Van Ons Lesers
Mormone Ek kon my oë nie glo toe ek die artikel “Die Mormoonse Kerk—’n Herstelling van alle dinge?” (8 November 1995) gelees het nie. Julle noem julleself ware Christene omdat julle weier om oorlog te voer. Maar ek is trots op die Mormone wat in die Tweede Wêreldoorlog geveg het en die Jode, wat deur Hitler vervolg is, gehelp het. Wat het Jehovah se Getuies op daardie tydstip gedoen behalwe om agteroor te sit en te kyk hoe sesmiljoen Jode sterf?
G. D., Duitsland
Dit is waar dat Mormone in die Verenigde State en in Brittanje teen Nazisme geveg het. Maar nie in Duitsland nie. Die boek “The Nazi State and the New Religions” deur Christine King, vise-kanselier van die Universiteit van Stafford in Engeland, sê: “Mormone het by die weermag aangesluit, en teen 1940 was daar seshonderd Mormone in die Duitse leër. . . . Mormone het aangehou om die ‘parallelle doelwitte’ van Mormonisme en Nasionaal-Sosialisme te beklemtoon. . . . Party Mormoonse leiers het begin om hulle gemeentes in beginsels van Nasionaal-Sosialisme te onderrig, vir die Führer te bid en te sê dat hy ‘deur God gestuur’ is. . . . Daar is slegs twee opgetekende gevalle van Mormone wat hulle teen die Nazi’s verset het.” Jehovah se Getuies het egter as ’n groep geweier om die Nazi-regime te ondersteun. Daarom het hulle die teikens van hewige vervolging deur Hitler se regering geword. Duisende van hulle is in konsentrasiekampe opgesluit en baie het daar gesterf. Sien ons nommer van 22 Augustus 1995.—RED.
Verkeerde foto Ek het die reeks “Wetenskapsfiksie—’n Blik op ons toekoms?” (8 Desember 1995) baie geniet. Maar die foto van Jules Verne op bladsy 3 is eintlik dié van William Morris, ’n 19de-eeuse kunstenaar en skrywer.
R. G., Verenigde State
’n Aantal lesers het hierdie fout raakgesien. As gevolg van ’n skryffout is die foto van William Morris in ons lêer verkeerd gemerk. Ons vra om verskoning vir die verwarring.—RED.
Ontsagwekkende heelal Nadat ek die reeks “Die ontsagwekkende heelal—Waar het dit vandaan gekom?” (22 Januarie 1996) gelees het, het ek ’n baie beter begrip van die huidige wetenskaplike gedagtes oor die heelal verkry. Die vaardige gebruik van ’n oorvloed gegewens, bronne en verwysings het julle aanbieding uitstaande gemaak. As ’n onderwyser sal ek goed gebruik maak van die materiaal wat julle aangebied het.
M. P., Verenigde State
Ek het al dikwels soortgelyke artikels in tydskrifte gelees, maar hulle het nooit die eer vir sulke wonders aan ’n Ontwerper gegee nie. Julle artikels het daardie leemte gevul.
P. B., Italië
Die materiaal was nie net feitelik nie, maar dit was ook geloofversterkend. Dit het ons waardering vergroot vir ons God—die Skepper van ons wonderlike, ontsagwekkende heelal!
C. S., Griekeland
Dit was werklik opwindend om die artikels te lees. Ek is 14 jaar oud, en ek het nog altyd ’n baie groot bewondering vir die heelal gehad. Hierdie artikels het my laat besef hoe nietig mense in vergelyking met hierdie ingewikkelde skeppingswerk is.
M. D., Portugal
Ek het die artikels met buitengewone belangstelling gelees. Ek is bly dat Ontwaak! sulke onderwerpe bespreek. Dit het my ’n beter begrip gegee van die geheime van die heelal, veral die inligting oor die bewys van “borrels” wat 100 miljoen ligjare groot is, met talle galaksies aan die buitekant en leegtes binne-in. Dit skep ’n probleem vir die oerknalteorie! Ek besef nou hoe min ons werklik van die heelal weet.
D. K., Tsjeggiese Republiek