Tering neem weer toe!

SEDERT die vyftigerjare het die aantal teringgevalle (TB) in die Verenigde State teen ’n tempo van 5 persent per jaar gedaal. Maar sedert 1985 het die aantal aangemelde TB-gevalle met 18 persent gestyg. Die teenwoordigheid van ’n nuwe soort tering wat nie op geneesmiddels reageer nie, is selfs onstellender. TB maak nou ongeveer driemiljoen mense elke jaar dood. Waarom is die mens besig om die stryd teen TB te verloor?

Een rede is dat baie pasiënte eenvoudig nie hulle medisyne vir die vasgestelde tydperk—dikwels ses tot nege maande—neem nie. In die stad New York het een studie byvoorbeeld getoon dat 89 persent van ’n groep van ongeveer 200 pasiënte met aktiewe TB nie hulle behandeling voltooi het nie. “Dis verskriklik”, sê dr. Lee Reichman, president van die Amerikaanse Longvereniging, “want daardie mense gaan (a) nie gesond word nie en (b) hulle gaan waarskynlik TB ontwikkel wat teen die gewone medisyne bestand is.” Maar dit is nie net hierdie draers se gesondheid wat beïnvloed word nie. “As hulle nie hulle medisyne neem nie”, voeg dr. Reichman by, “kan hulle ander mense besmet.” Dit dra ongetwyfeld by tot die geraamde agtmiljoen nuwe gevalle wat elke jaar wêreldwyd gediagnoseer word.

Bybelstudente besef dat ‘peste op die een plek na die ander’ ’n deel van die teken is dat ons in “die laaste dae” van hierdie stelsel van dinge lewe (Lukas 21:11; 2 Timoteus 3:1). Wat sal hierop volg? ’n Nuwe aarde waarin “geen inwoner sal sê: Ek is siek nie” (Jesaja 33:24). Ja, Jehovah God beloof, nie tydelike verligting nie, maar permanente bevryding van siekte en die dood.—Openbaring 21:1-4.