Van ons lesers

Finansies Ek is baie dankbaar vir die reeks “Hoe kan jy jou finansies behartig?” (22 Desember 1996). Ek het te veel geld uitgegee en min selfbeheersing gehad. Maar nadat ek die artikels gelees het, het ek my besteding begin beheer. Wanneer ek nou iets sien en dit graag wil hê, vra ek my af of ek dit werklik nodig het.

J. B., Brasilië

My man is al vyf maande sonder werk, en ons het drie kinders om te versorg. Daarom het ek party van die wenke in die artikels begin toepas. Ek het ’n notaboekie gekry, die bladsye in kolomme verdeel en ’n begroting opgemaak. Ons kon op hierdie manier ons geld oor die afgelope drie maande beheer en nog ’n bietjie oorhê vir onvoorsiene gebeure. Dit werk werklik om te begroot!

L. S., Tsjeggiese Republiek

Beproewinge Ek móés net aan julle skryf oor die artikel “Versterk vir beproewinge wat voorgelê het” (22 Desember 1996). Ek is diep getref deur die manier waarop Edward Michalec uiters moeilike situasies deurstaan het. Sy liefde vir Jehovah, sy medemens en die waarheid is duidelik getoon deur sy getroue gedrag en geduldige volharding.

K. B., Verenigde State

Maggy se lyding Dankie dat julle die artikel “Maggy se lyding en my seëning” (22 Desember 1996) gepubliseer het. Ek het gesukkel om my trane te bedwing terwyl ek gelees het van die opofferinge wat hierdie moeder gemaak het gedurende die laaste dae van haar lewe sodat haar dogter gesond gebore kon word. Ek het ook haar man se kommentaar waardeer dat die pyn stadigaan draagliker geword het namate hy oor sy vrou se dood gepraat het—’n onderwerp wat ons geneig is om te vermy wanneer ons met familielede oor die oorledene praat. Ek hoop om Maggy in die opstanding te leer ken.

L. S. C., Spanje

Die artikel toon hoe ons in die gemeente opregte besorgdheid teenoor mekaar kan betoon. Mede-Christene het Maggy se man maande lank van voedsel voorsien en hom ook klere vir sy baba gegee. Wat ’n les is dit tog vir ons om meer te doen as om bloot ’n kaartjie te stuur of ’n telefoonoproep te doen!

P. L., Verenigde State

Ek wil julle van harte bedank vir hierdie artikel. My vrou het drie weke ná Maggy se dood in ’n padongeluk gesterf en my met agt kinders agtergelaat. Ek verstaan die pyn wat Lorne Wilkens gevoel het en seker nog steeds voel. Dankie dat julle sulke ondervindinge vir ons publiseer. Dit is werklik ’n hulp en aansporing vir almal wat sulke beproewinge ondervind.

B. B., Frankryk

Beste vriend verhuis Ek wil graag my opregte waardering uitspreek vir die artikel “Jongmense vra . . . Waarom het my beste vriend weggetrek?” (22 Desember 1996). Dit het op die regte tyd gekom. Een van my vriende gaan binnekort wegtrek; sy en haar man gaan in ’n gemeente dien waar daar ’n behoefte aan meer verkondigers is. Al is ek baie bly vir haar onthalwe, weet ek dat ek haar baie gaan mis. Dankie vir julle uitstekende raad.

R. A., Italië

Julle sal julle nie kan voorstel hoeveel die artikel my geraak het toe ons kringopsiener, oftewel reisende bedienaar, ons gebied verlaat het om ’n ander gebied te bedien nie. Hy het soveel na my geestelike en emosionele behoeftes omgesien. Net soos die foto in die artikel geïllustreer het, was dit ’n pynlike ondervinding om afskeid te neem. Hoe tydig is julle raad tog nie om my te help om die eensaamheid te bowe te kom nie.

J. D., Nigerië