VVV’s—Kan hulle geïdentifiseer word?

Hoe verklaar wetenskaplikes VVV’s? Wyle dr. Donald H. Menzel, ’n Harvardsterrekundige, en Philip Klass, eertydse senior redakteur van Aviation Week, is onder diegene wat VVV-waarnemings bestudeer het. Hulle sê dat VVV’s in werklikheid BVV’s (bekende vlieënde voorwerpe) is. Wanneer ondersoek na VVV’s ingestel is, is daar vasgestel dat hulle identifiseerbare dinge of verskynsels is, soos weerballonne, nagreklamevliegtuie en -helikopters, meteore of bysonne.a

Philip Klass het verduidelik dat VVV’s natuurlike verskynsels of foutiewe identifiserings is. Volgens hom is daar byvoorbeeld vermoed dat party VVV’s ’n soort bolblits, of ’n plasma, is. Maar sy kritici het gou gesê dat plasmas, of hoogs geïoniseerde gasse, ’n baie kort lewensduur kan hê en nie ’n bevredigende oplossing vir die probleem bied nie. Hy sê dat sommige VVV’s wat op radarskerms gesien word artefakte van weersverskynsels is. Volgens sommige radaroperateurs hou hierdie verduideliking egter nie rekening met die oënskynlik intelligente gedrag wat soms waargeneem word nie. Klass meen dat mense wat skielik met ’n kort, onverwagte gebeurtenis te doen kry “heeltemal onakkuraat kan wees wanneer hulle probeer verduidelik presies wat hulle gesien het”.

In sy boek Pseudoscience and the Paranormal sê Terence Hines dat “sorgvuldige ondersoek gelei het tot eenvoudige natuurlike verklarings selfs vir VVV-beskrywings wat baie indrukwekkend geklink het. . . . Al hierdie gevalle toon duidelik dat ooggetuieverslae byna heeltemal onbetroubaar is. In ongeveer elke geval het die getuies se beskrywings aansienlik van die werklike stimulus verskil, maar die getuies het slegs in baie min gevalle opsetlik leuens vertel. Die feit dat hulle weet hoe VVV’s ‘veronderstel’ is om te lyk, asook die gevolg van optiese illusies, het hulle beskrywings beïnvloed.”

VVV’s—Onder beheer van wesens uit die ruimte?

’n Gewilde teorie is dat VVV’s moontlik met intelligente wesens uit die buitenste ruimte verband hou. Wyle dr. James McCampbell was ’n leier onder diegene wat tot hierdie slotsom gekom het. Hy het gewaarsku: “Dit lyk of ’n soort superintelligente vreemde wese inderdaad al hoe meer deel word van ons aarde se omgewing.” Majoor Donald E. Keyhoe, “’n afgetrede offisier van die Marinierskorps wat ’n vryskutskrywer geword het . . . het begin om VVV’s gewild te maak en beweer dat hulle buiteaardse lugvaartuie is”, volgens Philip Klass, skrywer van UFOs—The Public Deceived. Keyhoe het ook die teorie oor “wesens uit die ruimte” bevorder en gewaarsku: “As dit die vreemde wesens se doel is om Aarde toe te migreer, sal dit ’n vlaag van vrees en histerie aan die gang sit.”

Nog ’n konsep wat die belangstelling van sommige navorsers gewek het, is dat VVV’s hoër wesens is wat in ’n “parallelle heelal” woon. Volgens hierdie teorie kan hierdie wesens “die elektriese kringe van die menseverstand manipuleer”. Met hierdie vermoë kan hulle glo menseregerings beheer. Sommige sê hulle hou moontlik verband met “intelligente entiteite [wat betrokke is by] die wêreld se leidende godsdiensbewegings, wonderwerke, engele, spoke, feë, poltergeeste en so meer”.—UFO and The Limits of Science deur Ronald D. Story.

VVV’s—Kan ons hulle identifiseer?

Soos ons gesien het, is sommige navorsers taamlik seker dat hulle alle VVV’s as natuurlike dinge of bekende verskynsels kan identifiseer. Ander lê egter hulle eie spesiale teorieë voor.

Toe die Condon-verslag en VVV’s nog ’n saak van openbare belangstelling was, het die Ontwaak! ’n oorsig oor die onderwerp gegee, en party van die meer opsienbarende gevalle bespreek.b Die Ontwaak! het tot die slotsom gekom dat “die oorgrote meerderheid van al hierdie verslae hul oorsprong het in dieselfde soort dinge wat die “Blue Book”-projek opgenoem het: Planete, vliegtuie, ballonne, meteoriete, lugspieëlinge”.

Die artikel het voorts gesê: “Die deegliker ondersoek [wat in die Condon-verslag opgeteken is] het die rol wat natuurlike en sielkundige verdraaiing speel, opgeklaar. Dit het verduidelik hoe doodgewone voorwerpe, wat in die lug gesien is deur mense wat hulle nie in die miskien ongewone omstandighede herken het nie, in die begrip verkeerd voorgestel kan word, in die oorvertel vergroot kan word, in die koerante nog verder oordryf kan word, en uiteindelik ruimtetuie wat klein groen mannetjies van Mars af aanbring, kan word.”

Die amptelike Condon-verslag en gevolgtrekkings soos hierbo, wat gepaard gaan met minder VVV-aanmeldings, het blykbaar die saak vir baie geëindig. Ons vind nietemin dat die publiek twee dekades later steeds in VVV’s belangstel. Soos ons eerste artikel gemeld het, het ’n skrywer van ’n bekende tydskrif gesê dat ’n nuwe element bygekom het. Ons lewe teen ’n agtergrond van “diepgewortelde en apokaliptiese vrese” terwyl ons die jaar 2000 tegemoetgaan.

Selfs groter onsekerheid het ontstaan vanweë onlangse bewerings dat die Verenigde State en selfs ander regerings in die verlede van die getuienis oor VVV’s geïgnoreer of verdoesel het. Die skrywer van ’n publikasie wat in 1988 verskyn het, het die Wet op Vryheid van Inligting, wat in 1966 in die Verenigde State saam met bronne in ander lande ingestel is, benut om inligting te versamel wat volgens hom “sonder twyfel bewys dat daar ’n enorme verdoeseling van die onderwerp van VVV’s was”.—Above Top Secret deur Timothy Good.

In sy boek Light Years vra Gary Kinder watter getuienis nodig is om die owerhede te oortuig dat VVV’s wel bestaan. Hy sê dat een waarnemer vra: “Wat lewer bewys [van VVV’s]? Moet ’n VVV by die Rivieringang van die Pentagon, naby die Gesamentlike stafhoofde se kantore, land? Of is dit bewys wanneer ’n oppervlakradarstasie ’n VVV opspoor, ’n straler stuur om dit te onderskep, die straler se vlieënier dit sien en dit op sy radarskerm verskyn en die VVV dan eenvoudig teen ’n fenomenale snelheid wegjaag?”

Hierteenoor voer professor Hines aan dat die 997 bladsye van dokumente wat tussen 1949 en 1979 vrygestel is, nie toon dat die regering probeer om die saak te verdoesel nie. Hy sê: “’n Studie van die geheime CIA-verslae en -dokumente oor VVV’s wek die indruk van ’n agentskap wat redelik belangstel in die verskynsel maar skepties staan teenoor die hipotese oor buiteaardse wesens. Hierdie dokumente . . . weerspreek ook die herhaaldelike bewerings dat die regering die ‘waarheid’ oor VVV’s verdoesel.”

Een van die belangrikste redes vir die gebrek aan getuienis is dat geen VVV ooit in die openbaar ten toon gestel is of dat geen buiteaardse wesens ooit in die openbaar verskyn het nie. Professor Hines sê voorts dat “daar geen foto van ’n VVV is wat as eg beskou kan word en wat enigiets meer as vae vorms of ligkolle op het nie”. Deskundiges het VVV’s al keer op keer geïdentifiseer as waarnemings van Venus of van ander hemelliggame wat foutief vertolk is. Dit is duidelik dat geen oplossing vir die probleem van VVV’s almal tevrede gestel het nie.

Toe die Condon-verslag in die nuus was, het ’n Ontwaak!-medewerker van die resultate privaat bespreek met een van die betrokke wetenskaplikes wat by Boulder, Colorado, gewerk het. Die wetenskaplike het gedink dat baie van die VVV-waarnemings in die onverklaarde gevalle die een of ander soort “geesteswaarneming” was. Hoewel baie VVV-waarnemings dus wetenskaplik verklaar kan word as fisiese dinge of foutiewe identifiserings, kan sommige geestes- of sielkundige gewaarwordings of waarnemings wees.

Het dit met die okkulte te doen?

Wanneer die geestes- of sielkundige gewaarwordings hersien word van sommige wat beweer het dat hulle kontak met VVV’s gehad het, is dit ook moontlik om ooreenkomste met spiritistiese of ander paranormale verskynsels te sien. Een voorbeeld hiervan is die getuienis van John H. Andrews in sy boek The Extraterrestrials and Their Reality. In sy dankbetuigings vir die hulp om sy boek te skryf, sê hy: “Ek is ook baie dank verskuldig aan die vier ruimtemense [“buiteaardse wesens in fisiese menseliggame wat ongemerk tussen ons rondbeweeg”] wat my hulle verhale vertel het en wat graag anoniem wil bly, aan die talle spiritiste en mediums wat my met al my eksperimente gehelp het, aan die buiteaardse wesens vir hulle talle insiggewende boodskappe.” Van hierdie “ruimtemense” sê hy: “Hulle was almal taamlik intelligent; almal was mediums vir onsigbare wesens.”—Vergelyk 1 Samuel 28:7, 8; Efesiërs 6:12.

Andrews beweer ook dat hy boodskappe van buiteaardse wesens ontvang het. Hy sê sommige was: “Daar is nie so iets soos die dood nie. . . . Daar is nie so iets soos goed of kwaad nie. [Vergelyk Genesis 3:3, 4.] . . . Skepping, evolusie en reïnkarnasie is gegronde prosesse wat in die Heelal aan die gang is. . . . Ons (die buiteaardse wesens) is nie hier om julle te beheer of julle te regeer nie, maar om julle te lei. . . . Die Aarde sal binnekort geweldige, rampspoedige veranderinge ondergaan. Wanneer hierdie veranderinge plaasgevind het, sal minder as 1/1000 van die huidige bevolking nog lewe!”

Die Bybel praat ook van buiteaardse wesens, geesskepsele, soos gehoorsame engele en ongehoorsame, opstandige engele wat demone geword het. God het deur die Bybelgeskiedenis heen dikwels getroue engele gebruik om met mense te kommunikeer (Genesis 22:9-18; Jesaja 6:1-7). Satan gebruik steeds sy demonvolgelinge om die mens se aandag deur middel van allerhande filosofieë, giere, boodskappe, mededelings en kultusse af te trek van die boodskap dat God se Koninkryk, sy hemelse regering, binnekort oor ’n herstelde aarde sal regeer.—Vergelyk Lukas 4:33, 34; Jakobus 2:19; Openbaring 12:9; 21:1-4.

Die Christenapostel Paulus het paslike raad gegee oor demoninvloed in die laaste dae toe hy geskryf het: “Die Gees sê uitdruklik dat in die laaste tye sommige van die geloof afvallig sal word en verleidende geeste en leringe van duiwels sal aanhang.”—1 Timotheüs 4:1.

As ’n mens in gedagte hou hoe diep ons in hierdie apokaliptiese dae is, sal dit nie raadsaam wees vir Christene om hulle kosbare tyd daaraan te bestee om sake soos hierdie uitvoerig te ondersoek nie. Ons moet eerder belangstel in die belangriker uitdaging wat voorlê, dit wil sê, ons moet die bevel van die buiteaardse heilige engel gehoorsaam wat uitgeroep het: “Vrees God en gee Hom heerlikheid, want die uur van sy oordeel het gekom; en aanbid Hom wat die hemel en die aarde en die see en die waterfonteine gemaak het.”—Openbaring 14:6, 7.

[Voetnoot]

[Venster op bladsy 10]

VVV’s—Die wetenskaplike beskouing

“Sterrekunde en VVV’s hou met mekaar verband: as mense meer van sterrekunde weet, sal daar baie minder VVV’s gesien word.”—Astronomy, Desember 1988.

“Venus is die helderste van al die planete aan die naghemel en is die oorsaak van meer VVV-rapporterings as enige ander enkele voorwerp. . . .

“Moderne radartoestelle by lughawens identifiseer nou outomaties alle lugvaartuie in hulle gebied . . . Noudat radartoestelle beter ontwikkel is om lugvaartuie reg te identifiseer en bronne van vergissing uit te skakel, het dit die aantal radaropsporings van VVV’s byna op nul gebring. As VVV’s werklik bestaan het, sou ’n mens natuurlik verwag dat . . . daar meer VVV’s op moderne radarskerms gesien moet word. . . .

“Tydens byna veertig jaar van navorsing is daar nie een betroubare foto van ’n VVV geneem en geen egte oorblyfsels of ander fisiese bewysstukke gevind nie. Daar word jaar na jaar indrukwekkende waarnemings aangemeld, en jaar na jaar verdwyn hulle in die newels van foutiewe waarnemings, foutiewe identifiserings en bedrog wanneer hulle deeglik ondersoek word.”—Pseudoscience and the Paranormal deur Terence Hines.

“Baie van die probleme ontstaan vanweë die feit dat ’n byna eindelose verskeidenheid vreemde vertonings en voorwerpe aan die hemel gesien word, waarvan een mens in ’n leeftyd waarskynlik net ’n paar sal teëkom. En wanneer dit wel gebeur, kan hy verkeerdelik dink dat hy iets buitengewoons—pleks van iets onbekends—gesien het. . . .

“Dit gebeur selde dat soveel bedrog, histerie, liggelowigheid, godsdienswaansin, onbevoegdheid en die meeste van die ander onvleiende menslike eienskappe by een onderwerp betrokke is.”—The Promise of Space deur Arthur C. Clarke.

“Ek sal graag wil sien dat hierdie diepsinnige woorde op die drumpel van alle tempels van die wetenskap geskryf word: ‘Die grootste versteuring van die verstand is om aan iets te glo omdat ’n mens wens dat dit so was.’”—Louis Pasteur, 19de-eeuse Franse wetenskaplike.

[Prent op bladsy 8]

Nagreklameballonne, vliegtuie en helikopters kan, na gelang van die hoek waaruit dit gesien word, verkeerdelik vir VVV’s aangesien word

[Erkenning]

Nite Sign, Inc.