Die Bybelse beskouing

Die Vloed—Feit of fabel?

‘En die diere het twee-twee na Noag in die ark gegaan.’—Genesis 7:8, 9.

WIE het nie van die Vloed van Noag se dag gehoor nie? Jy ken waarskynlik al die verhaal van jou kinderdae af. Trouens, as jy na die plaaslike biblioteek gaan om navorsing oor die Vloed te doen, sal jy dalk vind dat baie meer boeke vir kinders oor die onderwerp geskryf is as vir volwassenes. Gevolglik besluit jy miskien om die Vloedverhaal bloot as ’n slaaptydstorie te beskou. Baie meen dat die verhaal van die Vloed in Noag se tyd, tesame met ’n groot deel van die res van die Bybel, niks meer as ’n fabel is nie of, op sy beste, ’n sedeles wat deur die mens uitgedink is.

Dit is verbasend dat selfs sommige wat beweer dat hulle hulle godsdiensopvattings op die Bybel baseer, twyfel of die Vloed werklik plaasgevind het. Die Katolieke priester Edward J. McLean het eenkeer gesê dat die verhaal van Noag nie bedoel was om as geskiedenis beskou te word nie, maar as “’n sinnebeeldige voorstelling of letterkundige vorm”.

Maar is die Vloedverhaal in die Bybel net ’n sinnebeeldige voorstelling wat nooit bedoel was om letterlik opgeneem te word nie? Steun die Bybel self so ’n beskouing?

Geloofwaardige besonderhede

Beskou eerstens die verslag wat Moses in die boek Genesis opgeteken het. Daar vind ons die spesifieke jaar, maand en dag waarop die watervloed begin het, die ark tot rus gekom het en die aarde droog geword het (Genesis 7:11; 8:4, 13, 14). Hoewel spesifieke datums nie altyd op ander plekke in Genesis aangegee word nie, beklemtoon hierdie datums die feit dat Moses die Vloed as ’n werklike gebeurtenis beskou het. Vergelyk die klank van Bybelwaarhede met die kenmerkende inleiding van menige fabel: “Eendag was daar . . . ”

Dink aan die ark self as nog ’n voorbeeld. Die Bybel beskryf ’n vaartuig wat ongeveer 133 meter lank was, met ’n lengte-tot-hoogte-verhouding van 10 tot 1 en ’n lengte-tot-breedte-verhouding van 6 tot 1 (Genesis 6:15). Maar Noag was nie ’n skeepsbouer nie. En onthou dat dit meer as 4000 jaar gelede plaasgevind het! Tog is die ark gebou met afmetings wat ideaal was sodat dit as ’n drywende houer kon dien. Trouens, hedendaagse skeepsboukundiges het gevind dat soortgelyke verhoudings geskik is vir struktuurintegriteit en bestendigheid in die oop see. Hoewel die Bybel nie sê presies hoeveel tyd Noag aan die bou van die ark bestee het nie, laat die verslag ’n boutydperk van 50 of 60 jaar toe (Genesis 5:32; 7:6). Hierdie faktore vorm ’n skerp teenstelling met die bekende storie in die Babiloniese Epos van Gilgamesj. Die epos beskryf ’n enorme, lomp kubus waarvan die sye elk omtrent 60 meter lank was en in net sewe dae gebou is. Anders as daardie Babiloniese legende wek die Bybel se Vloedverhaal vertroue in die akkuraatheid daarvan.

Buiten die Genesisverslag verwys die Skrif tien keer na Noag of die wêreldvloed. Toon hierdie verwysings dat die geïnspireerde skrywers die Vloed as werklike geskiedenis of as ’n fabel beskou het?

Die egtheid word bevestig

In die Skrif verskyn Noag se naam in twee geslagsregisters van die nasie Israel, waarvan die tweede met Jesus Christus eindig (1 Kronieke 1:4; Lukas 3:36). Esra en Lukas, die persone wat hierdie geslagsregisters saamgestel het, was albei bekwame geskiedskrywers en moes geglo het dat Noag ’n werklike persoon was.

Elders in die Bybel word Noag saam met geskiedkundige mense vermeld en ’n man van regverdigheid en geloof genoem (Esegiël 14:14, 20; Hebreërs 11:7). Maak dit sin dat Bybelskrywers ’n mitiese persoon sou insluit as ’n voorbeeld om na te volg? Nee, want dit kan diegene wat die Bybel lees maklik laat dink dat geloof bo die mens se vermoë is en net deur storieboekkarakters beoefen kan word. Noag en die ander manne en vroue van geloof word juis gemeld omdat hulle mense was met swakhede en gevoelens soos ons s’n.—Hebreërs 12:1; vergelyk Jakobus 5:17.

In die ander teksverwysings word daar na Noag en die Vloed verwys in die konteks van die vernietiging wat God oor die ontroue geslag van Noag se tyd gebring het. Let op Jesus se verwysing na die Vloed, soos opgeteken in Lukas 17:26, 27: “Net soos dit in die dae van Noag gebeur het, so sal dit ook in die dae van die Seun van die mens wees: hulle het geëet, hulle het gedrink, manne het getrou, vroue is in die huwelik gegee, tot op daardie dag toe Noag in die ark ingegaan het en die vloed gekom en hulle almal vernietig het.”

Jesus Christus was ’n ooggetuie van die gebeure wat hy beskryf het, aangesien hy in die hemel was voordat hy op die aarde gelewe het (Johannes 8:58). As die Vloed bloot ’n fabel was, het Jesus óf te kenne gegee dat sy toekomstige teenwoordigheid ’n fantasie was óf ’n leuen vertel. Nie een van hierdie gevolgtrekkings is verenigbaar met die res van die Skrif nie (1 Petrus 2:22; 2 Petrus 3:3-7). Jesus Christus het derhalwe geglo dat die Bybelverslag van die wêreldvloed geloofwaardige geskiedenis is omdat hy dit persoonlik gesien het. Vir ware Christene is dit sonder twyfel die mees afdoende bewys dat die Vloed van Noag se dag feit is en nie fabel nie.

[Foto-erkenning op bladsy 26]

L. Chapons/Illustrirte Familien-Bibel nach der deutschen Uebersetzung Dr. Martin Luthers