Van ons lesers
Reënwoude Dankie vir die duidelike en bemoedigende inligting wat julle oor reënwoude gepubliseer het (8 Mei 1998). Dit maak ’n mens hartseer as jy sien hoe die mens se waansin en hebsug ons planeet en sy kosbare fauna en flora vernietig. Dit maak my bly as ek dink dat ons Grootse Skepper, Jehovah, binnekort gaan ingryp en hierdie kosbare juweel en sy lewende organismes gaan verdedig.
F. A., Brasilië
Ek is bly om te sê dat julle artikel baie lig gewerp het op al die probleme en kwessies met betrekking tot die hedendaagse vernietiging van ons reënwoude. Ek wil julle veral graag daarvoor bedank dat julle die inligting in die laaste paragraaf voorsien het—die feit dat daar hoop is vir ons oorblywende woude en dat ’n toekomstige geslag van reënwoude ongetwyfeld sal floreer.
J. T., Australië
Ek het so pas die uitstekende nommer van die Ontwaak! gelees wat ek gekry het by ’n vriendelike vreemdeling wat een van Jehovah se Getuies is. Ek is ’n lid van die Ekologievereniging van die Universiteit van Edinburg, aangesien ek in 1939 ’n graad in bosbou aan die Universiteit van Edinburg verwerf het. Ons het baie oor die tropiese reënwoud geleer. Ek wens julle en julle medewerkers geluk met die voortreflike reeks “Kan ons reënwoude gered word?” Ek het elke woord daarvan gelees. Mag julle heilige organisasie floreer! Dit sal floreer.
L. M., Engeland
Die jaar 2000 Die artikel “Die Bybelse beskouing: Hoe betekenisvol is die jaar 2000?” in die Ontwaak! van 8 Mei 1998 was ’n welkome herinnering. Ek waardeer die eerlike manier waarop julle enige neiging om te spekuleer ontmoedig het, asook julle openhartige verduideliking van vorige stellings oor die tydsberekening van Jehovah se dag.
S. W., Verenigde State
Seëvierend in die aangesig van die dood Dit is ’n plesier om vir julle te skryf en julle te bedank dat julle die ondervindinge van ons broers gedurende die Tweede Wêreldoorlog en daarna publiseer, soos dié in die reeks “Seëvierend in die aangesig van die dood” (8 Mei 1993). Daardie reeks het my aangespoor om voort te gaan om Jehovah te dien en in die voetstappe van sy seëvierende Getuies te volg. Selfs doodsgevaar het hulle nie gekeer om Jehovah lief te hê nie.
A. A., Albanië
Lewe en dood in Kambodja Dankie vir die artikel “My lang reis om die lewe en dood in Kambodja te ontvlug” (8 Mei 1998). Dit is wonderlik om Jehovah getrou te dien en te weet dat baie ander, soos Wathana Meas, wat ander doodgemaak het sodat hy aan die lewe kon bly toe hy ’n soldaat was, hierdie selfde weg volg ten spyte van hartseer herinneringe. Ek was geskok om te lees dat hy drie maande lank in ’n put weggekruip het. Min het hy geweet dat hy kort daarna die grootste voorreg van sy lewe sou ervaar—om Jehovah te leer ken!
C. M. S. L., Brasilië
Oordeel jy volgens die uiterlike? Die uiterlike kan bedrieglik wees, soos dit so goed deur die volksverhaal oor Nasreddin Hoja toegelig is (8 Mei 1998). Dankie dat julle ons daaraan herinner het dat ons ander nie bloot volgens hulle uiterlike positief of negatief moet oordeel nie—en dat Jehovah ons volgens ons hartstoestand oordeel, nie volgens ons uiterlike nie.
A. O. F. A., Brasilië
Die liefde faal nooit nie Baie, baie dankie vir die kort, uitstekende artikel “‘Die liefde faal nooit nie’—Wat van jou?” (8 Mei 1998). Die gedagtes wat in verband met die verskillende aspekte van ware liefde ontwikkel is, het my diep ontroer en bemoedig, veral omdat die artikel gekom het net toe ek werklik hulp nodig gehad het. Ek is nou daarvan oortuig dat ware liefde, ongeag die omstandighede, nooit faal nie.
S. G., Frankryk