Van ons lesers
Karnavalfeeste Dankie vir die artikel “Die Bybelse beskouing: Karnavalfeesvieringe—Reg of verkeerd?” (8 Junie 1996). Ek woon in Brasilië, en die karnaval is hier ’n baie opwindende tyd. Ek was altyd baie lus om aan die feesvieringe deel te neem. Ek het geweet dat dit verkeerd sou wees, maar ek het nie werklik verstaan waarom nie. Hierdie artikel het egter duidelik getoon dat die karnaval swelgery insluit en dat God sulke vieringe beskou as “werke wat tot die duisternis behoort”.—Romeine 13:12.
F. M. M., Brasilië
Vakansie Baie dankie vir die reeks “Gaan jy met vakansie?—Dinge wat jy moet weet” (22 Junie 1996). Dit het net betyds gekom, want net ’n paar dae later het ons met vakansie gegaan. Die wenke was baie nuttig. Nogmaals dankie.
L. J., Verenigde State
Lyme-siekte Dankie vir die artikel “Lyme-siekte—Is jy in gevaar?” (22 Junie 1996). As ’n geneesheer het ek onlangs ’n hele paar pasiënte met hierdie siekte ondersoek, en ek kan die voorsorgmaatreëls wat julle gemeld het, onderskryf. In die meeste gevalle word pasiënte nie ernstig opgeneem nie en ly hulle ’n lang tyd. Ontwaak! het die artritis-soort bespreek wat algemeen in die Verenigde State voorkom. Twee ander patogene is in Europa ontdek wat nie deur tradisionele laboratoriumtoetse opgespoor kan word nie. Antibiotika is slegs in die vroeë stadiums van Lyme-siekte doeltreffend, en dikwels het dit later geen uitwerking nie.
I. S., Duitsland
As ’n Lyme-siekte-lyer het ek hierdie wonderlike artikel baie bemoedigend gevind. Ek hoop dat almal wat dit gelees het hierdie siekte ernstig sal opneem en al die nodige voorsorgmaatreëls sal tref.
D. P., Verenigde State
Leerprobleme Ek het die artikel “Jongmense vra . . . Waarom kan ek nie leer nie?” (22 Junie 1996) werklik waardeer. Ek sukkel op skool weens party van die redes wat in die artikel gemeld is. Ek gaan julle wenke toepas. Baie dankie.
R. C., Verenigde State
Ek het geheel en al belangstelling begin verloor om te leer en het nie by die skool gekonsentreer nie. Ek hoop om my leergewoontes te verbeter deur die wenke in die artikel toe te pas.
M. E. O., Uganda
Ek het nie enige leerprobleme nie, maar ek hou net nie daarvan om te leer nie. Ek sukkel ook om wiskundeformules te onthou. Wel, hierdie artikel het voorgestel dat ’n mens die woorde herhaal en uitspreek om probleme met korttermyngeheue te oorkom. Aanvanklik het ek gedink dat dit laf sou wees om hardop vir myself te lees, maar dit was pret om dit te doen!
N. I., Japan
Voortvlugtige Dankie dat julle die ondervinding gepubliseer het van Franck Mannino, met die titel “Ek was ’n voortvlugtige” (22 Junie 1996). Dit het my geraak en my laat verstaan hoe magtig en liefdevol ons Skepper, Jehovah, is. Ek dien hom al 30 jaar, en hierdie ondervinding het my aangemoedig om my bes in die predikingswerk te doen terwyl ek nog die vryheid het om dit te doen.
E. B., Italië
Die artikel het my gehelp om waardering te hê vir die voorreg om Christelike vergaderinge by te woon. My gebrek aan persoonlike organisasie veroorsaak dat ek gewoonlik laat is vir vergaderinge. Franck Mannino het min vryheid gehad terwyl hy in die tronk was, maar sy lewe was nogtans baie produktief.
D. W., Verenigde State
Die ywer wat Franck Mannino getoon het, selfs terwyl hy in die tronk opgesluit was, het my getref. Hoewel sy lewe ’n slegte begin gehad het, is hy nou ’n uitstekende voorbeeld.
C. R., Verenigde State