Van ons lesers

Hartaanvalle Ek is dankbaar om aan ’n organisasie te behoort wat ons nie net geestelik lei nie, maar wat ook oor ons liggaamlike welstand besorg is. Die reeks “Hartaanvalle—Wat kan gedoen word?” (8 Desember 1996) het getoon hoe ons die simptome van ’n hartaanval kan herken. Toe my skoonpa hierdie simptome vertoon het, het ons besef dat sy toestand dalk ernstig is en hom hospitaal toe geneem. Dit was toe ’n hartaanval; maar ná 24 dae in die hospitaal is hy nou buite gevaar.

E. S., Brasilië

My pa het in 1995 aan ’n aortiese aneurisme gesterf, en toe ek hierdie nommer vir die eerste keer sien, het ek nie die moed gehad om dit te lees nie. Ek het dit egter ’n maand later gelees, en die artikels het my vertroos, omdat dit my laat besef het dat ander ook die droefheid ervaar het wat hartkwale vir ’n gesin kan meebring.

S. J., Kanada

Terwyl my man verlede Julie met die predikingswerk van deur tot deur besig was, het hy inmekaargesak en moes ons met hom hospitaal toe jaag. Hy het gelukkig herstel. Julle artikels het op net die regte tyd vir ons gekom. Ons het gehuil toe ons die gedeelte “Gesinne het ondersteuning nodig” sien, want dit is presies hoe ons voel.

M. A., Japan

Verlede Sondag het ek ’n aanhoudende pyn in my linkerarm gehad en geen gevoel in my vingerpunte nie. Ek het gemeen dat dit niks ernstigs was nie. Toe ek julle artikels oor hartaanvalle lees, het dit my getref dat ek daardie simptome het! Ek het na ’n hospitaal se ongevalle-afdeling gegaan, en die dokters het gevind dat een van die slagare in my hart verstop was. Hulle het my die volgende dag geopereer. As julle artikels nie geskryf was nie, sou ek heel moontlik nie hier gewees het om hierdie dankiesêbriefie te skryf nie!

N. S., Verenigde State

Ek het die venster “Simptome van ’n hartaanval” veral waardeer. Dit het my laat besef dat julle baie in ons probleme belangstel en dat julle ons gee wat ons nodig het om dit die hoof te bied.

M. B., Senegal

Vandat my pa ’n hartaanval gehad het, het die lewe in ons huis op dramatiese wyse verander. Gedurende hierdie moeilike tyd was die artikels vir ons werklik baie vertroostend.

P. G., Italië

Die vrou se onderdanigheid Ek het die artikel “Die Bybelse beskouing: Die vrou se onderdanigheid—Wat beteken dit?” (8 Desember 1996) werklik waardeer. My man is ’n ongelowige, en dit is soms baie moeilik om aan hom onderdanig te wees. Ek wil die allerbeste voorbeeld stel sodat ek hom kan wen (1 Petrus 3:1). Ek wil nogtans standvastig wees in my diens aan Jehovah. Julle artikel het my aangemoedig, en dit maak my baie gelukkig om te weet dat my God oor my waak.

M. S., Verenigde State

Ek het die artikel baie insiggewend gevind. Aangesien Satan al hoe groter druk op ons plaas, het ons hierdie soort inligting nodig om in die geloof te bly. Die Bybelse voorbeeld van Abigail het my veral geraak sowel as die punt dat ’n vrou onderskeidingsvermoë aan die dag moet lê en dat ander haar nie skuldig moet laat voel wanneer sy in sekere situasies die inisiatief neem nie.

D. M., Verenigde State

Louis Pasteur Ek is 12 jaar oud en wou julle laat weet dat ek die artikel “Louis Pasteur—Wat sy werk onthul het” (8 Desember 1996) baie waardeer het. Ons is besig om van hom in my wetenskapklas te leer. Ek het hierdie artikel gebruik toe ek ’n verslag saamgestel het en het tien ekstra kredietpunte gekry!

A. P., Verenigde State