Ons beskou die wêreld

Immigrante waag hulle lewe

Elke jaar waag duisende onwettige immigrante hulle lewe op soek na werk en ’n beter lewenstandaard in Suid-Afrika. Daar word gesê dat honderde deur krokodille geëet is terwyl hulle deur die Limpoporivier geswem het. Ander word deur olifante vertrap of deur leeus doodgemaak terwyl hulle deur die Nasionale Krugerwildtuin loop. Parkbeamptes het onlangs vyf leeus geskiet wat mensvreters geword het. “Tydens lykskouings op die vyf leeus”, berig die Johannesburgse koerant The Star, “is menslike oorskot in die diere se spysverteringstelsel gevind.” Die presiese getal onwettige immigrante wat deur wilde diere doodgemaak word, is onbekend. “Gereelde patrollies het mensespore gevind wat op onverklaarbare wyse in die niet verdwyn”, sê die koerant. “’n Volgroeide [leeu]mannetjie kan 70kg vleis in een slag eet. Die kanse dat menslike oorskot as bewys agtergelaat sal word, is baie skraal, veral as hiënas en jakkalse eers by die leeu se vangs aangekom het.”

Benarde situasie van kinders in oorlog

Die Terre des Hommes-organisasies sorg vir behoeftige kinders. Volgens Petra Boxler, voorsitster van die organisasie in Duitsland, “het ongeveer tweemiljoen kinders hulle lewe gedurende die afgelope tien jaar in oorloë, skermutselinge en straatgevegte verloor”. Daarbenewens, berig die Süddeutsche Zeitung, het nog sesmiljoen kinders ernstige liggaamlike beserings opgedoen en het tienmiljoen ernstige emosionele letsels. Petra betreur die feit dat oorloë in onlangse tye vir kinders onheilspellender geword het. In party lande word kinders onder dwang as moordenaars opgelei, en in ander lande word hulle “as lewende mynopspoorders gebruik”.

“Nuwe” diere ontdek

“Net ’n paar dekades gelede was die algemene opvatting dat die meeste van die wêreld se soogdiere—harige, warmbloedige, sogende diere—reeds bekend was. Nie meer nie”, sê U.S.News & World Report. “Van die 1983-uitgawe van Mammal Species of the World tot die 1993-uitgawe daarvan is 459 inskrywings bygevoeg. In die laaste vier jaar het bioloë tientalle ander ontdek—knaagdiere, vlermuise, herte, wildsbokke, oerosse en selfs ape.” Daar word voorspel dat die 4600 soogdierspesies wat nou erken word tot byna 8000 sal toeneem. Party “soogdiere word in museums ‘ontdek’, wanneer wetenskaplikes eksemplare wat jare gelede bymekaargemaak is deegliker ondersoek”. Daarbenewens “is talle nuwe spesies draers van ’n gemeenskap van parasiete en ander piepklein diertjies waarmee die wetenskap ook onbekend is”, sê die artikel, en “1 uit 3 van die soogdiere wat vir die eerste keer beskryf is, is ’n dier wat nog nooit voorheen deur ’n wetenskaplike gesien is nie”. Die meeste nuwe ontdekkings word in tropiese woude en ander afgesonderde dele van die wêreld gedoen. Die soogdierkundige George Schaller sê: “Ek is verbaas om te sien hoe geweldig opgewonde mense oor ’n moontlike bakterie op Mars raak terwyl ons eie planeet krioel van spesies wat nog nie ontdek is nie.”

Godsdiens by die kruispad

“Namate ons die einde van hierdie eeu en van hierdie millennium nader, is daar ’n gevoel dat dit meer as net ’n simboliese drumpel is, dat ’n soort epogmakende verandering plaasvind”, het Konrad Raiser, die algemene sekretaris van die Wêreldraad van Kerke, gesê. “Die probleem is dat ons nie heeltemal weet waarheen hierdie verandering ons lei nie. Ons is derhalwe ietwat beperk in wat ons kan doen om die veranderingsproses daadwerklik te vorm, en reageer eerder net [daarop].” Dr. Raiser het gesê dat die “groot aantal godsdienste” ’n kwessie is wat aandag moet kry. Volgens ENI Bulletin het hy gesê dat die Christendom “steeds meer deel van die probleem is as deel van die oplossing”. Hy het bygevoeg: “Ons het nog geensins maniere ontwikkel waarop ons as naaste met mekaar kan saamleef sonder om die ander een, die een wie se godsdiensoortuiging en -gebruike van ons s’n verskil, as ’n bedreiging in plaas van . . . ’n potensiële bron van verryking te sien nie.”

Het die millennium reeds geëindig?

Volgens geleerdes “het die wisseling van die millennium eintlik etlike jare gelede plaasgevind. Jammer, maar ons het dit almal misgeloop”, sê die tydskrif Newsweek. Die rede? Ons kalender “is op ’n willekeurige verdeling van tyd gebaseer”, wat skynbaar op die geboorte van Christus gegrond is. Maar volgens die artikel glo hedendaagse geleerdes dat Jesus eintlik etlike jare “voor Christus” gebore is. Volgens Newsweek “beteken [dit] dat ons reeds diep in die derde millennium is”. Die fout lê by Dionysius die Kleine vir wie pous Johannes I in 525 G.J. die opdrag gegee het om ’n standaard- liturgiese kalender te ontwikkel. Dionysius het besluit om Jesus se geboorte as die spiljaartal te gebruik, maar het dit verkeerd bereken. “Geskiedkundiges sal nooit sonder twyfel weet presies wanneer Jesus gebore is nie”, sê Newsweek. “Selfs die datum van Kersfees, wat sy geboorte vier, is willekeurig bepaal. Geleerdes meen dat die kerk 25 Des. gekies het om met heidense vierings van die wintersonstilstand saam te val—en as ’n godsdiensteëwig daarteen te dien.” Bybelchronologie toon dat Jesus in die jaar 2 v.G.J. gebore is.

Katte nou ingesluit

Dit is al dekades lank in die staat New York ’n misdaad om ’n ongelukstoneel waarby ’n bees, ’n perd of ’n hond betrokke was te verlaat sonder om die dier se eienaar op te spoor of ten minste die plaaslike polisie in kennis te stel. Katte is nie hierby ingesluit nie. Dié saak is egter nou reggestel deur ’n nuwe wetsontwerp wat met ’n oorweldigende meerderheid aangeneem is. Volgens hierdie wet, wat as die “Plat kat”-wetsontwerp bekend staan, is dit ’n misdaad om die ongelukstoneel waar ’n kat beseer is te verlaat sonder om die besering ten minste aan die polisie te rapporteer. ’n Versuim om dit te rapporteer, kan ’n boete van $100 (R460) vir “tref-en-trap-beseerders” van katte tot gevolg hê. “Vir katliefhebbers verteenwoordig dit die skitterende moontlikheid dat daar ’n einde gemaak sal word aan een blyk van diskriminasie teen ’n spesie”, sê The New York Times.

“Epidemie van vetsug”

“’n Groeiende epidemie van vetsug bedreig die gesondheid van miljoene regoor die wêreld”, berig The Journal of the American Medical Association in ’n aanhaling van ’n waarskuwing wat deur die Wêreldgesondheidsorganisasie gegee is. “Voedings- en gesondheidsdeskundiges uit 25 lande het gesê dat tot 25% van volwassenes in party lande in Wes-Europa en die Amerikas oorgewig is. Die syfer styg tot 40% vir vroue in Oos-Europa en Mediterreense lande en onder swart vroue in die Verenigde State. Melanesië, Mikronesië en Polinesië het die hoogste voorkomssyfer van vetsug—tot 70% in sommige gebiede.” Die deskundiges het gewaarsku dat daar in baie lande ’n oorweldigende aantal mense gaan wees met koronêre hartsiekte, asemhalingsprobleme, beroerte, galblaassiekte, kanker, suikersiekte en spier-skelet-probleme as mense nie diëte begin volg wat minder vet bevat en ’n aktiewer lewe begin lei nie. “Vetsug ‘moet beskou word as een van die openbare gesondheidsprobleme van ons tyd waaraan daar die minste aandag geskenk is, en dit sal heel moontlik ’n uitwerking op gesondheid hê [wat] net so groot soos dié van rook sal wees’, het die deskundiges gesê.”

Misplaaste toegewydheid?

Op 1 Junie 1997 het ’n figuur—wat blykbaar deur vogtigheid veroorsaak is—op ’n muur in een van die stasies in die Mexikostad-metro verskyn. Vir baie toegewyde Katolieke was dit ’n bonatuurlike verskyning van die Maagd van Guadalupe—’n naam wat in Mexiko aan die Maagd Maria gegee is. “Die Katolieke Kerk beskou nie die verskyning van die Maagd van die Metro as ’n ware wonderwerk nie, maar as ’n natuurlike formasie wat deur watersypeling in die stasiemure voortgebring is”, het die koerant El Universal gesê. Baie mense gaan staan nietemin voor die beeld om te aanbid, en dit is al “deur meer as duisend per uur besoek”. ’n Klein nis is vir die beeld gebou en is deur ’n Katolieke priester ingewy.

Verslawing lewer wins op

Volgens die Verenigde Nasies is daar na raming sowat 340 miljoen dwelmverslaafdes regoor die wêreld. Soos daar in die Jornal da Tarde berig word, “staan afhanklikheid van kalmeermiddels boaan die lys, met 227,5 miljoen gebruikers, of byna 4 persent van die wêreld se bevolking. Daarna kom dagga, met 141 miljoen verslaafdes, altesaam 2,5 persent van die wêreldbevolking.” Daar word ook geskat dat net 5 tot 10 persent van alle onwettige dwelms deur die polisie in beslag geneem word. Dwelmverkope lewer elke jaar tot R1,8 biljoen op. In party gevalle maak handelaars ’n wins van tot 300 persent—“wins wat nooit in enige ander soort onderneming verkry word nie”, sê die koerant.