Ons beskou die wêreld
Kommer oor wêreldgesondheid
“Namate ons die 21ste eeu nader, sien ons nog steeds dat 33% van die dodetal regoor die wêreld aan besmetlike siektes toegeskryf kan word”, sê dr. David Heymann van die Wêreldgesondheidsorganisasie. ’n Aantal faktore het tot die probleem bygedra. The Journal of the American Medical Association sê dat die bevolkingsaanwas, mislukte inentingsprogramme, oorbevolking, omgewingsveranderinge en die agteruitgang van die openbare gesondheidstelsel regoor die wêreld alles dinge is wat ’n rol gespeel het. Ander faktore sluit in gedwonge migrasie, vlugtelinge en die toename in wêreldreisigers—wat alles tot die verspreiding van besmetlike siektes bydra. “Daar is werklik geen rede hiervoor nie”, sê dr. Heymann. “Die middele om hierdie siektes te beveg of uit te wis, is beskikbaar.”
Mormone en die politiek
Die Kerk van Jesus Christus van die Heiliges van die Laaste Dae (LDS) het sy lidmate in die Verenigde State aangemoedig om meer by die politiek betrokke te raak, berig die tydskrif Christian Century. Die hoogste raad van die LDS, die Eerste Presidentskap, het onlangs ’n brief uitgereik waarin hulle lidmate aanspoor om “gewillig [te wees] om te dien op skoolrade, stads- en distriksrade en kommissies, wetgewende liggame van die state en ander hoë ampte van verkiesing of aanstelling en om ook betrokke te raak by die politieke party van hulle keuse”. Die brief het gesê dat die kerk nie kandidate of enige spesifieke politieke party ondersteun nie. In die vroeë jare van die kerk, het die tydskrif opgemerk, “het Mormone nie by die hoofstroom- politieke partye betrokke geraak nie en hulle eie teokrasie probeer vestig in wat nou Utah is”.
Stres laat motorongelukke toeneem
Iemand se gesindheid teenoor sy werk het ’n groot invloed op sy gedrag wanneer hy bestuur, sê ’n studie deur die Professionele Vereniging vir Gesondheidsdiens en Volkswelsyn in Duitsland. Diegene wat vanweë hulle werk spanning verduur, loop meer as die normale gevaar om ’n padongeluk te veroorsaak, het die Süddeutsche Zeitung berig. “Opgekropte frustrasie oor die werkgewer of oor kollegas kan tot ’n gebrek aan konsentrasie lei wanneer ’n mens bestuur”, sê die berig. In die studie het 75 persent van die mense wat op pad werk toe of huis toe ’n padongeluk veroorsaak het dit aan ’n “gebrek aan konsentrasie, ’n te gejaagde lewe, druk om betyds te wees of stres” toegeskryf. Hoewel dit glo meestal mans is wat ’n ongeluk sal hê wanneer hulle negatiewe stres ondervind, het die studie ook bevind dat moeders van jong kinders besondere gevaar loop. Die koerant sê: “Hulle was dikwels onder groot druk, aangesien hulle hulle kinders betyds by die kleuterskool moes oplaai of gedurende die etensuur moes kook.”
Kinders se nagmerries is algemeen
Byna alle kinders kry nagmerries. Volgens ’n studie deur die Sentrale Instituut vir Geestesgesondheid in Mannheim, Duitsland, onthou 9 uit 10 kinders dat hulle van so ’n droom wakker geword het. Algemene nagmerries sluit drome in waarin hulle gejaag word, ver val of deur ’n oorlog of natuurramp geraak word. In die meeste gevalle is sulke drome ’n mengsel van elemente van fantasie en die werklikheid. Seuns vergeet gewoonlik wat hulle gedroom het. Daarenteen praat of skryf meisies dikwels oor hulle drome. Om enige angs te verlig wat deur nagmerries veroorsaak is, stel deskundiges voor dat kinders oor hulle drome moet praat, ’n prentjie daarvan moet teken of dit moet opvoer, berig die Berliner Zeitung. As hierdie wenke gevolg word, sal die drome gewoonlik binne ’n paar weke minder dikwels voorkom en hulle nie meer bangmaak nie.
Dokters verslaaf aan dwelms
Volgens mediese gesaghebbendes in Brittanje “is een uit 15 dokters afhanklik van alkohol of dwelms”, berig The Medical Post van Kanada. In ’n poging om die probleem te bekamp, wil die toonaangewende Britse mediese organisasies graag lukraak dwelmtoetse begin doen om dokters te identifiseer wat dwelms of alkohol misbruik. Daar word geskat dat meer as 9000 dokters in Brittanje, wat mans en vrouens insluit, dalk alkohol of ander dwelms misbruik. Verbasend genoeg soek sommige dokters “nie hulp nie omdat hulle nie weet watter dienste daar vir hulle beskikbaar is nie”, sê die tydskrif.
Opwarming van kos vernietig nie gifstowwe nie
Gaar vleis wat meer as twee uur buite die yskas gelaat is, moet nie geëet word nie, sê Tufts University Health & Nutrition Letter. Maar sal enige skadelike bakterieë nie doodgemaak word as dit weer gekook word nie? “Om vleis op te warm wat buite gelaat is, sal dalk die bakterieë doodmaak wat op die oppervlak gegroei het, maar dit sal nie die gifstowwe vernietig wat siekte veroorsaak en deur sekere soorte bakterieë vervaardig word nie”, sê die Nutrition Letter. ’n Gifstof wat deur die gewone stafilokokkusbakterie vervaardig word, kan maagpyn, diarree, naarheid, kouekoors, koors en hoofpyn veroorsaak. “En selfs as kos vuurwarm gemaak word, sal daardie gifstof nie vernietig word nie.”
Karnavalle in Brasilië
“Karnavalle het Rio de Janeiro dalk bekend gemaak, maar al hoe meer Brasiliane stel net nie meer belang nie”, berig Nando.net. Baie mense van regoor die wêreld is onder die indruk dat Brasiliane vir die jaarlikse feesviering lewe. Maar ’n studie deur Brasilië se Instituut vir Maatskaplike Navorsing dui op iets heeltemal anders. Hulle het bevind dat 63 persent van Brasiliane nie aan die feesvieringe deelneem nie, dat 44 persent gesê het hulle “stel nie in die minste daarin belang nie” en dat 19 persent gesê het hulle “haat karnavalle”. Die koerant Jornal do Brasil het berig dat die vernaamste nasionale TV-netwerk nie eens vanjaar die sambaparadekompetisies uitgesaai het nie. Duisende toeriste stroom nietemin na Brasilië om die feesviering te sien. En aangesien Brasilië se vigssyfer van die hoogste in die wêreld is, het die gesondheidsdepartement tydens die karnaval miljoene kondome uitgedeel.
“Gelukkige loteryboom”
Ontstoke dorpenaars naby Bangkok, Thailand, het gedreig om beroepswedders kwaad aan te doen wat die dorp se “gelukkige loteryboom” vermoedelik probeer afbrand het, berig die South China Morning Post. Die “geluksboom” het landwyd daarvoor bekend geword dat dit wenloterye uitwys. Die plaaslike dorpenaars was dus heel ontsteld toe hulle uitvind dat die boom deur ’n brandstigter verskroei is. “Ek is regtig kwaad”, het Dongmalee gesê. “Ek het self geld gewen deur daardie boom en ek het geld gemaak deur aan ander raad te gee oor hoe om dit te lees.” Maar daar word gesê dat die boom se gees ontsteld is sedert die aanval, en dorpenaars beweer dat die gees nie meer raad oor die lotery gee nie. Die berig het gesê dat die dorpenaars beplan om Boeddhistemonnike te oorreed om die boom se gees sover te kry om weer raad oor die lotery te gee.
Meer TV, minder lees
Volgens ’n opname deur die Instituut vir Oudiovisuele Media van Griekeland is daar 3,8 miljoen TV-stelle vir die 3,5 miljoen huishoudings in daardie land; 1 uit 3 huishoudings het ook ’n videokassetopnemer. Die Ateense koerant To Vima het berig dat die gemiddelde daaglikse tyd wat Grieke in 1996 aan TV-kykery bestee het byna vier uur was, in vergelyking met minder as twee en ’n half uur in 1990. Dit is dus nie verbasend dat mense aansienlik minder lees nie. Die opname het getoon dat die gemiddelde Griek 42,2 koerante in 1989 gelees het, maar in 1995 het daardie syfer tot 28,3 gedaal. Die lees van tydskrifte het gedurende dieselfde tydperk eweneens met 10 persent afgeneem.
Ondervoede bejaardes
“Bejaardes eet dikwels nie genoeg nie en is dus vatbaarder vir siekte”, berig die Nassauische Neue Presse, van Frankfurt, Duitsland. Hierdie gevolgtrekking is gemaak nadat ’n opname onder meer as 2500 mans en vroue ouer as 70 in tien Europese lande gedoen is. Baie dink dat bejaardes minder voedsel nodig het, maar te min kilojoules verswak hulle weerstand. Die maaltye van bejaardes is boonop dikwels nie voedsaam nie omdat hulle hoeveelhede kos vooruitkook en dit dan lank hou. Daarbenewens eet baie te min vars vrugte en groente, veral as dit nie volgens die seisoen is nie. Die studie het afgesluit deur te sê dat dokters bejaarde pasiënte daaraan moet herinner om “goed en gereeld te eet”. Daar is ook aanbeveel dat meer oefeningopleiding aan bejaardes gebied moet word, aangesien liggaamlike inspanning die eetlus vergroot.
Die Bybel in 2197 tale beskikbaar
“Dele van die Bybel is verlede jaar in nog 30 tale vertaal, wat die totale aantal tale waarin die Skrif beskikbaar is op 2197 te staan bring”, berig die ENI Bulletin, van Genève, Switserland. Die hele Bybel is nou in 363 tale beskikbaar, waaronder saamgestelde tale soos Esperanto. Die Verenigde Bybelgenootskappe (VBG) kontroleer die tale waarin ten minste een boek van die Bybel gepubliseer is. Fergus Macdonald, sekretaris van die VBG, het gesê dat die doel is om “God se Woord in mense se moedertaal beskikbaar” te stel.