Jongmense vra . . .

Hoe kan ek ’n vriend van God word?

“LOJALITEIT.” “Persoonlike toegewydheid.” Dit is terme wat mense dikwels gebruik om die band te beskryf wat hulle met hulle boesemvriende het. Het jy geweet dat hierdie terme ook gebruik kan word om ’n band met die Grootse Skepper van hierdie ontsagwekkende heelal te beskryf—dat God self jou persoonlike vriend kan wees? Ja, die Bybel praat van godvrugtige toegewydheid, en daardie uitdrukking behels nie net gehoorsaamheid nie, maar ook ’n persoonlike band met God, ’n gehegtheid wat uit ’n waarderende hart spruit.

Vorige artikels in hierdie reeks het getoon dat so ’n band nie alleen moontlik is nie, maar dat jy ook daarby baat kan vind.a Maar presies hoe knoop ’n mens hierdie persoonlike vriendskap met God aan? Dit is nie iets waarmee jy gebore word of wat jy outomaties van godvrugtige ouers erf nie. Dit is eerder iets wat slegs deur werklike inspanning verkry word. Die apostel Paulus het vir die jong man Timoteus gesê ‘om hom te oefen met godvrugtige toegewydheid as sy doel’. Ja, hy moes hom inspan soos ’n atleet hom inspan wanneer hy oefen! (1 Timoteus 4:7, 8, 10). Jy moet dieselfde doen as jy God as jou vriend wil hê. Maar hoe kan jy jou in hierdie opsig begin oefen?

Persoonlike kennis van God

Aangesien godvrugtige toegewydheid uit die hart spruit, moet jy jou hart met kennis van God vul. Dit is jammer dat toe meer as 500 jongmense gevra is: “Hoe dikwels lees jy die Bybel op jou eie?” 87 persent gesê het hulle lees dit “nou en dan”, “feitlik nooit” of “nooit”. Die meeste jongmense dink blykbaar dat dit oninteressant en vervelig is om die Bybel te lees. Maar dit hoef nie so te wees nie! Dink ’n bietjie: Waarom memoriseer party jongmense allerhande sportstatistiek of leer hulle die woorde van hulle gunstelingliedjies? Omdat hulle in daardie dinge belangstel. Bybelstudie word eweneens interessant as jy daarin verdiep raak (1 Timoteus 4:15). Die apostel Petrus se raad was: “Ontwikkel . . . ’n verlange na die onvervalste melk wat tot die woord behoort” (1 Petrus 2:2). Ja, jy moet so ’n belangstelling in die Skrif ontwikkel. Dit verg dalk inspanning, maar die beloning is die moeite werd.b

In die eerste plek sal “die lieflikheid van die HERE” geopenbaar word as ons God se Woord en Bybelpublikasies lees en bestudeer (Psalm 27:4). ’n Jong Christen met die naam Amber het haar dit ten doel gestel om die hele Bybel te lees. Dit het byna ’n jaar geneem. “Ek twyfel of daar baie dinge in my lewe sal wees wat soveel tyd en inspanning sal verg, maar soveel belonings sal meebring”, het Amber verduidelik. “Wanneer ek dit gelees het, was dit asof Jehovah my soos ’n vader op sy skoot getel en my geleer het. Ek het soveel van Jehovah geleer—dinge wat my nader aan hom laat kom het en gemaak het dat ek hom vir die res van my lewe wou vrees.”

Wanneer jy die Bybel lees, leer jy van baie geleenthede toe God sy vriende lojaal ondersteun het (Psalm 18:25, NW; 27:10). Jy vind uit dat sy standaarde altyd die beste is en vir ons ewige welsyn is (Jesaja 48:17). As jy van God se weergalose eienskappe lees, soos sy liefde en wysheid, besiel dit jou met die begeerte om hom na te volg (Efesiërs 5:1). Maar voordat sulke inligting jou hart kan raak, moet jy ook daaroor peins. Vra jou af terwyl jy lees: ‘Wat vertel dit my van Jehovah? Hoe kan ek dit in my denke en dade toepas? Hoe toon dit dat God die beste vriend is wat ek ooit kan hê?’

Die kennis van God wat jy deur persoonlike en gemeentelike studie inneem, sal jou help om op ’n ander manier nader aan hom te kom. ’n Franse spreekwoord sê: “Slegs hulle wat soos een persoon dink, is ware vriende.” Maar hoe kan jy en God “soos een persoon dink”? Die jong Denise verduidelik: “Hoe meer jy ’n onderwerp bestudeer en navors, hoe beter verstaan jy wat Jehovah se sienswyse daaroor is. Dit help as jy weet hoe hy oor iets voel.”

Opregte gedrag is lewensbelangrik

God kies slegs diegene as vriende wat sy morele standaarde respekteer. “Sy intimiteit is met die opregtes”, sê Spreuke 3:32 (NW). ’n Jong persoon wat daarna streef om opreg te wees, sal ‘sorgvuldig in die wet van Jehovah wandel’ (2 Konings 10:31). Hoe na aan God sal sulke gehoorsame gedrag ’n mens bring? Jesus Christus het gesê: “My Vader sal hom liefhê, en ons sal na hom toe kom en ons woning by hom maak” (Johannes 14:21-24). Wat ’n hartverblydende prentjie! Stel jou voor dat die twee grootste persone in die heelal hulle gedagtes en sorg voortdurend op ’n mens toespits! Dit sal met jou gebeur as jy sorgvuldig in die wet van Jehovah wandel.

Beteken opregtheid dat jy volmaak moet wees? Glad nie! Wanneer jy ’n fout maak weens swakheid beteken dit nie dat jy ‘die pad van God se gebooie’ verlaat het nie (Psalm 119:35). Dink aan wat die Bybel vir ons van koning Dawid sê. Ondanks die feit dat hy ’n lojale vriend van God was, het hy weens swakheid ’n paar ernstige foute gemaak. Nietemin het Jehovah gesê dat hy “met ’n volkome hart en in opregtheid” gewandel het (1 Konings 9:4). Koning Dawid het altyd opregte berou getoon vir enige oortreding wat hy begaan het en het hard probeer om te doen wat God behaag.—Psalm 51:3-6.

Hoewel Dawid God liefgehad het, het hy geweet hoe moeilik dit soms kan wees om te doen wat reg is. Dit is waarom hy God gesmeek het: “Lei my in u waarheid.” Ja, hy het ’n opregte vrees ontwikkel dat hy God sou aanstoot gee. Dawid kon dus sê: “Die intimiteit met Jehovah behoort aan dié wat hom vrees” (Psalm 25:5, 14, NW). Dit is nie ’n morbiede vrees nie, maar ’n diepe ontsag vir die Skepper en ’n heilsame vrees om hom te mishaag. Dit is hierdie godvrugtige vrees waarop gepaste gedrag gegrond is. Ter toeligting: neem byvoorbeeld ’n jong Christen met die naam Joshua.

Joshua het ’n briefie van ’n skoolmaat ontvang waarin sy gesê het dat sy van hom hou en ’n “verhouding” met hom wou aanknoop. Hoewel hy aangetrokke tot haar gevoel het, het Joshua besef dat assosiasie met ’n ongelowige tot onsedelikheid kan lei en sy vriendskap met Jehovah kan benadeel. Daarom het hy sonder om doekies om te draai vir haar gesê dat hy nie belangstel nie! Toe hy later vir sy ma vertel hoe hy die situasie hanteer het, het sy sonder om te dink, gesê: “O, Joshua, jy het seker haar gevoelens seergemaak!” Joshua het geantwoord: “Maar, Ma. Ek maak haar eerder seer as wat ek Jehovah seermaak.” Sy godvrugtige vrees, sy vrees om sy hemelse Vriend te mishaag, het hom beweeg om opregte gedrag te handhaaf.

Soek goeie maats

’n Jeugdige met die naam Lynn was egter voortdurend in die moeilikheid. Die probleem? Sy was met die verkeerde groep deurmekaar (Exodus 23:2; 1 Korintiërs 15:33). Die oplossing? Sy moes nuwe vriende maak! “As jy vriende om jou het wat Jehovah liefhet”, het Lynn gesê, “help dit jou om ’n gevoelige gewete te behou en uit die moeilikheid te bly. Wanneer verkeerde dinge vir hulle afstootlik is, laat dit jou ook so voel.”

Trouens, jou slegte vriende kan die grootste struikelblok wees om ’n vriendskap met God te hê. Die agtienjarige Ann het erken: “Jou maats oefen ’n groot invloed uit. Vroeër of later sal jy soos hulle wees. Hulle vorm jou na hulle denke. Die gesprekke draai dalk hoofsaaklik om seks. Dit maak jou dalk nuuskierig. Jy wonder hoe dit sal wees.” Ann het dit deur bittere ervaring geleer. Sy sê: “Ek weet dit is waar. Ek het by onsedelikheid betrokke geraak, en op 15 was ek swanger.”

Ann het uiteindelik besef hoe waar die Bybel se woorde is: “Elkeen dan wat ’n vriend van die wêreld wil wees, maak homself ’n vyand van God” (Jakobus 4:4). Ja, Ann wou ’n vriend van die wêreld wees—sy was vasbeslote om een te wees. Maar dit het net tot die een hartseer na die ander gelei. Gelukkig het Ann weer tot haar sinne gekom. Sy het diep berou oor haar lewenswandel gehad en na haar ouers en die ouer manne in die gemeente gegaan vir hulp. Sy het ook nuwe vriende gemaak (Psalm 111:1). Met groot inspanning van haar kant af was dit weer vir Ann moontlik om ’n vriend van God te wees. Nou, na ’n hele paar jaar, sê sy: “My verhouding met Jehovah is baie hegter.”

Deur persoonlike studie van die Bybel, bepeinsing, opregte gedrag en heilsame assosiasie kan jy ook ’n hegte vriendskap met God aankweek. Om daardie vriendskap te behou, is egter ’n ander saak. Hoe is dit moontlik om dit te doen ondanks probleme en persoonlike swakhede? ’n Toekomstige artikel in hierdie reeks sal hierdie saak bespreek.

[Voetnote]

[Prent op bladsy 13]

Sal my maats my help om God se vriend te wees?