Van Ons Lesers

Verskille wat verdeel Ons wil ons dank uitspreek vir die reeks “Moet verskille ons verdeel?” (8 Julie 1996). Ons werk nou al ongeveer ’n jaar lank hier in Mexiko as deel van ’n span internasionale vrywilligers. Selfs ná ’n hele paar maande het ons nog steeds gesukkel om aan te pas, maar ons kon nie verstaan hoekom nie. Die artikels het ons gehelp om die probleem as kultuurskok te identifiseer. Ons het die gedagte dat ‘’n waardering vir ander kulture ons lewe kan verryk’ ter harte geneem, en ons vind reeds meer vreugde in ons toewysing.

C. H. en J. H., Mexiko

Ek is geraak deur die manier waarop hierdie treffende onderwerp aangebied en ontwikkel is. Verskille het inderdaad baie haat in die mensegeskiedenis meegebring. Hierdie reeks sal my nou help om met groter begrip na ander kulture te kyk. Ek wens almal in die wêreld kan hierdie artikels lees en hulle negatiewe beskouings van ander mense verander!

G. O., Nigerië

Die artikels het my laat huil. Ek het ’n vriendin met wie ek die meeste van die tyd oor die weg kom. Maar dit het nog altyd vir my gevoel of daar ’n onsigbare skeidsmuur tussen ons is. Ek besef nou dat ons uit totaal verskillende kulture kom. Hierdie inligting sal in die toekoms ’n groot verskil maak in my optrede teenoor haar.

A. F., Verenigde State

Terwyl ek navorsing gedoen het vir my kollegetesis oor antropologie, het ek ’n paar weke in ’n Afrikaland deurgebring. Ek het baie van die plaaslike Getuies van Jehovah ontmoet en hulle vergaderinge bygewoon. Dit was ’n fantastiese ondervinding! Dit is soos die artikel gesê het, dit verryk ons lewe om mense van ander kulture te leer ken. Ek het nuwe en betekenisvolle vriendskappe gesluit.

S. B., Italië

Habu Ek was baie beïndruk deur die artikel “Habu—’n Slang wat met ontsag behandel moet word” (8 Julie 1996). Dit is op so ’n interessante manier geskryf, en die foto’s was pragtig!

E. P., Oekraïne

Die artikel was leersaam en grappig. Maar een punt is strydig met wat ek geleer is. Julle het ’n boek aangehaal wat voorstel dat die gif by die bytplekke uitgesuig word. Is dit werklik veilig?

C. D., Nigerië

Dit wil voorkom of die meeste mediese gesaghebbendes nie saamstem met die bron wat ons in ons artikel aangehaal het nie. Trouens, sommige dokters meen dat ’n poging om die gif uit te suig gevaarlik kan wees vir die persoon wat die hulp verleen en van min waarde vir die persoon wat gebyt is. Dokters is dit eens dat die belangrikste noodhulp wat toegepas kan word, is om die slagoffer so gou moontlik by ’n hospitaal te kry.—RED.

VVV’s Dankie vir die artikel “Die Bybelse beskouing: VVV’s—Boodskappers van God af?” (8 Julie 1996). In ons gebied is daar mense wat berigte oor buiteaardse wesens glo. Omdat hulle dink dat die Bybel nie hierdie saak bespreek nie, het hulle twyfelgedagtes oor die Bybel. Die artikel het ons gehelp om te sien dat Satan en die demone mense probeer mislei en dat dit onverstandig sal wees om ongegronde berigte oor buiteaardse wesens te glo.

A. W., Taiwan

Tulpe Dankie vir die wonderlike artikel met die titel “Die tulp—’n blom met ’n stormagtige verlede” (8 Julie 1996). Ek het die inligting in verband met die herkoms daarvan asook die wenke oor hoe om tulpe te kweek baie interessant gevind.

D. G., Verenigde State