Swendelary in die naam van godsdiens
AS JY geskok en hartseer is oor die bedrog wat tot dusver genoem is, is jy nie die enigste een nie. Maar daar is bedrog wat selfs laakbaarder is—wat in die naam van godsdiens gepleeg word. Een van die algemeenste vorme hou verband met die opvatting dat die siel ná die dood voortleef en dat die lewendes die dooies kan help. Miljoene opregte mense regoor die wêreld is onder die indruk gebring dat hulle hulle afgestorwe dierbares kan help of kan paai deur groot bedrae geld te betaal.
In sommige lande het hierdie eeue-oue bedrog vandag ’n nuwe kinkel gekry. Byvoorbeeld, in Japan is Boeddhistepriesters en -priesteresse wat beweer dat hulle geestelike kragte het onlangs in hegtenis geneem omdat hulle daarvan verdink word dat hulle gemeentelede met honderdmiljoene jen bedrieg het. Dié wat in hegtenis geneem is, het genesings- en konsultasie dienste geadverteer. Onder diegene wat daarop gereageer het, was vier huisvrouens vir wie daar vertel is dat hulle deur die geeste van hulle oorlede kinders geteister word. “Die vrouens is toe gevra om ’n totaal van 10 miljoen jen [R354 400] vir gedenkdienste te betaal”, het die Mainichi Daily News berig. Een 64-jarige vrou het meer as 6,65 miljoen jen (ongeveer R234 800) gegee. Die vrou het die priester oor haar kind se gesondheid geraadpleeg. “Hulle het na bewering vir die vrou gesê dat sy teëspoed sou optel as sy nie ’n spesiale diens hou om die siele van haar voorvaders te herdenk en die geeste weg te hou nie”, het The Daily Yomiuri gesê.
Juiste kennis van die Bybel sou voorkom het dat hierdie niksvermoedende mense bedrieg word. Dit sê duidelik dat die siel nie onsterflik is nie (Esegiël 18:4). Die dooies “weet glad niks nie”, sê Prediker 9:5. Daarom kan die dooies nie die lewendes leed aandoen nie. En die lewendes kan ook nie die dooies help nie.
Die talle vorme van godsdiensbedrog
Party mense word die slagoffer van godsdiensbedrog as gevolg van hulle eie hebsug. In Australië het ’n man wat sy geld wou laat vermeerder $100 000 (R345 000) oorhandig aan ’n paartjie wat beweer dat hulle bonatuurlike kragte het met die vermoë om geld te seën en dit te laat vermeerder. Hy is aangesê om die geld in ’n kissie te sit en dit vir hulle te gee om “geheilig” te word. Terwyl hy gewag het, het die paartjie die kissie na ’n ander vertrek geneem om dit te seën. Toe hulle uitkom, het hulle vir hom die kissie teruggegee en hom gewaarsku dat hy onder geen omstandighede die kissie voor die jaar 2000 mag oopmaak nie. En as hy dit sou doen? Hulle het vir hom gesê dat “die towerkrag vernietig sou word, en dat hy blind sou word, sy hare sou uitval, hy kanker sou kry en aan ’n beroerte sou sterf”. Ná twee weke het die man egter agterdogtig geraak en die kissie oopgemaak. Verrassing! Dit was vol gesnipperde papier. Hy blameer homself, het die koerant gesê wat oor die voorval berig het, en snaaks genoeg, “hy het begin bles raak”.
In Italië het godsdiensbedrog ’n nuwe wending geneem: Sommige priesters is gekul deur bedrieërs wat hulle as toegewyde Katolieke voordoen. Die bedrieërs maak misbruik van die Katolieke tradisie om te betaal vir dodemisse vir die een of ander afgestorwene. Hoe doen hulle dit? Die Katolieke tydskrif Famiglia Cristiana verduidelik dat die skelms aanbied om vooruit te betaal vir twaalf dodemisse met ’n vals tjek wat uitgemaak is vir ’n veel groter bedrag as wat gevra word. Hulle bedrieg ’n goedgelowige priester om vir hulle die verskil in kontant te gee. Die bedrieërs kry die kontant, en die priester kry ’n tjek wat deur die bank geweier word!
In die Verenigde State word bejaardes dikwels van alle kante oorval deur godsdienskultusse wat nuwe lede soek om hulle geldkoffers met bydraes te vul. “Regoor die land volg kultusse die belangrikste reël van elke bedrogspel: Gaan waar die geld is”, het die tydskrif Modern Maturity geskryf. “In ruil daarvoor bied hulle enigiets aan, van gesondheid tot politieke veranderinge tot die koninkryk van die hemel.” Een kultusdeprogrammeerder is soos volg aangehaal: “Bejaardes is ’n kultus se brood en botter.”
Die bedrae wat hierby betrokke is, kan ontsaglik wees. “Ek weet van ’n paar gevalle waar mense hulleself verarm het”, het een regsgeleerde van New York gesê wat al baie kultussake behartig het. “Dit dek alle denkbare gevalle, van mense wat gevra is om sessyferbydraes te maak tot dié wat niks behalwe hulle werkloosheidsversekeringstjeks het om te gee nie.” Hy het bygevoeg: “Dis verwoestend—vir individue sowel as vir hulle gesinne.”
Pas dus op! Swendelaars is aan die werk. Huisherstelwerkbedrog, telebemarkingswendelary en godsdiensbedrog is net ’n paar voorbeelde van hoe hulle te werk gaan. Dit is onmoontlik om al hulle tegnieke te bespreek, aangesien hulle voortdurend met nuwes vorendag kom. Maar wat hier bespreek is, sal jou ongetwyfeld bewus maak van die belangrikheid om versigtig te wees, en dit is moontlik jou beste verdediging. (Sien die venster op bladsy 8, “Hoe om te voorkom dat jy bedrieg word”.) Die waarskuwing van ’n ou Bybelspreuk is heel gepas: “Die eenvoudige glo elke woord, maar die skrandere let op sy voetstappe.”—Spreuke 14:15.
[Prente op bladsy 10]
Miljoene mense glo dat hulle hulle afgestorwe dierbares kan help of kan paai deur geld te betaal