Van ons lesers
Niersiekte Die artikel “‘Dis net tydelik!’—My lewe met niersiekte” (22 November 1996) het daarin geslaag om my en my man op ’n uiters kritieke tydstip aan te moedig. Soos die skrywer van die artikel, het my man met buikvliesdialise begin, en dit is nie maklik nie. Soms verval ons in wanhoop. Maar julle artikel was baie gerusstellend en het ons daaraan herinner dat nierversaking net tydelik is en binnekort saam met al die ander siektes deur God se Koninkryk uit die weg geruim gaan word.
V. Q., Italië
Toe ek van ’n man lees wat ten spyte van ’n lewenslange stryd teen siekte nooit sy gesin of sy aanbidding as vanselfsprekend aanvaar het nie, het my oë vol trane geskiet. Ek is ’n gesonde, 18-jarige voltydse evangeliedienaar en ek besef hoe dikwels ek my gesondheid as vanselfsprekend aanvaar. Dit was werklik bemoedigend om van Lee Cordaway se geloof en gesindheid te lees.
J. S., Verenigde State
Ek het in 1992, op 11-jarige ouderdom, uitgevind dat ek ’n niersiekte het, wat uiteindelik tot nierversaking gelei het. Ek moes dialisebehandeling ontvang. Ek is bly julle het die prosedure so goed verduidelik, want mense wonder altyd hoe dit werk. Dit het my en ook my vriende bemoedig toe ons lees dat die toestand wat ek vandag die hoof moet bied nie altyd hier sal wees nie.
A. H., Verenigde State
Ek het ’n knop in my keel gehad toe ek die artikel oor Lee Cordaway gelees het. Ek kon nie glo dat hy gesterf het nie! Ek en my man wil graag ons groete aan sy geliefde vrou en familie oordra. Dit help my om die onbeduidende probleme waaroor ek my in die lewe bekommer in die regte perspektief te sien. Wat ’n dierbare, getroue Christenman! Sy voorbeeld bemoedig my.
F. H., Verenigde State
Hoewel ek net tien is en geen kwaal het nie, geniet ek sulke bemoedigende artikels. Ek wens Lee Cordaway kon hierdie brief lees, maar ek weet dat hy dit nie sal kan doen voor sy opstanding in die Paradys nie.
E. T., Verenigde State
Pelgrims Ek wou julle graag vertel hoeveel ek julle artikel “Die Pelgrims en hulle stryd om vryheid” (22 November 1996) waardeer het. Ek is nie die hele verhaal aangaande die Pelgrims op skool geleer nie. Maar ek het so baie uit julle artikels geleer!
S. B., Verenigde State
Alternatiewe rock Ek is 18 jaar oud, en die artikel “Jongmense vra . . . Alternatiewe rock—Is dit vir my?” (22 November 1996) is goed geskryf. Ek hou van alternatiewe rock en het gedink die artikel sou my aanstoot gee. Toe ek dit klaar gelees het, was ek net gevul met waardering. Ek lei aan depressie en besef dat my musiekkeuse óf my depressie kan vererger óf my kan help om dit die hoof te bied. Ek het gehou van hoe die artikel voorgestel het: ‘Skaf gerus musiek aan wat jou opgewek laat voel.’ Dankie vir hierdie bemoedigende en praktiese raad.
J. D., Verenigde State
Die inligting was ongelooflik akkuraat en onbevooroordeeld geskryf. Van hierdie musiek is vir my mooi. Dankie vir die waarskuwings sonder om die soort musiek voor die voet te veroordeel.
S. C., Verenigde State
Diereverhale Ek lees graag julle artikels oor diere. Aangesien ek nooit tevore van die eendbekdier gehoor het nie, het die artikel “Die raaiselagtige eendbekdier” (8 Desember 1996) my verstom! In dieselfde nommer het die artikel oor die mooi vriendskap tussen ’n dier en mense, “Hierdie koedoe het onthou”, ook my hart geraak. Hoe mooi is dit tog wanneer mense liefde en respek teenoor diere betoon!
F. A., Brasilië