Die Bybelse beskouing

Sal ’n kosmiese ramp ons wêreld vernietig?

OP 12 Maart 1998 het koerantopskrifte, TV-skerms en Internetblaaie regoor die wêreld dié onheilspellende nuus versprei: “Asteroïde van [1,5 kilometer] gaan aarde net-net mis.” Wetenskaplikes en leke het oor mekaar geval om vas te stel hoe groot die gevaar werklik is. Sterrekundiges het gou tot die gevolgtrekking gekom dat daar absoluut geen moontlikheid van ’n botsing was nie.

Maar te midde van die bohaai het ’n nuwe bewustheid ontstaan. “Wat moontlik die merkwaardigste oor hierdie vals alarm was, is die feit dat baie mense glad nie verbaas daaroor was nie, al was dit ook hoe skrikwekkend”, het U.S.News & World Report gesê. “Die idee dat ons hier op die aarde op die uitkyk behoort te wees na nog sulke voorwerpe—en dat ons moet beplan wat om daaromtrent te doen—sou ’n dekade of meer gelede ongehoord gewees het, maar nou dink wetenskaplikes en selfs sommige politici dat die bedreiging, hoewel gering, werklik bestaan.”

Sommige sterrekundiges meen dat ongeveer 2000 hemelliggame wat groot genoeg is om ’n wêreldwye ramp te veroorsaak, voortsnel in bane wat die aarde se wentelbaan kruis of naby daaraan kom. Selfs as een wat betreklik klein is die aarde tref, sê navorsers, sal die krag van die ontploffing gelyk wees aan die krag van talle kernwapens wat gelyktydig ontplof. So ’n botsing sal rampspoedige gevolge hê vir ons planeet en sy bewoners, vir mens sowel as dier.

Die een mening wat dikwels in sulke somber voorspellings en berekeninge buite rekening gelaat word, is dié van die Skepper van die heelal, Jehovah God (Psalm 8:4; Spreuke 8:27). In die Bybel het hy sy wil en voorneme met die aarde en die mensdom duidelik bekend gemaak. Sal hy toelaat dat ’n kosmiese ramp ons wêreld vernietig?

’n Heelal onder Goddelike beheer

Aangesien Jehovah die almagtige Skepper van die heelal is, is dit redelik om tot die gevolgtrekking te kom dat hy die kragte waaraan hemelliggame onderworpe is ten volle kan beheer. Die wyse koning Salomo het gesê dat Jehovah “die hemel met onderskeidingsvermoë stewig bevestig” het (Spreuke 3:19, NW). Die profeet Jeremia het gesê dat God “die hemel uitgespan het deur sy verstand”.—Jeremia 51:15.

Jehovah het die wette en kragte in werking gestel wat beheer uitoefen oor die bewegings van die hemelliggame, met inbegrip van sterre, planete, komete en asteroïdes (Jesaja 40:26). Maar dit lyk asof hy die sterre en planete toelaat om deur hulle natuurlike siklusse van figuurlike geboorte, lewe en dood te gaan sonder dat hy gedurig inmeng. Dit sluit sommige geweldige botsings tussen hemelliggame in. ’n Onlangse voorbeeld is die botsing in Julie 1994 toe brokstukke van die komeet Shoemaker-Levy 9 met die planeet Jupiter gebots het.

Daar is geologiese bewyse dat groot rotse uit die buitenste ruimte in prehistoriese tye met die aarde gebots het. Maar sal so ’n gebeurtenis ooit op ons bewoonde planeet plaasvind? Wat sou byvoorbeeld gebeur as ’n asteroïde van 1,5 kilometer met die aarde bots? Sterrekundige Jack Hills voorspel dat die slag miljoene keer soveel energie sal vrystel as dié van die bom wat Hirosjima vernietig het. As dit die oseaan tref, sal die vloedgolwe die kuslyne oorstroom. “Waar daar stede was”, sê Hills, “sal daar net moddervlaktes wees.” Die ergste moontlikheid is die totale uitwissing van die mensdom. Hoe pas hierdie onheilsvoorspelling by ons Skepper se wil vir die aarde in? Die Bybel toon dat hierdie planeet ’n spesiale plek in Jehovah se voorneme het.

Ons aarde—Gemaak met ’n doel

Die psalmis sê oor ons planeet: “Die hemel is hemele vir die HERE, maar die aarde het Hy aan die mensekinders gegee” (Psalm 115:16). Jesaja beskryf Jehovah as die een “wat die aarde geformeer . . . het—Hy het dit bevestig; Hy het dit nie geskape om woes te wees nie, maar dit geformeer om bewoon te word” (Jesaja 45:18). Die aarde is die erfenis wat Jehovah aan die mens gegee het. En aangesien ons Skepper ’n ewige toekoms vir godvresende mense in gedagte het, sal die aarde vir ewig as hulle blywende tuiste bestaan. Psalm 104:5 verseker ons: “[Jehovah] het die aarde gegrond op sy grondveste, sodat dit vir ewig en altyd nie wankel nie.”

God het weliswaar ’n paar groot rampe op ons planeet toegelaat waarin baie mense gesterf het. Sommige van hierdie rampe—soos oorloë, hongersnode en epidemies—is heeltemal of gedeeltelik deur die hebsug, dwaasheid en wreedheid van mense veroorsaak (Prediker 8:9). Ander—soos aardbewings, vulkaniese uitbarstings, oorstromings en storms—is deur natuurverskynsels veroorsaak wat die mens nie ten volle verstaan nie. In teenstelling met God se oorspronklike voorneme is mense nie meer volmaak nie; hulle is sondig. Ons kan gevolglik nie verwag dat God ons nou individueel teen so genoemde natuurrampe moet beskerm nie.

Maar in geen geval het Jehovah toegelaat dat die mens se voortbestaan op die aarde ernstig bedreig word nie. Sedert die skepping van die mens het dit in die bevestigde geskiedenis nog nooit gebeur dat ’n natuurramp die voortbestaan van die hele mensdom bedreig het nie.a

Die voortbestaan van die mensdom gewaarborg

Van die begin van die mens se geskiedenis af was ons Skepper se voorneme dat die mens ‘die aarde moet vul en dit onderwerp’ (Genesis 1:28; 9:1). Hy het belowe dat ‘die regverdiges die aarde sal besit en vir ewig daarop sal woon’ (Psalm 37:9, 11, 22, 29). Aangaande sy beloftes bevestig Jehovah: “My raad sal bestaan, en al wat my behaag, sal Ek doen.”—Jesaja 46:10; 55:11; Psalm 135:6.

Die Bybel sluit nie die moontlikheid van ’n kleinskaalse aardse ramp wat deur kosmiese verskynsels veroorsaak word heeltemal uit nie. Maar ons kan seker wees dat Jehovah nie sal toelaat dat enige kosmiese ramp sy verklaarde voorneme met die aarde en die mens dwarsboom nie. Op grond van beloftes in die Bybel kan ons seker wees dat ons planeet vir ewig bewoonbaar sal bly—ja, dit sal vir ewig die tuiste van die mensdom wees!—Prediker 1:4; 2 Petrus 3:13.

[Voetnoot]