Jehovah se Getuies in Oos-Europa

TOE die Berlynse Muur in November 1989 geval het, het Asiaweek berig dat “ongeveer 2 miljoen Oos-Duitsers in die twee dae nadat Oos-Berlyn die grens oopgestel het in die westelike helfte van hulle verdeelde land ingestroom het”. Wat het hulle gaan doen?

Diegene wat ryker was, het hulle kooplus gaan bevredig. Ander het hoofsaaklik na die winkels gaan kyk en hulle nuutgevonde vryheid gaan geniet. Talle het Jehovah se Getuies op die strate van Berlyn en ander stede teëgekom en het lektuur by hulle geneem. Sedertdien het sommige aan die Wagtoringgenootskap se takkantoor in Selters, naby Frankfurt am Main, geskryf en ’n paar merkwaardige opmerkings gemaak.

Een brief het gesê: “Toe ek Wes-Berlyn vir die eerste keer in my lewe besoek het, het ek op straat ’n eksemplaar van Die Wagtoring van Jehovah se Getuies present gekry. Sedertdien het ek weer begin om die Bybel te ondersoek, en al het ek regtig baie probleme is daar weer eens iemand wat my hoop en lewensvreugde gee. Ek sal baie bly wees as ek die boek Jou jeug—Hoe om dit ten beste te benut kan lees. Ek sal ook graag met Jehovah se Getuies in aanraking wil kom.”

’n Ander besoeker het geskryf: “Toe ek deur die tonnel na die hoofstasie in Neurenberg loop, het ’n dame my eksemplare van die Ontwaak! en Die Wagtoring gegee. Ek was verheug toe ek hulle gelees het. Ek gebruik nou al ’n paar dae lank weer elke dag die Bybel.”

Gedurende die somer van 1990 is streekbyeenkomste van Jehovah se Getuies in groot stede in die hele Oos-Europa gehou. Een byeenkoms wat deur Getuies uit baie lande, waaronder oostelike Duitsland, bygewoon is, is in die Olympia-stadion in wat destyds Wes-Berlyn was, gehou. Daar word geraam dat ongeveer 30000 van die 44 532 teenwoordiges uit oostelike Duitsland was. Die koerant Berliner Morgenpost het berig dat 1017 nuwe Getuies in die Olimpiese swembad gedoop is deur algehele onderdompeling in water, die metode waarvolgens “die deelnemers getrou bly aan die patroon van die eerste-eeuse Christene”.

Hoe het dinge in oostelike Duitsland verander? In Maart 1990 het die Oos-Duitse koerante die wettiging van Jehovah se Getuies aangekondig. Onder die titel “Jehovah se Getuies weer wettig”, het die Oos-Duitse koerant Mitteldeutsche Zeitung gesê: “Op 14 Maart het ’n verbod wat vier dekades lank geduur het tot ’n einde gekom. Duitse verteenwoordigers van Jehovah se Getuies kon op hierdie dag die gebou van die Staatsekretariaat vir Kerksake van die D[uitse] D[emokratiese] R[epubliek] verlaat met ’n amptelike dokument in hulle sak wat hulle geloofsgemeenskap weer die vrye beoefening van godsdiens binne die gebied van die DDR toelaat.”

’n Brief wat verlede lente van ’n Getuie in Leipzig ontvang is, vertel die volgende verhaal: “Ons het verlede week nog klein hoeveelhede geestelike voedsel in die geheim ingevoer. Nou [14 Maart 1990] is ons amptelik erken! Binnekort sal ons ’n vragmotor met vier ton lektuur aflaai!” Trouens, die eerste vragmotor na Oos-Duitsland was met 25 ton Bybellektuur gelaai, en binne die volgende twee maande, is nog 250 ton gestuur. Dit toon die geestelike honger van daardie Getuies wie se vryheid hulle meer as 40 jaar lank ontneem is!

As ons in aanmerking neem dat Nazisme (1933-45) sowel as Kommunisme probeer het om ’n einde te maak aan die werk van die Getuies in Duitsland is hulle ywerige bedrywighede in die hede en die verlede ’n uitstekende getuienis van hulle onkreukbaarheid en van God se seën op hulle.

Jehovah se Getuies in die Sowjetunie

In Desember 1989 het Mikhail Gorbatsjof in die Vatikaan met pous Johannes Paulus II samesprekinge gevoer. Die Sowjetkoerant Prawda het berig dat Gorbatsjof die volgende oor hierdie beraadslaging gesê het: “Ons het ’n diep en betekenisvolle gesprek gevoer. . . . Ons het gepraat oor godsdiens en tersaaklike ontwikkelinge wat besig is om in Europa, die wêreld en in die Sowjetunie plaas te vind.” L’Osservatore Romano, die amptelike Vatikaanse koerant, het berig dat mnr. Gorbatsjof die volgende in sy toespraak tot die pous gesê het: “Mense van baie godsdienste, onder andere Christene, Moslems, Jode en Boeddhiste, woon in die Sowjetunie. Hulle het almal ’n reg om hulle geestelike behoeftes te bevredig. Die Wet op Gewetensvryheid sal binnekort in ons land aangeneem word.”

Ooreenkomstig daardie belofte het die Sowjetparlement in September 1990 ’n wet goedgekeur wat gewetensvryheid toelaat. Artikel 3 van die wetsontwerp sê: “Elke burger neem, in harmonie met die reg op gewetensvryheid, sy eie besluit oor sy verhouding tot godsdiens, hy het die reg om enige godsdiens individueel of saam met ander te beoefen of om niks te beoefen nie, om oortuiginge wat betrekking het op sy verhouding tot godsdiens uit te druk en te versprei.”

Daar is duisende Getuies van Jehovah in die Sowjetunie wat uitsien na die beoefening van godsdiensvryheid. (Sien bladsy 22.) Meer as 17 000 afgevaardigdes uit die Sowjetunie, wat verteenwoordigend was van al die Getuies wat in die Sowjetunie versprei is, het die Russiese sessies van die “Suiwer Taal”-Streekbyeenkomste van 1990 in Warschau bygewoon. Hulle sien uit na die dag wanneer dit moontlik sal wees om byeenkomste in die Sowjetunie te hou.

Vooruitgang in Pole

Jehovah se Getuies is in Mei 1989 in Pole gewettig. Sedertdien is ’n takkantoor opgerig, en uitgebreide fasiliteite word naby Warschau gebou. Vantevore is honderde jong Getuies tronkstraf opgelê weens die kwessie van Christelike neutraliteit. Nou word hulle vrygestel van krygsdiens en straf as hulle ’n geskikte sertifikaat wys.

Die byeenkomste wat in 1989 en 1990 in Pole gehou is, was nog ’n groot aansporing vir die Getuies daar. ’n Berig sê dat die aantal bedrywige Getuies in Pole elke maand gedurende die afgelope jaar gestyg het, met ’n hoogtepunt van meer as 97 000. Pole sal binnekort die 12de land met meer as 100 000 Getuies wees.a Die herdenking van Christus se dood in April is deur 188 861 mense bygewoon.

Godsdiensvryheid in Roemenië

Getuies in Roemenië was verheug om te hoor dat hulle genootskap in April 1990 wetlik erken is. (Sien venster, bladsy 13.) Kringbyeenkomste is kort daarna dwarsdeur die land georganiseer, en meer as 44 000 was by een reeks teenwoordig, al was daar op daardie tydstip maar omtrent 19 000 Getuies in die land. Baie Roemene reageer ongetwyfeld op die Koninkryksboodskap.

Streekbyeenkomste wat in 1990 wêreldwyd die tema “Suiwer Taal” gehad het, is in die stede Brasov en Cluj-Napoca gehou. Die program is in Roemeens en Hongaars aangebied. Meer as 36 000 was teenwoordig en 1445 is gedoop.

Vanaf die nommer van 1 Januarie 1991 word Die Wagtoring in Roemeens saam met die Engels uitgegee en word dit in volle kleur gedruk.

In nabygeleë Bulgarye, waar die Oosters-Ortodokse godsdiens oorheersend is, het die Getuies nog nie wetlike erkenning verkry nie, maar hulle huur kamers vir hulle gemeentelike vergaderinge. Meer as tweehonderd het na Saloniki, Griekeland, gereis vir die “Suiwer Taal”-Streekbyeenkoms wat in Bulgaars en Grieks gehou is.

Goeie nuus uit Hongarye

Vir die Getuies in Hongarye was 27 Junie 1989 ’n geskiedkundige dag. Die koerant Magyar Nemzet het aangekondig: “Die Staatskantoor vir Kerksake het die godsdiensgenootskap van Jehovah se Getuies in Hongarye, volgens die wet ingevolge godsdiensvryheid, as ’n wetlik erkende godsdiens verklaar.” Die nuus is oor die radio en op die TV aangekondig. Hongare het uitgevind dat Jehova Tanúi (Jehovah se Getuies) uiteindelik wetlike erkenning vir hulle werk gekry het.

“Suiwer Taal”-Streekbyeenkomste is in Pecs, Miskolc, Debrecen en Boedapest gehou om die hoofstreke van die land te dek. Sowat 2000 Hongaarssprekendes het uit Tsjeggo-Slowakye en die Sowjetunie gekom. Om die internasionale eenheid van Jehovah se Getuies te onderstreep, het ’n groep van 700 besoekende afgevaardigdes uit Finland die byeenkomste bygewoon. Die totale bywoningsyfer in Hongarye was 21 568, waaronder daar meer as 2000 Roemeense afgevaardigdes was.

Sedert Januarie 1990 ontvang die Getuies in Hongarye gereeld hulle volkleurtydskrifte, wat vertaal word sodat dit saam met die Engelse oorspronklikes verskyn.

Vooruitgang in Tsjeggo-Slowakye

In hierdie pragtige land met sy ruwe berge en vrugbare vlaktes is Jehovah se Getuies besig om hulle bure te help om meer van die Bybel te leer. ’n Verslag oor hulle bedrywighede sê: “Die werk word openlik gedoen, en groot vergaderinge word gehou.”

Na die ingrypende veranderinge wat teen die einde van 1989 in Oos-Europa begin het, het die Getuies in Tsjeggo-Slowakye gou gespeel en ’n reeks kringbyeenkomste gedurende April tot Junie 1990 gereël. Gevolglik was daar, vir die eerste keer, positiewe persberigte oor die Getuies. Daar is tans meer as 21 000 Getuies in Tsjeggo-Slowakye, en in 1990 het 40 295 die herdenking van Christus se dood bygewoon. Meer as die helfte van die gemeentes het alreeds plekke gehuur waar hulle vergaderinge kan hou, en 12 gemeentes het selfs hulle eie Koninkryksaal.

’n Byeenkoms is in Augustus 1990 in Praag gehou, met ’n opkoms van 23 876, en 1824 is gedoop. Meer as 9500 Getuies het vrywillig meer as 58 000 uur aan skoonmaak- en verfwerk bestee om die stadion vir die byeenkoms op te knap. ’n Verteenwoordiger van die Tsjeggo-Slowaakse TV-diens het gesê: “Ons het baie sosiale geleenthede bygewoon, maar ons bewonder julle organisasie hier in die stadion. Ons kan skaars glo dat dit die eerste keer is dat julle so ’n samekoms reël.” ’n Besoeker het gesê: “Ek bewonder die geestelike atmosfeer, hartlike verhoudinge en liefde onder julle broers. Ek het as ’n vriend gekom; ek gaan as ’n selfs groter vriend.”

Die Wagtoring en die Ontwaak! word in volle kleur in Tsjeggies en Slowaaks gepubliseer, en Die Wagtoring word in albei tale gelyktydig met die Engels uitgegee. Wanneer ons terugdink aan die onderdrukkende situasie van net oor ’n jaar gelede, is dit merkwaardige veranderinge.

Toekomsverwagtinge

Wat is die verwagtinge vir die Getuies wat in lande preek waar die jonger geslagte grootgemaak is om in ateïsme te glo? ’n Verslag sê: “Daar is ’n groot duisternis wat die Bybel en God betref. Die positiewe kant is egter dat die mense nie verwar is deur valse godsdiensleerstellings waarvan hulle moet afstand doen nie. Dit lyk asof die oes groot gaan wees.”

Wat is dus die boodskap van die Bybel wat Jehovah se Getuies het om die mense van Oos-Europa aan te bied? Die volgende artikel sal antwoord.

[Voetnoot]

[Venster op bladsy 8, 9]

Godsdiensvryheid oplaas!

Die volgende is kommentare deur Getuies uit die voormalige Oos-Duitsland wat die “Suiwer Taal”-Streekbyeenkoms in Julie 1990 in Berlyn bygewoon het.

“My naam is Lydia. Ek is agt jaar oud en kom uit die DDR [Duitse Demokratiese Republiek]. Ek is baie bly dat ek hierdie streekbyeenkoms kan bywoon, want ’n jaar gelede was die grense nie oop nie. Ons moes die Gedenkmaal in die geheim vier. Hierdie keer is ons vry! Wanneer almal begin sing, loop die trane. Ek is so opgewonde dat ek by die skool eenvoudig daarvan sal moet praat!”

“Ons is vervul met dankbaarheid en waardering om, te midde van ’n internasionale broederskap, Jehovah se gaste hier in Berlyn te wees.”—Bernd.

“Dat DDR-broers ook op die program was, beklemtoon ’n spesiale aspek: Jehovah lei sy volk op en maak hulle bekwaam selfs wanneer hulle onder ’n verbod is.”—Gottfried.

“Die applous en die sang het getoon dat almal gelukkig was. Dit was ’n dawerende klank wat ’n mens innerlik oorweldig het. Hoe moes Jehovah hom tog verheug het!”—Egon.

“Na my doop het party broers gevra of die water nie baie koud was nie. Ek kon net antwoord dat ek nie weet nie. Die seën van Jehovah was so warm dat ek skaars die temperatuur van die water opgemerk het.”—Heidrun.

“Die atmosfeer in die slaapsale was onbeskryflik! Uit Denemarke, Mosambiek, Engeland, Kalifornië, Suid-Duitsland, Spanje, die DDR—ons almal het saam gesing, ons almal het die ‘suiwer taal’ gepraat.”—Jutta.

“Ons het altyd vir ons kinders vertel van die herinneringe aan die byeenkomste van 1958 en 1960 in Berlyn, die laaste wat ons kon bywoon. Maar wat ons nou ondervind het, het al ons herinneringe en verwagtinge oortref.”—Wolfgang.

“Wat ons die meeste beïndruk het, was toe duisende opgestaan het om te sing en Jehovah te loof, veral gedurende die slotlied en -gebed. Ons kon ons trane nie langer bedwing nie.”—Monika en Reinhard.

[Venster op bladsy 13]

“’n Onreg is reggestel”

’n Nuusberig is onder daardie titel in die Roemeense joernaal Tineretul liber (Vrye jeug) van 11 Augustus 1990 gepubliseer. Dit het gesê: “Ja, ’n onreg is reggestel. Die godsdiensorganisasie ‘Jehovah se Getuies’, wat baie smaad moes verduur en hulle onkreukbaarheid as navolgers van Christus meer as 40 jaar lank gehandhaaf het, is gewettig, en het die stigtingsakte van ’n wetlike entiteit verkry. Hierdie organisasie doen sy werk onder die toesig en magtiging van die Bestuursliggaam, as ’n wêreldwye organisasie wat bedrywig is in 210 lande en eilande.” Die berig het afgesluit deur die byeenkomste aan te kondig wat in Augustus in Brasov en Cluj-Napoca gehou sou word.

[Prente op bladsy 9]

Byeenkomsbedrywighede: (van links onder, regs om) nuwe brosjure word in Warschau aangebied; Hongaarse en Roemeense verhoog, Boedapest; aantekeninge word gemaak, Berlyn; stadion word voor die byeenkoms opgeknap, Praag

[Prente op bladsy 10]

Byeenkomsbedrywighede: (van links, regs om) doop, Roemenië; stadion, Praag; gesin met “Die mens se soeke na God”-boek in Berlyn; spreker in Boedapest; die Bybel word in Pole ondersoek