Ons beskou die wêreld
Mense vlug uit stede na plase
’n Klein maar toenemende aantal Japannese, wat moeg is vir die spanning en dolle gejaag van ’n stedelike lewenswyse, verlaat die stad om op die plaas te gaan bly. Hoewel lewe op die platteland ’n eenvoudiger roetine in ’n natuurlike omgewing bied, word ’n pak klere nie sonder probleme vir ’n oorpak verruil nie. “Talle nuwe boere het vaste salarisse, die gerief van die stadslewe en moontlik die sosiale status as lid van ’n groot maatskappy prysgegee”, sê Asiaweek. Daarbenewens “erken plattelandse bekeerlinge dat hulle finansieel met minder moet klaarkom, en dat hulle soms gedwing word om hulle oesinkomste met nederige take aan te vul”. Maar vir diegene wat vasbeslote is om die verandering aan te bring, het die Departement van Landbou ’n Landbou-voorbereidingskool gestig om stadsjapies te help om met welslae by die plattelandse lewe aan te pas.
Kerk keur transseksuele bedienaar goed
In die Verenigde State het ’n Presbiteriaanse bedienaar toestemming ontvang om georden te bly nadat hy ’n geslagsveranderingsoperasie ondergaan het. Hierdie uitspraak is gelewer toe die 49-jarige Eric Swenson die kerkraad van Groter Atlanta (Georgia) gevra het om sy naam na Erin te verander nadat hy sy geslagsorgane chirurgies laat verwyder het. “Anne Sayre, die kerkraad se medewerker vir geregtigheid en vroue, het gesê dat die kerkraad ’n ‘baie moeilike stryd’ gehad het, maar besluit het dat hulle ‘geen teologiese of morele grondslag’ gehad het om hom sy ordening te ontneem nie”, sê The Christian Century. Maar Don Wade, ’n bedienaar wat teen Swenson se versoek gestem het, het gesê dat “daar geen ernstige bespreking van die teologiese geskille was nie”.
Koalavingerafdrukke soos dié van ’n mens
Die vingerafdrukke en voetspore van ’n koala kom verbasend ooreen met ’n mens se afdrukke, sê ’n Australiese wetenskaplike. Professor Maciej Henneberg, ’n bioloog en forensiese deskundige aan die Universiteit van Adelaide, sê: “Selfs die aftas-elektronemikroskoop kan nie die verskil bespeur nie.” Die ooreenkoms lê nie in die vorm van die koala se pote nie, maar in die dermatoglifiek daarvan—die patroon van die hobbels, riffies en windings op die kussinkies van sy voor- en agterpote. Daarbenewens is vinger- en toonafdrukke uniek aan individuele koalas, net soos in die geval van mense.
Word egskeiding aangeleer?
“Paartjies met geskeide ouers het ’n veel groter kans om te sien hoe hulle eie huwelik misluk as paartjies wie se ouers steeds getroud is”, sê The Sydney Morning Herald, van Australië. Professor Paul Amato, van die Universiteit van Nebraska, in die Verenigde State, “het oor ’n tydperk van 12 jaar met ongeveer 2000 getroude Amerikaners in aanraking gebly”, en het, volgens die koerant, gevind dat “kinders van geskeide ouers swak verhoudingsvaardighede en gedragspatrone kan ‘erf’, wat die kanse dat hulle eie huwelik op ’n egskeiding kan uitloop aansienlik vergroot”. Die Herald het gesê: “Wanneer albei huweliksmaats geskeide ouers het, is die kans dat hulle huwelik sal misluk 300 persent hoër as in die geval van paartjies waarvan albei se ouers nog bymekaar is.”
Verskoning ná 500 jaar
In 1496 het koning Manuel I van Portugal ’n bevel uitgevaardig aan Jode wat in sy gebied gewoon het: Bekeer julle tot Rooms-Katolisisme of verlaat die land. Ongeveer 500 jaar later, in 1988, het Portugal ’n amptelike verskoning aangebied. Portugal het onlangs, in ’n plegtige herdenking, versoening probeer bewerkstellig. Volgens ’n verslag deur Associated Press het die president van Portugal, Jorge Sampaio, in ’n toespraak in die parlement gesê dat die uitsetting ’n “bose daad met ernstige en rampspoedige gevolge” was. Die Minister van Justisie, José Eduardo Vera Jardim, het die uitsetting “’n swart deel van ons geskiedenis” genoem. Hy het bygevoeg dat die staat “morele vergoeding” aan die Jode verskuldig is vir die eeue van “onmenslike vervolging”. Hoewel Portugal se bevolking tans ongeveer 10 miljoen is, woon daar slegs ongeveer 1000 aktiewe Jode.
Pasop vir vervalste voorskrifmedisyne
Met ’n jaarlikse omset van ongeveer 75 miljard rand floreer die vervalstemedisyne-bedryf. Volgens die Paryse koerant Le Monde “skat die Wêreldgesondheidsorganisasie (WGO) dat ten minste 7 persent van die medisyne wat jaarliks wêreldwyd verkoop word vervals is”. In Brasilië kan die persentasie tot 30 persent wees, en in Afrika tot 60 persent. Vervalste medisyne kan wissel van swak namaaksels van die werklike produk tot heeltemal nuttelose of selfs giftige stowwe. Le Monde meld ’n voorbeeld van ’n meningitis-epidemie in Niger, waar duisende ingeënt is met wat hulle later uitgevind het net water was. En in Nigerië het 109 kinders gesterf toe hulle stroop gegee is wat ’n vriesweringsmiddel bevat het. “Selfs hospitale wend hulle dikwels tot die swartmark omdat dit produkte teen meer bekostigbare pryse bied”, sê die koerant. In baie lande is dit vir gesondheidsowerhede moeilik om ’n oplossing vir die probleem te vind weens swak en korrupte wetstoepassing.
Nog probleme met geestelikes
Ongeveer 40 Episkopaalse biskoppe het in November 1996 ’n verklaring onderteken waarin hulle ’n beroep op die kerk doen om “duidelike en bindende standaarde te voorsien wat die seksuele gedrag van geestelikes betref”, sê die tydskrif Christianity Today. Die kerk is geskud deur ’n aantal skandale waarby geestelikes betrokke was, iets wat volgens konserwatiewe Episkopale die gevolg is van ’n “versuim om kerkleerstellings oor seksualiteit duidelik te stel”. Die rektor van ’n Episkopaalse kerk in Brooklyn, New York, het byvoorbeeld bedank nadat hy erken het dat hy homoseksuele verhoudings gehad het. Todd Wetzel, die besturende direkteur van die Verenigde Episkopale, het gesê: “Die kerk is nie betrokke by net een skandaal nie. Dit is betrokke by baie, waarvan hierdie een die skokkendste is.” Die kerk het voorheen baie publisiteit ontvang toe dit die afgetrede biskop Walter Righter van kettery aangekla het omdat hy ’n aktiewe homoseksuele diaken georden het. Die aanklagtes is teruggetrek nadat ’n “Episkopaalse hof beslis het dat die kerk geen ‘kernleerstelling’ het wat geslagsomgang tot die huwelik beperk nie”.
Knoffelasem
Die regering van Taiwan het onlangs ’n paar slim maatreëls getref om ’n surplus aan knoffel te help verminder. Regeringsamptenare het die publiek aangemoedig om “meer knoffel te eet”, sê die South China Morning Post. ’n Taiwanese amptenaar op die Landbouraad, mnr. Koe Te-jeh, het verduidelik: “Ons het vanjaar eenvoudig te veel knoffel geplant.” In ’n poging om die verbruik van knoffel ’n stoot te gee, het die regering ’n boekie met knoffelresepte uitgegee. Mnr. Koe het egter toegegee dat daar nie van die “publiek verwag kan word om die hele probleem te sluk nie”, sê die koerant.
Sterilisasie van vroue neem toe
Gedurende die sestigerjare het die gemiddelde Brasiliaanse gesin 6,1 kinders per huisgesin gehad; vandag is die gemiddelde 2,5 kinders. Waarom die drastiese afname? Een rede, volgens ’n studie deur die Toegepaste Ekonomiese Navorsingsinstituut, is dat “40% van die getroude vroue [in Brasilië] gesteriliseer is”, sê Jornal do Brasil. Bowendien is dit die algemene neiging onder vroue om hulle op ’n vroeër ouderdom te laat steriliseer. Die gemiddelde ouderdom waarop ’n Brasiliaanse vrou byvoorbeeld tien jaar gelede gesteriliseer is, was 34; vandag is dit 29. Die studie het ook getoon dat die “meeste sterilisasies tydens ’n bevalling uitgevoer word”, veral wanneer ’n keisersnee gedoen word. In teenstelling hiermee het slegs 2,6 persent van Brasilië se mans hulle laat steriliseer.
Visoorloë
Aangesien te veel bote agter ’n afnemende voorraad vis aan is, “het hewige botsings tussen vissersvlote en plaaslike oorlogsvlote ontstaan”, sê U.S.News & World Report. In 1990 het die wêreld se vissersvloot toegeneem tot ongeveer driemiljoen vaartuie, byna twee keer soveel as in 1970. Daarbenewens het moderne visgerei, soos visopsporingsonar en reusesleepnette, die doeltreffendheid van vissers grootliks verhoog. “Die uiteindelike gevolg is dat regerings van kuslande in ’n eindelose stryd met vreemde vlote gewikkel is” in ’n poging om hulle afnemende visvoorraad te beskerm. Net gedurende die afgelope twee jaar het skermutselinge tussen mededingende vlote op die oop see die dood van agt vissers tot gevolg gehad.