Die Bybel se beskouing
Is drome boodskappe van God af?
NA BEWERING was die uitvinder Elias Howe se idee vir die ontwerp van die naaimasjien op ’n droom gebaseer. Die komponis Mozart het gesê dat baie van die temas vir sy musiek in sy drome ontstaan het. Die chemikus Friedrich August Kekule von Stradonitz het eweneens beweer dat hy die struktuur van die benseenmolekule in ’n droom ontdek het. Sulke voorvalle is geensins uniek nie. Deur die geskiedenis heen het baie kulture al drome aan die bonatuurlike toegeskryf. Hetsy ons droom of wakker is, party mense glo dat albei wêrelde wel ’n werklikheid is.
Die Bybel bevat verskeie verslae waarin drome as ’n belangrike bron van inligting beskryf word—’n vorm van Goddelike kommunikasie (Rigters 7:13, 14; 1 Konings 3:5). God het byvoorbeeld met Abraham, Jakob en Josef in drome gekommunikeer (Genesis 28:10-19; 31:10-13; 37:5-11). Die Babiloniese koning Nebukadnesar het profetiese drome van God af ontvang (Daniël 2:1, 28-45). Is daar dus goeie rede om te glo dat party drome selfs vandag boodskappe van God af is?
Drome van God af
In die Bybel was drome wat deur God geïnspireer is, altyd vir ’n spesifieke doel gegee. Soms kon die dromer weliswaar nie onmiddellik die betekenis van die droom verstaan nie. Maar in baie gevalle het die “Openbaarder van geheime” self die verduideliking voorsien sodat daar geen twyfel sou wees oor die betekenis van die droom nie (Daniël 2:28, 29, NW; Amos 3:7). Drome wat van God af kom, was nie ’n vae onwerklikheid nie, wat dikwels ’n kenmerk van gewone drome is.
God het soms drome gebruik om sleutelfigure in die uitvoering van sy voorneme te beskerm. Diegene wat sulke drome ontvang het, was nie noodwendig knegte van God nie. Die sterrewiggelaars wat die jong kindjie Jesus besoek het, het nie na die moorddadige Herodes teruggegaan soos hy hulle gevra het nie. Waarom nie? Hulle het ’n waarskuwing in ’n droom ontvang (Matteus 2:7-12). Dit het Jesus se pleegvader, Josef, genoeg tyd gegee om met sy gesin na Egipte te vlug, in gehoorsaamheid aan die opdrag wat hy ook in ’n droom ontvang het. Dit het die lewe van die jong Jesus gered.—Matteus 2:13-15.
Eeue tevore het ’n Egiptiese farao gedroom van sewe gesonde graanare en sewe vet koeie in teenstelling met sewe verskroeide graanare en sewe maer koeie. Josef het die drome met God se hulp reg uitgelê: Egipte sou sewe jaar van oorvloed geniet, wat deur sewe jaar van hongersnood gevolg sou word. Omdat die Egiptenare vroegtydig hiervan geweet het, was hulle in staat om voorbereidsels te tref en voedsel te stoor. Dit het daartoe bygedra dat Abraham se nakomelinge bewaar en na Egipte gebring is.—Genesis, hoofstuk 41; 45:5-8.
Koning Nebukadnesar van Babilon het ook ’n droom gehad. Dit het die opkoms en ondergang van toekomstige wêreldmoondhede voorspel wat God se knegte regstreeks sou raak (Daniël 2:31-43). Later het hy nog ’n droom gehad wat voorspel het hoe hy kranksinnig sou raak en daarna weer sou herstel. Hierdie profetiese droom het ’n groter vervulling gehad en het verwys na die oprigting van die Messiaanse Koninkryk, waardeur God sy wil sal verwesenlik.—Daniël 4:10-37.
Wat van vandag?
Ja, God het met sommige mense deur middel van drome gekommunikeer. Maar die Bybel toon dat dit selde gebeur het. Drome was nooit ’n vername vorm van Goddelike kommunikasie nie. Daar was talle getroue knegte van God wat nooit boodskappe van God in drome ontvang het nie. God se gebruik van drome om met mense te kommunikeer, kan vergelyk word met sy verdeling van die Rooi See. Ons weet dat hy dit een keer gedoen het, maar dit is beslis nie hoe hy gewoonlik met sy volk handel nie.—Exodus 14:21.
Die apostel Paulus het in sy dag erken dat God se gees op talle buitengewone maniere op Sy knegte werksaam was. Paulus het gesê: “Aan die een word daar . . . deur middel van die gees woorde van wysheid gegee, aan ’n ander woorde van kennis ooreenkomstig dieselfde gees, aan ’n ander geloof deur dieselfde gees, aan ’n ander gawes van gesondmaking deur daardie een gees, aan nog ’n ander werkinge van kragtige werke, aan ’n ander profesie, aan ’n ander die onderskeiding van geïnspireerde uitinge, aan ’n ander verskillende tale en aan ’n ander die uitlegging van tale” (1 Korintiërs 12:8-10). Hoewel Goddelik geïnspireerde drome nie uitdruklik genoem word nie, het ’n aantal Christene blykbaar Goddelik geïnspireerde drome as ’n gawe van die gees ontvang ter vervulling van Joël 2:28.—Handelinge 16:9, 10.
Die apostel het egter aangaande hierdie spesiale gawes gesê: “Of daar nou gawes van profesie is—hulle sal weggedoen word; of daar nou tale is—hulle sal ophou; of daar nou kennis is—dit sal weggedoen word” (1 Korintiërs 13:8). Onder die gawes waarmee daar ‘weggedoen sou word’, was blykbaar die verskeie vorme van Goddelike kommunikasie. Ná die dood van die apostels het God opgehou om hierdie spesiale gawes aan sy knegte te gee.
Vandag probeer deskundiges nog steeds verstaan wat die droomproses is en of dit van praktiese waarde is. Die Bybel sê niks hieromtrent nie. Maar die Bybel gee ’n waarskuwing vir diegene wat daarop aandring om na Goddelike kommunikasie in hulle drome te soek. In Sagaria 10:2 (NW) sê dit: ‘Die waarsêers bly waardelose drome verkondig.’ God waarsku ons ook daarteen om voortekens te soek (Deuteronomium 18:10-12). In die lig van hierdie waarskuwings verwag Christene nie vandag om Goddelike leiding in hulle drome te ontvang nie. Maar hulle beskou drome eenvoudig as iets wat hulle gedurende hulle slaap ondervind.