Van ons lesers
Siekte Ek is geraak deur die artikel “Jongmense vra . . . Hoe kan ek met my siekte saamleef?” (22 Junie 1997). Ek bewonder Jason, Ashley en Carmen omdat hulle hulle siekte so goed die hoof bied.
R. D., Frankryk
Die raad wat julle gee, is waarlik prakties, gedagteprikkelend en doeltreffend. Ashley se verhaal het my veral aangemoedig. Ek is ’n voltydse bedienaar van Jehovah se Getuies. Die gedagte dat daar mense is wat baie graag die voltydse bediening wil betree, maar weens hulle gesondheid nie kan nie, het my aangemoedig om te volhard ten spyte van die probleme wat ek ondervind.
D. I., Albanië
Sedert ek uitgevind het dat ek Crohn se siekte het, is ek al meer as tien keer in die hospitaal opgeneem en moes ek twee operasies ondergaan. Maar ek het die afgelope vier jaar in afgesonderde gebied hier in ’n vreemde land gedien. En hoewel ek nog nie volmaakte gesondheid geniet nie, het my gesondheid geweldig verbeter. Die artikels was vir my ’n groot aanmoediging.
G. H., Ecuador
Verdwynende natuurlewe Ek bestudeer dierkunde, en die reeks “Wie sal ons diere red?” het my werklik getref (8 Julie 1997). Ek hoop dat mense wat hierdie artikels lees, besef watter uitwerking hebsug en wreedheid op baie spesies gehad het.
G. H., Verenigde State
As ’n ywerige natuurleweliefhebber het ek dit baie geniet om julle artikels te lees. Dieretuine dra baie daartoe by om bedreigde spesies te help. Maar as dieretuine die natuurlewe se laaste hoop is, dan is die natuurlewe beslis in die moeilikheid. Die oplossing is nie om diere uit hulle natuurlike omgewing weg te neem en hulle in betonoerwoude te teel nie.
M. T., Kanada
Hoewel sulke bewaringspogings prysenswaardig is, glo ons die enigste langtermynoplossing is dat God se Koninkryk die aarde se hulpbronne bestuur (Jesaja 11:9).—RED.
Veiligheid by troeteldiere Ek wil julle bedank vir die artikel “Is kinders veilig by jou hond?” (8 Julie 1997). Ek is al 18 jaar lank ’n professionele hondeafrigter en het nog altyd die belangrikheid van afrigting en persoonlike verantwoordelikheid probeer beklemtoon. Ek was aangenaam verras toe ek hierdie leersame artikel gelees het en was bly om te sien dat die afrigter met wie daar ’n onderhoud gevoer is dieselfde soort afrigting as ons gebruik. Ek hoop dat alle honde-eienaars die raad sal lees en sal toepas.
B. C., Verenigde State
Ek wil graag een puntjie byvoeg: Honde reageer instinktief op kos. ’n Kind wat met ’n worsbroodjie of lekkergoed in die hand by ’n hond verbyloop, kan ’n teiken word. Die hond bedoel nie om kwaai te wees nie, maar hy hap dalk na die kos en byt per ongeluk die kind se hand. Dit sal verstandig van ouers wees om hulle verantwoordelikheid in hierdie opsig na te kom.
K. S., Verenigde State
Ons waardeer hierdie bykomende opmerkings.—RED.
Ongesonde lewenswyses Ek het die artikel “Ongesonde lewenswyses—Hoe hoog is die koste?” (22 Julie 1997) waardeer. As ’n jong Christen kom ek voor baie versoekings te staan. Maar hierdie artikel het my werklik laat sien dat ons siektes en beserings kan vermy deur Bybelbeginsels toe te pas.
R. K., Verenigde State
Pratende tromme Nadat ek die wonderlike artikel “Praat Afrikatromme werklik?” (22 Julie 1997) gelees het, het ek na my oupa, ’n honderdjarige, toe gegaan om die geloofwaardigheid van die verhaal na te gaan. Hy het dit in elke besonderheid bevestig, en ek was beïndruk!
G. M. O., Nigerië