Plante versus besoedeling

DIT is ’n tydrowende, duur en dikwels moeilike taak om besoedelstowwe uit besmette grond en water te verwyder. Maar doodgewone plante kan hierdie taak blykbaar sonder enige hulp uitvoer.

Wetenskaplikes oorweeg dit om gewone waterplante en kanniedood te gebruik om ou ammunisieterreine skoon te maak en die grond te herwin. In eksperimente het gesteriliseerde waterduisendblaar en kanniedood TNT so goed verwyder dat daar binne ’n week geen spoor van plofstof in die plante se weefsel oorgebly het nie, en toe die plante verbrand is, het dit nie ’n ontploffing veroorsaak nie! Ander navorsers het ontdek dat selle en ekstrakte van die gewone suikerbeet nitrogliserien kan absorbeer en oplos.

Wat van water wat kwaai besoedel is met radioaktiwiteit? Dit lyk of sonneblomme kan help. Ses weke oue sonneblomme is gebruik om besoedelde afvalwater in ’n verlate uraanfabriek in Ohio, VSA, te suiwer. Die resultaat? Die uraanbesoedeling is van ’n gemiddelde 200 mikrogram per liter verminder tot onder die veiligheidsgrens van 20 mikrogram per liter. Ander toetse, by die Tjernobil-reaktor, naby Kiëf, het getoon dat sonneblomme binne tien dae 95 persent van die radioaktiewe stronsium en sesium geabsorbeer het!

Boere sal dalk binnekort die geel iris en papkuil gebruik in hulle pogings om te keer dat waterbronne met plaag- en onkruiddoders besoedel word. Hierdie skoonmaakproses word hoofsaaklik deur mikrobes in die plante se wortelstelsels uitgevoer wat die besoedelstowwe afbreek en die water skoonmaak.

Die voorbeelde hierbo lig die wonderlike vermoë van die aarde toe om homself skoon te maak.