Wagtoring – AANLYN BIBLIOTEEK
Wagtoring
AANLYN BIBLIOTEEK
Afrikaans
  • BYBEL
  • PUBLIKASIES
  • VERGADERINGE
  • g99 5/8 bl. 3-4
  • Jou brein—’n ingewikkelde wonder

Video nie beskikbaar nie.

Jammer, die video kon nie laai nie.

  • Jou brein—’n ingewikkelde wonder
  • Ontwaak!—1999
  • Onderhofies
  • Soortgelyke materiaal
  • ’n Kykie in jou kop
  • Jou brein—Hoe werk dit?
    Ontwaak!—1999
  • Die mens—’n wonder
    Lewe—Hoe het dit hier gekom? Deur evolusie of deur die skepping?
  • Hoe uniek is jy tog!
    Is daar ’n Skepper wat vir jou omgee?
  • ’n Breinnavorser verduidelik waarom hy aan God glo
    Ontwaak!—2017
Sien nog
Ontwaak!—1999
g99 5/8 bl. 3-4

Jou brein—’n ingewikkelde wonder

“Die mensebrein laat ons met die uiters moeilike raaisel: hoe kan ’n weefselmassa wat halfvloeibaar soos ’n rou eier is, verantwoordelik wees vir jou ‘verstand’, jou gedagtes, jou persoonlikheid, jou herinneringe en gevoelens en selfs jou bewustheid?”—Professor Susan A. Greenfield, The Human Mind Explained.

JOU brein reguleer die werking van jou liggaam. Dit help jou om nuwe begrippe te leer, selfs nuwe tale, en dit bewaar en herroep die herinneringe van jou lewe. Tog erken die neurobioloog James Bower: “Ons weet nie werklik watter soort masjien die brein is nie.” Die neurowetenskaplike Richard F. Thompson stem saam: “Daar is nog baie meer om te leer as wat ons nou weet.” Die belangstelling in die ontrafeling van die brein se geheime is so groot dat die Amerikaanse Kongres die negentigerjare die Dekade van die Brein verklaar het.

’n Kykie in jou kop

Die geplooide lobbe van die serebrale korteks, of die brein se buitenste laag, is die opvallendste kenmerk van die brein. (Sien die diagram op bladsy 4 en die venster op bladsy 8.) Hierdie laag pienkgrys stof, wat ’n paar sentimeter dik en vol windings is, bevat ongeveer 75 persent van die brein se 10 miljard tot 100 miljard neurone (senuselle). Maar party wetenskaplikes sê dat selfs hierdie groot hoeveelheid nie verklaar waarom die brein so ingewikkeld is nie.

Baie neurone het ’n lang wortelagtige struktuur wat ’n akson genoem word. Die ander vesels wat van die neuron uitsprei, is baie klein dendriete, wat soos die takke en lote lyk van ’n boom wat uitloop. Dit gee ’n tipiese neuron duisende verbindings met ander neurone. Die neurone raak in werklikheid nooit aan mekaar nie. In die gaping tussen hulle, wat die sinaps genoem word, vloei baie klein hoeveelhede chemiese stowwe, wat verder tot die ingewikkeldheid van die hele struktuur bydra.

“Die aantal moontlike kombinasies van sinapsverbindings” in jou brein is “groter as al die atoomdeeltjies waaruit die bekende heelal bestaan”, skat een deskundige.

Die korteks wat vol neurone is, is miskien die bekendste deel van die brein, maar wat dan van die streke onder die korteks? Jou corpus callosum voorsien byvoorbeeld die noodsaaklike verbinding tussen die linker- en regterbreinhemisfere. Naby hieraan is jou talamus (van die Grieks vir binnekamer), waardeur die meeste inligting beweeg wat jou brein ontvang; die verwante hipotalamus (Grieks vir onder die binnekamer), wat help om jou bloeddruk en liggaamstemperatuur te reguleer en ’n klein verlenging wat die pituïtêre klier genoem word. Hierdie hoofklier beheer jou endokriene stelsel deur chemiese stowwe af te skei wat hormone genoem word en beïnvloed wat deur al die ander kliere van die liggaam afgeskei word. Dan is daar die pons, wat inligting verwerk aangaande die bewegings wat jy maak, asook die medulla, wat jou asemhaling, bloedsomloop, hartklop en spysvertering beheer. Hulle doen al hierdie dinge sonder dat jy eers weet dat hulle daar is!

Hoe werk die brein as dit soveel verskillende dele het? En hoe kan jy jou brein ten beste benut? Die volgende twee artikels gee ’n paar moontlike antwoorde.

[Venster op bladsy 4]

Waarom ons nie ’n groter kop nodig het nie

“As die mensebrein se serebrale korteks glad was en nie vol rimpels nie, sou die brein omtrent dieselfde grootte as ’n basketbal moes wees en nie ongeveer die grootte van twee gebalde vuiste wat langs mekaar gehou word nie.”—Professor Susan A. Greenfield

[Diagram op bladsy 4, 5]

(Sien publikasie vir oorspronklike teksuitleg)

PARTY DELE VAN DIE BREIN

Werklike grootte geïllustreer

Serebrale korteks

Die betreklik dun buitenste laag van elke breinhemisfeer

Serebrum

Die groot geronde deel van die brein. Dit beslaan die grootste deel van die skedel

Visuele korteks

Serebellum

Letterlik “klein brein”. ’n Deel wat agter by die basis van die brein gevind word

Pons

Medulla

DIE SENTRALE KERN

Corpus callosum

’n Bondel senuvesels wat die breinhemisfere verbind

Talamus

Hipotalamus

Beheer sekere onwillekeurige liggaamsfunksies

Pituïtêre klier

[Erkenning]

Gebaseer op The Human Mind Explained, deur professor Susan A. Greenfield, 1996

    Afrikaanse publikasies (1975-2025)
    Meld af
    Meld aan
    • Afrikaans
    • Deel
    • Voorkeure
    • Copyright © 2025 Watch Tower Bible and Tract Society of Pennsylvania
    • Gebruiksvoorwaardes
    • Privaatheidsbeleid
    • Privaatheidsinstellings
    • JW.ORG
    • Meld aan
    Deel