Lei alle godsdienste na dieselfde God?
“Ek het my eie oortuigings, en ek gaan dit nie verander nie. Dit maak in elk geval nie saak aan watter geloof jy behoort nie, want alle godsdienste lei na dieselfde God.”
HET jy al ooit iemand hierdie mening hoor uitspreek? Baie mense het die beskouing dat alle godsdienste ewe aanvaarbare maniere bied om God te vind en om die betekenis van die lewe te verstaan. Net so algemeen is die oortuiging dat daar in elke godsdiens goed en sleg is en dat geen enkele geloof alleenreg op die waarheid het of kan beweer dat dit die enigste weg na God is nie.
Sulke idees is gewild in vandag se sogenaamde verdraagsame of pluralistiese samelewing. Trouens, diegene wat nie hierdie siening het nie, word dikwels beskou as bekrompe, selfs bevooroordeeld. Wat dink jy? Dink jy dat alle godsdienste uiteindelik na dieselfde God lei? Maak dit saak aan watter geloof iemand behoort?
Is daar werklike verskille?
Volgens een ensiklopedie is daar wêreldwyd tans 9 900 godsdienste, waarvan party regoor die wêreld voorkom en miljoene lede het. Volgens ramings behoort sowat 70 persent van die mensdom aan die vyf vernaamste godsdienste—Boeddhisme, die Christelike godsdiens, Hindoeïsme, Islam en Judaïsme. As alle godsdienste na dieselfde God lei, behoort hierdie vyf gelowe tog sekerlik baie dinge in gemeen te hê wat hulle leringe, hulle uitbeelding van God en hulle verduideliking van God se voorneme betref. Wat toon die feite?
Die Rooms-Katolieke teoloog Hans Küng sê dat die vernaamste godsdienste wel basiese leerstellings in gemeen het wanneer dit by menseverhoudings kom. Die meeste keur byvoorbeeld moord, leuens, diefstal en bloedskande af, en hulle leer hulle volgelinge respek vir ouers asook liefde vir kinders. Maar in ander sake, en veral in die manier waarop hulle God uitbeeld, verskil hierdie vername godsdienste aansienlik.
Byvoorbeeld, Hindoes aanbid ’n menigte gode, terwyl Boeddhiste blykbaar onseker is of daar ’n persoonlike God is. Die Islam leer dat daar een God is. So ook die kerke wat beweer dat hulle Christelik is, maar die meeste van hulle sê ook dat God ’n Drie-eenheid is. Selfs onder die kerke is daar ’n wye verskeidenheid dogmas. Maria, die moeder van Jesus, word deur Katolieke vereer, maar nie deur Protestante nie. Geboortebeperking is oor die algemeen vir Katolieke verbode, maar nie vir die meeste Protestante nie. En Protestante kan nie onder mekaar saamstem oor die onderwerp van homoseksualiteit nie.
Is dit logies om te dink dat godsdienste wat so ’n wye verskeidenheid oortuigings het, almal dieselfde God kan aanbid? Hoegenaamd nie. Inteendeel, dit kan net verwarring veroorsaak oor wie God is en wat hy van diegene verwag wat hom aanbid.
Verenig hulle of veroorsaak hulle verdeeldheid?
As alle gelowe na dieselfde God lei, sou ons tog sekerlik kon sien dat elkeen van hulle sy invloed gebruik om die mensdom in vrede te verenig. Wat toon die feite? Die geskiedenis bewys dat godsdiens ’n bron van verdeeldheid en twis is pleks dat dit die mensdom verenig. Kom ons kyk na ’n paar voorbeelde.
Van die 11de tot die 13de eeu het die Christendom, dit wil sê die nasies wat beweer dat hulle Christelik is, in ’n reeks Kruistogte teen Islamitiese magte oorlog gemaak. In 17de-eeuse Europa het Katolieke en Protestante in die Dertigjarige Oorlog swaarde gekruis. In 1947, net toe die Indiese subkontinent onafhanklikheid verkry het van Groot-Brittanje, het Hindoes en Moslems mekaar aan die keel gegryp. In onlangser tye was Katolieke en Protestante in Noord-Ierland in ’n jarelange konflik gewikkel. In die Midde-Ooste is daar steeds geen vrede tussen Jode en Moslems nie. En bo-aan die lys is ongetwyfeld die Tweede Wêreldoorlog, wat lede van al vyf die vernaamste godsdienste betrek het, sodat selfs lede van dieselfde geloof aan teenoorgestelde kante van die konflik geveg het.
Daar is net een gevolgtrekking. Die wêreld se godsdienste het nie vrede en eenheid gebring nie en het mense ook nie na dieselfde God gelei nie. Inteendeel, hulle het verdeeldheid onder die mensdom veroorsaak en ’n verwarrende beeld geskep van wie God is en hoe hy aanbid moet word. Daarom moet enigiemand wat na die ware God wil kom, goed besin oor die weg wat hy wil inslaan. Dit is in ooreenstemming met wat die Bybel, een van die oudste godsdiensboeke bekend aan die mens, ons aanspoor om te doen.
Kies vir julle wie julle sal dien
Die Bybel toon duidelik dat sorgvuldige oorweging en ’n doelbewuste keuse nodig is om die weg te vind wat na die ware God lei. Josua, ’n kneg van Jehovah God, het vir die eertydse nasie Israel gesê: “Kies dan vandag vir julle wie julle sal dien, hetsy die gode wat julle voorvaders gedien het wat aan die oorkant van die Rivier was, of die gode van die Amoriete in wie se land julle woon. Maar wat my en my huis betref, ons sal Jehovah dien.” Jare later het die profeet Elia die volk aangespoor om ’n soortgelyke keuse te maak: “Hoe lank sal julle op twee verskillende gedagtes hink? As Jehovah die ware God is, gaan volg hom; maar as dit Baäl [’n Kanaänitiese god] is, gaan volg hom.”—Josua 24:15, 16; 1 Konings 18:21.
Hierdie en ander Bybeltekste toon duidelik dat diegene wat die ware God wou dien, ’n bewuste keuse moes maak. Die situasie is vandag dieselfde. As ons die ware God wil aanbid en dien, moet ons ook die regte keuse maak. Maar wat kan ons help om hierdie keuse in sake van aanbidding te maak? Hoe kan ons die ware aanbidders identifiseer?
Ware aanbidders word aan hulle vrugte herken
Jesus Christus het aangaande ware en valse aanbidders vir sy volgelinge gesê: “Mense pluk nooit druiwe van dorings of vye van dissels nie, of hoe? Net so bring elke goeie boom goeie vrugte voort, maar elke slegte boom bring waardelose vrugte voort; ’n goeie boom kan nie waardelose vrugte dra nie, en ’n slegte boom kan ook nie goeie vrugte voortbring nie. . . . So sal julle daardie mense dan aan hulle vrugte herken.” Ware aanbidders sal dus aan hulle vrugte, of werke, herken word. Wat is hierdie vrugte?—Matteus 7:16-20.
Eerstens, ware aanbidding verenig gelowiges in liefde. Jesus het aan sy dissipels verduidelik: “Ek gee julle ’n nuwe gebod, dat julle mekaar moet liefhê; net soos ek julle liefgehad het, moet julle ook mekaar liefhê. Hieraan sal almal weet dat julle my dissipels is, as julle liefde onder mekaar het.” Ware volgelinge van Christus moet so ’n uitsonderlike liefde teenoor mekaar openbaar dat dit hulle in die oë van waarnemers as ware aanbidders identifiseer.—Johannes 13:34, 35.
Om hierdie rede sal dit vir ware Christene ondenkbaar wees om in oorlog wapens teen mekaar op te neem. Bly kerklidmate by hierdie standaard? In die Tweede Wêreldoorlog was Jehovah se Getuies die enigste vername godsdiensgroep wat deurgaans en onwrikbaar geweier het om die oorlogspoging op enige manier te ondersteun. Dr. Hanns Lilje, voormalige biskop van die Protestantse Kerk in Hannover, Duitsland, het oor die Getuies geskryf: “Hulle kan tereg daarop aanspraak maak dat hulle die enigste ware gewetensbeswaardes in die Derde Ryk was.” Gedurende daardie konflik het Getuies in baie lande verkies om eerder wrede vervolging te verduur as om die oorlog te bevorder of te ondersteun.
Watter ander vrugte het Jesus in gedagte gehad wat ware dissipels sou identifiseer? Jesus het die gebed wat algemeen bekend staan as die Onse Vader, ingelei deur te sê: “Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde.” Jesus het prioriteit gegee aan die heiliging van God se persoonlike naam, Jehovah. Hy het die begeerte uitgespreek dat Jehovah se wil deur middel van God se Koninkryk op aarde moet geskied. Watter godsdiens staan daarvoor bekend dat dit die naam Jehovah uitdra en dat dit God se Koninkryk as die mens se enigste hoop vir vrede op aarde verkondig? Jehovah se Getuies maak die goeie nuus van die Koninkryk in 236 lande en gebiede bekend, en versprei lektuur in meer as 470 tale.—Matteus 6:9, 10.
Jehovah se Getuies volg ook Jesus se voorbeeld om nie by politieke en sosiale geskille betrokke te raak nie. “Hulle [is] geen deel van die wêreld . . . nie, net soos ek geen deel van die wêreld is nie”, het Jesus van sy dissipels gesê. Daarbenewens aanvaar die Getuies die Bybel as God se Woord en is hulle oortuig dat “die hele Skrif . . . deur God geïnspireer en . . . nuttig [is] om te onderrig, om tereg te wys, om dinge reg te stel, om in regverdigheid te dissiplineer, sodat die mens van God volkome bevoeg kan wees, ten volle toegerus vir elke goeie werk”.—Johannes 17:14, 17; 2 Timoteus 3:16, 17.
Die ware godsdiens is anders
Hierdie vrugte—selfopofferende liefde, die begeerte om Jehovah se naam te heilig, die verkondiging van God se Koninkryk, afgeskeidenheid van die wêreld en geloof in die Bybel—is alles kenmerke van ware aanbidders. Weens hierdie vrugte verskil ware aanbidders ook van ander godsdienste. Een vrou wat etlike besprekings met Jehovah se Getuies gehad het, het haar eie gevolgtrekkings gemaak en gesê: “Ek ken baie godsdienste, en hulle is almal eenders. Julle is die enigste mense wat heeltemal van die ander verskil.”
Dit is duidelik dat alle godsdienste nie na dieselfde God lei nie. Maar daar is een groep wat opvallend anders is—Jehovah se Getuies, wat nou regoor die wêreld meer as sewemiljoen tel. Deur God se Woord, die Bybel, te verkondig en daarby te bly, het hulle gedoen wat geen ander groep of organisasie nog kon doen nie, naamlik om mense van uiteenlopende nasionaliteite, tale, etniese agtergronde en rasse in die aanbidding van die een ware God, Jehovah, te verenig. Hulle sal bly wees om jou te help om van die ware God te leer, uit te vind wat hy van jou vereis en die vrede en veiligheid te geniet wat daaruit voortspruit as jy God op die manier aanbid wat hy goedkeur. Is dit nie ’n doelwit wat die moeite werd is nie?
[Prent op bladsy 14]
Ortodokse priester seën nuwe troepe in die Oekraïne in 2004
[Erkenning]
GENIA SAVILOV/AFP/Getty Images
[Prent op bladsy 15]
Jehovah se Getuies help mense in alle wêrelddele om van God en sy Koninkryk te leer
[Foto-erkennings op bladsy 12]
Bladsy 12: Boeddhistevrou: © Yan Liao/Alamy; Hindoeheilige: © imagebroker/Alamy; bladsy 13: Man wat Koran lees: Mohamed Amin/Camerapix; Joodse man: Todd Bolen/Bible Places.com