in ag te neem.

D. P., Verenigde State

Voedselverspreide siektes Ek het julle artikel “Beskerm jou teen voedselverspreide siektes” (22 November 1995) geniet. Ek is ’n sjef van beroep, en ek wil graag iets byvoeg. As iemand van lig gaar vleis hou, kan hy dit dalk nie eet as hy voedselverspreide siektes wil vermy nie. Dit is waar dat vleis geneig is om droog te word en miskien moeiliker is om te verteer as dit teen hoër temperature gaargemaak word. ’n Goeie manier om vleis goed gaar te maak en die vog te behou, is om dit te stowe of te smoor.

J. P. K., Verenigde State

Dankie vir die gaarmaakwenk.—RED.