Streekbyeenkomste word ondanks teenstand in roemenië gehou
REËLINGS was getref om vanaf 19 tot 21 Julie 1996 ’n internasionale “Boodskappers van Goddelike Vrede”-Byeenkoms van Jehovah se Getuies in Boekarest, Roemenië, te hou. Ongeveer 40 000 byeenkomsgangers, waaronder duisende uit die buiteland, het beplan om hierdie pragtige Europese hoofstad met sy tweemiljoen inwoners te besoek. Die Nasionale Stadion, met sitplek vir 60 000 mense, is vir die geleentheid bespreek. Maar toe, op 24 Junie, het misleide Roemeense amptenare toestemming geweier om die byeenkoms te hou.
Getuies van Jehovah het hard probeer om die bevel om hulle byeenkoms te kanselleer te laat terugtrek, maar dit was tevergeefs. Reëlings moes dus verander word sodat die paar duisend buitelandse afgevaardigdes wat van ’n aantal Europese lande, Noord-Amerika en Japan genooi is die byeenkoms vanaf 12 tot 14 Julie in Boedapest, Hongarye, kon bywoon. Die laat veranderinge het aansienlike onkoste, ongerief en teleurstelling vir baie tot gevolg gehad.
Maar wat kon vir die plaaslike Roemeense byeenkomsgangers gereël word? Amptenare van die stede Cluj-Napoca en Brasov is genader, en uiteindelik kon byeenkomste vanaf 19 tot 21 Julie daar gehou word. Baie Roemene kon egter nie by Cluj-Napoca of Brasov uitkom nie. Nog twee byeenkomste is dus vanaf 13 tot 15 September gehou, die een in Baia Mare en die ander in Boekarest.
Waarom is die eerste byeenkoms in Boekarest gekanselleer? En wat het daartoe aanleiding gegee dat sommige amptenare later hulle beskouing verander het sodat byeenkomste wel in Roemenië gehou is, waaronder ’n byeenkoms in Boekarest?
Wie het agter die teenstand gesit?
Gedurende die internasionale byeenkoms in Boedapest het die Hongaarse koerant Színes Vasárnap aangaande Jehovah se Getuies gesê: “Jehovah se Getuies het oorspronklik beplan om hulle jaarlikse internasionale vergadering in Boekarest te hou, maar as gevolg van teenstand van Ortodokse Christene het die Roemeense amptenare hulle nie toestemming gegee om dit te doen nie.” Dit het alom bekend geraak dat die kerk agter die teenstand gesit het. Times Union, ’n koerant van Albany, New York, VSA, het byvoorbeeld berig: “Die Ortodokse patriarg Teoctist het Ortodokse gelowiges gewaarsku om op hulle hoede te wees teen die ‘ketterse’ opvattings van Jehovah se Getuies.”
Was die berigte oor geestelikes se teenkanting teen die byeenkoms waar? Wel, in Junie het inwoners van Boekarest regdeur die stad plakkate begin sien wat Jehovah se Getuies beswadder het—op kerkeiendom, op mure en aan die kante van geboue asook by ondergrondse spoorweë. Een met die titel “AAN ALLE ROEMENE!” het gevra: “Het Roemenië nou ’n internasionale Jehovistebyeenkoms nodig . . . 19-21 Julie? Christene—laat ons hierdie sataniese byeenkoms teëstaan!”
’n Ander plakkaat, met die opskrif “Let op die JEHOVISTIESE GEVAAR!” het beweer: “Jehovah se Getuies veg teen die Christelike geloof . . . Hulle probeer ons volk verdeel en godsdiensonenigheid veroorsaak. . . . ALLE ROEMENE, veg teen hierdie byeenkoms!”
“WEKROEP TOT OPTREDE” was die opskrif van nog ’n plakkaat. “Die Romeens-Ortodokse Broederskap . . . nooi alle Ortodokse gelowiges na ’n protesvergadering, wat op Sondag, 30 Junie, gehou sal word.” Die plakkaat het afgesluit: “Ons sal die owerhede vra om hierdie byeenkoms te kanselleer. KOM SODAT ONS ONS VOORVADERS SE GELOOF KAN VERDEDIG. Mag God met ons wees!”
Die geestelikes het selfs ’n traktaat uitgegee en versprei wat beweer het dat Jehovah se Getuies “’n politieke organisasie van ’n kommunistiese faksie” is. Maar dit is ook ’n infame leuen, en die meeste Roemene is dalk deeglik bewus hiervan. Hulle weet dat Jehovah se Getuies in onlangse jare deur die Kommuniste vervolg en dikwels in die tronk gegooi is.
Hoe gesindhede beïnvloed is
Stemme binne sowel as buite Roemenië is vinnig gehoor om die aanvalle teë te werk wat deur die kerk aangestig is, en regeringsamptenare kon sien dat dit nie meer as reg is nie dat dieselfde voorregte wat aan ander toegestaan is ook aan die Getuies toegestaan moes word. Die Flagrant, ’n koerant van Boekarest, het voorspel: “Die vloed van teenspoed, vyandigheid en haatdraendheid teen hierdie eerste internasionale byeenkoms sal ’n teenstrydige uitwerking hê. In plaas van mense van die Getuies af weg te keer, sal die optrede hulle belangstelling, nuuskierigheid, verdraagsaamheid en simpatie wek.”
Hoe waar was hierdie voorspelling tog! Talle lede van die Ortodokse Kerk het na die takkantoor van Jehovah se Getuies in Boekarest geskryf of hulle geskakel om hulle verontwaardiging uit te spreek oor die optrede van hulle geestelikes. Ingeligte mense weet dat Jehovah se Getuies glad nie is soos die Ortodokse Kerk in Roemenië hulle probeer uitbeeld het nie.
Marius Milla, wat in die Roemeense koerant Timishoara, van 6 Julie 1996, geskryf het, het gesê: “Ek is daarvan oortuig dat 99 persent van die mense wat die Jehoviste so driftig beskuldig het nie genoeg belanggestel het om met hulle te praat of om een van hulle vergaderinge by te woon nie.” Hy het bygevoeg: “Dit sal baie opbouender wees as ons, die Ortodokse gelowiges, meer besorgd is oor die balk in ons eie oog en die strooihalm in ons naaste se oog aan God se oordeel oorlaat.”—Matteus 7:3-5.
Toe het mnr. Milla die toespraak aangehaal wat die bekende eerste-eeuse regsgeleerde Gamaliël gelewer het aan die godsdiensleiers wat Jesus se volgelinge vervolg het: “Moet julle nie met hierdie manne bemoei nie, maar laat staan hulle (want as hierdie plan of hierdie werk uit mense is, sal dit te gronde gerig word; maar as dit uit God is, sal julle hulle nie te gronde kan rig nie); anders kan daar miskien bevind word dat julle eintlik teen God stry” (Handelinge 5:38, 39). Milla het ter opsomming geskryf: “Ons gesindheid is ondemokraties, onbybels en antisosiaal.”
Kort voor lank het kritiek teen die kansellering van die byeenkoms uit ander dele van Europa en uit die Verenigde State begin kom. Die Roemeense Helsinki-komitee het ’n persverklaring uitgereik wat “die openbare standpunt wat die patriarg Teoctist, die verteenwoordiger van die Roemeens-Ortodokse Kerk, teen ‘Jehovah se Getuies’ ingeneem het”, veroordeel het.
Hillary Clinton, vrou van die Amerikaanse president, was op daardie tydstip toevallig op besoek aan Roemenië. Die Amerikaanse ambassadeur in Roemenië, Alfred Moses, het verduidelik waarom sy nie in die 18de-eeuse Kretzulescu-kerk ingegaan het soos sy haar voorgeneem het nie: “Godsdiensvryheid is ’n beginsel wat volgens die Grondwet van die Verenigde State van Amerika, sowel as die Grondwet van Roemenië, bindend is. Die teenwoordigheid van plakkate op die kerk se eiendom wat op ’n gebrek aan godsdiensverdraagsaamheid dui, was nie in ooreenstemming met die gees van demokratiese pluralisme en met die doel van mev. Clinton se besoek aan Roemenië nie.”
Bewys van God se steun
Jehovah se Getuies het al vantevore byeenkomste in die stad Cluj-Napoca gehou, en amptenare daar het hulle weer verwelkom toe hulle die gebruik van die Nasionale Stadion in Boekarest geweier is. Maar die kontrak vir die stadion in Cluj-Napoca is eers ’n week voor die aanvang van die byeenkoms geteken. “Hoe is dit moontlik om so ’n groot byeenkoms in so ’n kort tydjie te reël?” wou ’n verslaggewer weet.
“Ons is ’n verenigde organisasie”, is daar vir hom gesê. “Ons is gewoond daaraan om byeenkomste te hou. Maar bowenal word ons deur Jehovah ons God gesteun.”
Dit was waarlik met Jehovah se hulp en ondersteuning dat soveel in so ’n kort tydjie verrig is. Stel jou voor dat meer as 20 000 mense op sulke kort kennisgewing drie dae lank byeenkom! Die opkomshoogtepunt was 22 004, en 799 is gedoop. Die koerant Adevărul de Cluj het ná die byeenkoms berig: “Hierdie mense wek die indruk dat hulle altyd glimlag en dat hulle heelhartig is in alles wat hulle doen. Hulle eensgesindheid was indrukwekkend . . . Hulle het voorbeeldige dissipline in hulle gedrag getoon, en hulle was besonder netjies.”
Wat in Brasov plaasgevind het, was veral indrukwekkend, aangesien goedkeuring om die byeenkoms te hou net ’n paar dae voordat die byeenkoms sou begin, gegee is! Tog is huisvesting vir 7500 mense in privaat wonings gevind. Toe een Getuie met sy bure gepraat het, het hulle 30 afgevaardigdes gehuisves. En ’n gemeente van Getuies in Brasov het 500 afgevaardigdes gehad wat by hulle tuisgegaan het. Van die afgevaardigdes het in tente naby die byeenkomsterrein gebly; en toe dit gereën het, het gasvrye mense in nabygeleë woonstelblokke afgekom en hulle na hulle woonstelle toe genooi.—Vergelyk Handelinge 28:2.
Daar is beperkings op die werk van Jehovah se Getuies in die oorwegend Ortodokse Bulgarye, wat aan die suide van Roemenië grens. Toe busse vol Bulgaarse Getuies na Boekarest afgesit het, het party doeanebeamptes blykbaar reeds geweet dat die byeenkomsterreine verander het. In Brasov het altesaam 1056 Bulgare die hele program in hulle eie taal geniet. Altesaam 12 862 het die byeenkoms in Brasov bygewoon, en 832—waarvan 66 Bulgare was—is gedoop.
In September kon kleiner byeenkomste in Baia Mare en Boekarest gereël word vir diegene wat nie na Cluj-Napoca en Brasov kon gaan nie. Daar was ’n gesamentlike bywoning van 5340 by hierdie twee addisionele byeenkomste, en 48 is gedoop. Verlede somer se “Boodskappers van Goddelike Vrede”-Streekbyeenkomste in Roemenië is dus deur altesaam 40 206 mense bygewoon, en 1679 is gedoop. Jehovah se seën rus sonder twyfel op diegene in Roemenië wat hom probeer dien!
’n Verteenwoordiger van Jehovah se Getuies in Boekarest het gesê: “In drie weke het ons publisiteit gekry wat gelykstaande is aan jare se getuieniswerk deur die hele land. Wat die Roemeens-Ortodokse Kerk gedink het ons sou stuit, het toe tot die bevordering van die goeie nuus gelei.”
[Prent op bladsy 24]
Boekarest is ’n pragtige, moderne stad
[Prente op bladsy 25]
Plakkate wat Jehovah se Getuies beswadder het
[Prent op bladsy 26]
Doopkandidate in Boekarest
[Prent op bladsy 26]
By Brasov, waar goedkeuring om die byeenkoms te hou net ’n paar dae voor die tyd gegee is
[Prent op bladsy 26]
’n Opkomshoogtepunt van 22 004 by die byeenkoms in Cluj-Napoca