Watter godsdiens word deur God goedgekeur?

ONGELUKKIG het die godsdienshaat wat in die 16de eeu in Frankryk geheers het, nie verdwyn nie. In die volgende eeu het diepgewortelde vooroordele Europa aan stukke geskeur toe Katolieke en Protestante hulle gedurende die Dertigjarige Oorlog (1618-48) weer tot die slagveld gewend het. In die naam van God het verklaarde Christene mekaar weer eens wreed vermoor.

Godsdienshaat en -moord het nog nie opgehou nie. Katolieke en Protestante het mekaar onlangs in Ierland vermoor, en lede van die Ortodokse en Rooms-Katolieke godsdienste in die gebied van die voormalige Joego-Slawië het dieselfde gedoen. En so ongelooflik as wat dit mag klink, het beide Katolieke en Protestante gedurende die Eerste en die Tweede Wêreldoorlog honderdduisende lede van hulle eie godsdienste op die slagveld doodgemaak. Kan hierdie bloedvergieting geregverdig word? Wat is God se beskouing daarvan?

Pogings tot regverdiging

Die 1995 Britannica Book of the Year sê: “In 1994 het verskeie groepe teologiese regverdigings vir geweld probeer gee.” Meer as 1500 jaar gelede het die Katolieke filosoof “Sint” Augustinus ’n soortgelyke poging aangewend om bloedvergieting te regverdig. Volgens die New Catholic Encyclopedia “was [hy] die vader van die teorie van geregverdigde oorlog”, en die ensiklopedie sê dat sy denke ‘selfs in moderne tye ’n invloed uitoefen’.

Die Katolieke, Ortodokse en Protestantse kerke het bloedvergieting in die naam van God vergoelik, en selfs bevorder. Hoewel die geskiedenis van hierdie godsdienste bloedig is, lyk dié van baie ander vername godsdienste regoor die wêreld nie veel beter nie. Hoe kan jy dan die mense wat ware aanbidding beoefen, uitken?

Nie deur bloot te luister na wat hulle bely hulle glo nie. Jesus Christus het aangaande hierdie saak gewaarsku: “Pas op vir die valse profete wat na julle toe kom, vermom as skape, maar van binne is hulle roofsugtige wolwe. Aan hulle vrugte sal julle hulle ken. . . . ’n Goeie boom bring goeie vrugte voort, maar ’n slegte boom slegte vrugte. . . . Enige boom wat nie goeie vrugte voortbring nie, word uitgekap en in die vuur gegooi.” (Ons kursiveer.)—Matteus 7:15-20, The New Jerusalem Bible.

Geken aan hulle vrugte

Miljoene eerlike mense sien dat die wêreld se godsdienste ‘slegte bome’ is wat “slegte vrugte” voortgebring het, veral deur bloedige oorloë te bevorder. In die Bybel word die wêreldryk van valse godsdiens beskryf as ’n geestelike hoer, wat “Babilon die Grote” genoem word. Die Bybel sê dat daar “in haar . . . die bloed van profete en van heiliges gevind [is], en van almal wat op die aarde doodgemaak is”.—Openbaring 17:3-6; 18:24.

God keur nie die oorloë goed wat deur godsdiensleiers geseën word nie; inteendeel, hy gaan binnekort oordeel voltrek aan daardie godsdienste wat in sy naam gemoor het. Hy sal dit doen ter vervulling van die Bybelprofesie wat sê: “Babilon, die groot stad, [sal] met ’n vaart neergeslinger word, en sy sal nooit weer gevind word nie.” Wanneer daardie blye gebeurtenis plaasvind, sal God ‘oordeel aan die groot hoer voltrek het’ en “die bloed van sy slawe op haar hand gewreek” het.—Openbaring 18:21; 19:2.

Mense wat ’n afkeer het van al die bloedvergieting wat in die naam van God gedoen is, wonder dalk of daar Christene is wat werklik in ooreenstemming met die Bybelprofesie lewe: “Hulle sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie” (Jesaja 2:4). Weet jy van ’n waarlik godvresende groep mense wat nie meer oorlog voer nie?

Die godsdiens wat deur God goedgekeur word

’n Sosiologiese studie met die titel “Meer omtrent die regverdiging van geweld”, uitgegee deur die Universiteit van Michigan, het gesê: “Sedert die eeuwisseling het Jehovah se Getuies konsekwent hulle standpunt van nie-gewelddadige ‘Christelike Neutraliteit’ tydens twee groot wêreldoorloë en die daaropvolgende militêre botsings van die ‘Koue Oorlog’-tydperk gehandhaaf.” Die studie het die rede vir die Getuies se neutraliteit geïdentifiseer deur te sê: “Die leringe van Jehovah se Getuies spruit voort uit hulle oortuiging dat die Bybel die geïnspireerde woord van God is.”

Ja, Jehovah se Getuies lewe volgens die Bybel, wat sê: “Die kinders van God en die kinders van die Duiwel word aan hierdie feit geken: elkeen wat nie regverdigheid bedryf nie, het nie sy oorsprong by God nie, ook nie hy wat sy broer nie liefhet nie. . . . Ons [moet] liefde vir mekaar . . . hê; nie soos Kain, wat . . . sy broer doodgemaak het nie.”—1 Johannes 3:10-12.

Jehovah se Getuies het al dikwels mense se aandag gevestig op die bloedskuld van die wêreld se godsdienste. Hulle het ook die dringende pleidooi in die Bybel herhaal: “Gaan uit haar [Babilon die Grote] uit, my volk, as julle nie met haar in haar sondes wil deel nie, en as julle nie ’n deel van haar plae wil ontvang nie. Want haar sondes het tot aan die hemel opgehoop en God het haar ongeregtighede in herinnering gebring.”—Openbaring 18:4, 5.

Talle opregte mense gee ag op die oproep om weg te breek van die wêreldryk van valse godsdiens. As jy diep geskok is oor al die moord wat in die naam van godsdiens gepleeg word, nooi ons jou om in aanraking te kom met die persoon wat hierdie tydskrif vir jou gegee het of om na een van die adresse op bladsy 5 te skryf. Jehovah se Getuies sal jou met graagte help om te leer van die Bybel se belofte van ’n nuwe wêreld van regverdigheid, waar daar nie meer oorlog sal wees nie.—Psalm 46:9, 10; 2 Petrus 3:13.

[Prent op bladsy 10]

“Hulle verkondig in die openbaar dat hulle god ken, maar hulle verloën hom deur hulle werke.” Titus 1:16