Van ons lesers
Vertroue in die wetenskap? Julle reeks artikels “Tot watter mate kan die wetenskap vertrou word?” (8 Maart 1998) was ’n tydige waarskuwing. Dit het my gehelp om meer realisties te wees oor uitvindsels en wetenskaplike ontdekkings, waarvan talle nadelige newe-effekte vir die mens en sy omgewing kan hê. Die reeks het lesers se aandag terselfdertyd op die Bybel gevestig—iets wat ten volle vertrou kan word.
A. I. B., Brasilië
Die Apaches Ons stel baie in die geskiedenis van die Indiane belang en het al baie boeke oor hulle gelees. Daarom wil ons julle bedank vir die artikel “Wat het geword van die Apaches?” (8 Maart 1998). Dit het hierdie onderwerp op ’n duidelike en oortuigende manier bespreek.
G. C. en R. S., Italië
Die kastestelsel Ek is 12 jaar oud, en net gister het ek huiswerk oor die kastestelsel gekry. Ek is half-Indies. Ek het vandag julle artikel “Christene en die kastestelsel” (8 Maart 1998) ontvang. My skoolboeke het hierdie onderwerp nie so deeglik soos julle verduidelik nie.
S. S. N., Verenigde State
Hoe om stres te hanteer Ek het al artikels in gewilde tydskrifte gelees oor hoe om moegheid, uitbranding en senuwee-uitputting te hanteer. Maar hulle laat my dikwels wonder of ek in staat is om voort te gaan! Ek was bly om te sien dat nie een van julle 15 wenke oor hoe om stres te hanteer, voorgestel het dat ’n mens moet tou opgooi of aftree nie (“Stres—Wat jy kan doen!”, 22 Maart 1998). Dit het eerder getoon hoe om stres te verminder terwyl jy voortgaan met jou lewe.
J. B., Bolivia
Die artikels het net op die regte tyd verskyn, aangesien ek aan angstigheid ly. Ek is ’n voltydse evangeliedienaar, en ek het gedink dat ek nie sulke probleme behoort te hê nie. Terwyl ek hierdie artikels gelees het, het ek trane in my oë gekry. Ek het besef dat Jehovah liefdevol besorg is oor sy knegte en dat hy verstaan wat ons deurgaan.
D. M., Italië
Dit was net wat ek nodig gehad het om te lees, aangesien ek aan psoriase, ’n stresvolle toestand, ly. Ek voel soms dat ek onbelangrik vir Jehovah is, maar julle artikel het my laat besef dat dit nie die geval is nie. Hy gee werklik vir my om—in so ’n mate dat hy my van al die inligting oor stres voorsien het wat ek nodig het.
S. S., Brasilië
Ek wil julle graag uit die diepte van my hart bedank vir die venster “PTSV—’n normale reaksie op ’n abnormale ondervinding”. My kinderdae was traumaties, en hoewel herinneringe aan die verlede nog steeds by my opkom, het die artikel my werklike vertroosting gebied.
R. N., Verenigde State
Ek het die artikels baie insiggewend gevind. Aangesien Satan al hoe meer druk op ons uitoefen, het ons hierdie soort inligting nodig om ons geloof te behou. Dit het my laat besef dat julle opreg in ons probleme belangstel en dat julle ons gee wat ons nodig het om dit te hanteer.
V. T., Fidji