’n Dodetal wat met dié van oorlog meeding
TOE die 23-jarige Marilyn gewig verloor en afgemat gevoel het, het sy vermoed dat dit iets met haar onlangse swangerskap te doen gehad het. Sy het ook aanhoudend gehoes, wat sy aan haar dokter gemeld het. Hy het gesê dat dit ’n bolugweginfeksie was en antibiotika voorgeskryf. Later, toe sy in die nag begin sweet het, het Marilyn werklik bekommerd geraak. Sy het na haar dokter toe teruggegaan, wat gereël het dat ’n x-straalfoto van haar bors geneem word.
Die onmiskenbare skaduwee op die x-straalfoto het dringende optrede vereis, maar Marilyn kon nie per telefoon bereik word nie. “Die dokter het na my ma toe deurgekom en vir haar gesê dat ek werklik siek was”, het Marilyn gesê. “My ma het my kom soek en vir my gesê dat ek onmiddellik na die [dokter] toe moet gaan. Hy het my hospitaal toe gestuur waar nog ’n x-straalfoto geneem is en ek opgeneem is.”
Marilyn was geskok toe sy hoor dat sy tuberkulose (TB) het. Sy het gedink dat sy sou doodgaan, maar ná behandeling met TB-teenmiddels was sy gou weer gesond.
Marilyn se verbasing oor die feit dat sy TB het, is verstaanbaar. Tot onlangs toe het selfs baie gesondheidsdeskundiges gemeen dat TB in die ontwikkelde wêreld uitgeroei is. “Ek het gedink dat dit saam met die plaag uitgeroei is”, het ’n kliniese assistent by ’n behandelingsentrum in Londen gesê. “Maar toe ek hier kom werk het, het ek gevind dat dit beslis nog bestaan en in die middestad voortwoed.”
In plekke waar TB verdwyn het, het dit teruggekeer; waar dit gebly het, het dit vererger. TB is nog lank nie uitgeroei nie, maar maak eerder net soveel mense dood as oorlog en hongersnood. Kyk hierna:
◼Ten spyte van die wondere van die moderne geneeskunde het TB gedurende die afgelope honderd jaar ongeveer 200 miljoen mense na die graf laat gaan.
◼Tot tweemiljard mense—’n derde van die wêreld se bevolking—is reeds met die TB-basil, ’n soort bakterie, besmet. Daarbenewens word nog iemand elke sekonde met TB besmet!
◼In 1995 was daar ongeveer 22 miljoen mense met TB wat ten volle ontwikkel het. Byna driemiljoen het gesterf, die meeste van hulle in die ontwikkelende wêreld.
Waarom teister hierdie siekte die mensdom nog steeds ten spyte van die sterk geneesmiddels wat beskikbaar is om TB te bestry? Sal dit ooit oorwin word? Is daar enige manier waarop jy jou daarteen kan beskerm? Die volgende artikels sal hierdie vrae beantwoord.
[Foto-erkenning op bladsy 3]
New Jersey Medical School —National Tuberculosis Center