Georgië—’n Eertydse erfenis word bewaar
DEUR ONTWAAK!-MEDEWERKER
HOE sal jy daarvan hou om in ’n land te woon van vrugbare valleie wat knus geleë is tussen 4600 meter hoë, sneeubedekte berge, waar party mense tot 100 jaar en langer lewe? Vir die inwoners van Georgië is dit nie net ’n droom nie. Dit is ’n werklikheid.
Georgië is op die geografiese en kulturele grens tussen Europa en Asië geleë. In die ou tyd was Georgië ’n belangrike skof op die bekende Syroete, dieselfde roete wat Marco Polo na China gevolg het. Georgië is finansieel en kultureel deur hierdie verbinding tussen die Ooste en die Weste bevoordeel, maar soms was dit vir invallers ook die moeite werd om hierlangs te kom. Volgens een skatting is Georgië se hoofstad, Tbilisi, al 29 keer vernietig! Vandag is Tbilisi ’n bedrywige en vrolike stad, wat spog met ’n moltreinstelsel en moderne geboue tussen ou argitektoniese monumente.
Sowat 87 persent van Georgië se grondoppervlak is bergagtig. Bo van die ysige en verlate hoogland af en deur die laagland vloei 25000 riviere, waarvan baie vol forel is. Meer as ’n derde van die land is bebos of met struikgewasse bedek. Die Kaukasusbergreeks aan Georgië se noordelike grens beskerm die binneland teen die ysige weer wat uit die noorde kom. Hierdie situasie lei daartoe dat westelike Georgië deur die vogtige lug van die Swart See af verhit word—een rede waarom Georgië ’n gunstelingbestemming vir vakansiegangers is. Die matige klimaat het ook tot een van die wêreld se oudste en beste wynbereidingstradisies bygedra. Trouens, Georgië produseer meer as 500 verskillende soorte druiwe en wyn!
Georgië se grootste bate is egter sy mense. Hulle was deur die eeue bekend vir hulle dapperheid, intelligensie en gulhartige gasvryheid, asook vir hulle humor en liefde vir die lewe. Hulle kultuur is ryk aan liedere en danse, en volksliedjies word nog dikwels aan tafel gesing in Georgiese huise.
Georgië het ook ’n lang literatuurgeskiedenis, wat uit die vyfde eeu dateer. Georgies was een van die eerste tale waarin die Bybel vertaal is, en die unieke en mooi Georgiese alfabet is daarvoor gebruik. Hierdie hele kultuur vorm ’n lewende skakel met Georgië se verlede—’n eertydse erfenis wat in ’n moderne land bewaar word.
[Foto-erkenning op bladsy 24]
Pat O’Hara/Corbis
[Prente op bladsy 25]
1. Georgiese Bybel
2. Party inwoners lewe tot 100 jaar en langer!
3. ’n Besige straat in Tbilisi
[Erkenning]
Dean Conger/Corbis