Uiteindelik ’n veilige toekoms!

“Die hele aarde rus, is stil; hulle breek uit in jubel.”—JESAJA 14:7.

“ONS wêreld is ’n wêreld van kernreuse en etiese babas. Ons weet meer van oorlog as wat ons van vrede weet, meer van doodmaak as wat ons van die lewe weet.” Hierdie woorde, wat ’n Amerikaanse weermaggeneraal in 1948 gesê het, laat ons aan die volgende stelling in die Bybel dink: “Die een mens heers oor die ander tot sy ongeluk” (Prediker 8:9). Wanneer die mens met kernwapens gewapen is, kan hy baie erger dinge doen as om ongeluk oor sy medemens te bring; hy kan hom uitwis!

Baie mense stem saam dat die besit en gebruik van kernwapens eties verkeerd is. George Lee Butler, ’n afgetrede Amerikaanse lugmaggeneraal, het byvoorbeeld gesê: “Die blote feit dat iemand ’n kernwapen in sy arsenaal het, dra die gedagte oor dat ons dink dat daar moontlik omstandighede kan wees waaronder ons . . . die gebruik van hierdie wapen op die een of ander manier kan regverdig. Dit is eenvoudig verkeerd.”

Die Britse rubriekskrywer Martin Woollacott sê nietemin: “Kernwapens behou hulle aantrekkingskrag, ongeag wat die teoretici en die sedepredikers oor die nutteloosheid en wreedheid daarvan te sê het. Regerings meen hulle het dit om rasionele veiligheidsredes nodig; hulle hou ook daaraan vas omdat kernwapens ongetwyfeld ’n soort duistere mag het wat politici en soldate raaksien en wil besit.”

Die mens het dit weliswaar oor die afgelope vyf dekades op die een of ander manier reggekry om ’n kernoorlog af te weer. Maar gedurende hierdie selfde tydperk is konvensionele wapens gebruik om derduisende mense af te maai. As die mens se geskiedenis in ag geneem word, is dit net redelik om aan te neem dat hierdie skrikwekkende kernwapens vroeër of later gebruik gaan word.

Onderliggende oorsake

Kan die mens se oorlogsugtige neigings aan bande gelê word? Party voer aan dat die mens oorlog voer weens sy dwaasheid, selfsug en misplaaste aggressiewe impulse. “As dít die vernaamste oorsake van oorlog is”, sê die geleerde Kenneth Waltz, “dan moet die beëindiging van oorloë teweeggebring word deur die opheffing en verligting van die mens.”

Ander sê dat die oorsake van oorlog in die samestelling van die internasionale politieke toneel lê. Omdat elke onafhanklike staat sy eie nasionale belange nastreef, is dit onvermydelik dat konflikte voorkom. Aangesien daar geen konsekwente, betroubare manier is om geskille by te lê nie, breek oorlog uit. William E. Burrows en Robert Windrem skryf in hulle boek Critical Mass: “Die politieke aspek is die moeilike deel. Geen doeltreffende beheerstelsel is moontlik sonder ’n onderliggende politieke voorneme om die proliferasie van superwapens stop te sit en selfs om te keer nie.”

Dink byvoorbeeld aan die voortgesette onderhandelings om die Verdrag oor die Algehele Verbod op Kerntoetse te implementeer. Die Guardian Weekly het die onderhandelings beskryf as “’n intense onderhandelingsessie tussen kernmoondhede en die state wat alreeds in die geheim kernwapens besit of die tegnologie het om dit vinnig te bekom”. Dieselfde artikel erken: “Nie een van die [groepe] het enige planne om hulle wapens of hulle slaankrag, of al die opsies om die een of die ander te verbeter, prys te gee nie.”

Dit spreek vanself dat internasionale samewerking nodig is om alle kernbedreigings uit die weg te ruim. Die boek Critical Mass sê: “Wedersyds versekerde vernietiging moet dus oral deur wedersydse vertroue vervang word, . . . anders sal ’n ontsaglike ramp noodwendig vroeër of later volg.” Ongelukkig kom internasionale verhoudings en onderhandelings vandag dikwels ooreen met wat die profeet Daniël 26 eeue gelede beskryf het: ‘Hulle sit aan dieselfde tafel en belieg mekaar.’—Daniël 11:27, NAV.

Wêreldwye samewerking onder ’n wêreldregering

Die Bybel verseker ons nietemin dat God self van voorneme is om ware wêreldwye samewerking onder ’n hoogs doeltreffende wêreldregering mee te bring. Miljoene bid onwetend vir hierdie regering wanneer hulle die Onse Vader opsê: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). ’n Koninkryk is ’n regering. En die Hoof van daardie Koninkryksregering is die Vredevors, Jesus Christus. God se Woord verseker ons: “Aan die oorvloed van [sy] vorstelike heerskappy en aan vrede sal daar geen einde wees nie . . . Die ywer van Jehovah van die leërs sal dit doen” (Jesaja 9:6, 7, NW). Die Bybel belowe die volgende aangaande daardie regering in die hande van Jesus: “Dit sal al daardie koninkryke [of menseregerings] verbrysel en daar ’n einde aan maak.”—Daniël 2:44.

Hierdie wêreldregering sal ware vrede en veiligheid bring—maar dit sal nie van kernwapens of onbetroubare wapenverdrae afhang nie. Psalm 46:10 voorspel dat Jehovah God die een is wat “die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand”. Halwe maatreëls sal nie goed genoeg wees nie. God se Koninkryk in die hande van Christus sal meer doen as om die aantal kernwapens te verminder—dit sal hulle en alle ander oorlogswapens geheel en al uitwis.

Daar sal geen kernbedreiging wees nie omdat daar geen supermoondhede, geen veglustige lande en geen terroriste sal wees nie. Ware vrede sal seëvier: “Hulle sal sit elkeen onder sy wingerdstok en onder sy vyeboom, sonder dat iemand hulle verskrik; want die mond van die HERE van die leërskare het dit gespreek.” Hierdie geïnspireerde woorde kom van die God wat nie kan lieg nie.—Miga 4:4; Titus 1:2.

Volgens Psalm 4:9 kan ware vrede en veiligheid net in Jehovah God se reëling gevind word: “Ek wil in vrede gaan lê en meteens aan die slaap raak; want U, o HERE, alleen laat my in veiligheid woon.” Soos die droewige feite van die mens se geskiedenis getoon het, kan enige beloftes dat “vrede en veiligheid” deur iets anders as Jehovah se Koninkryk teweeggebring gaan word net vals wees.—Vergelyk 1 Tessalonisense 5:3.

“Rus en veiligheid”

Maar wat van die oorlogsugtige natuur van die mens self? ‘Die inwoners van die wêreld sal geregtigheid leer’ (Jesaja 26:9). Sulke onderrigting in regverdigheid sal ’n diepgaande uitwerking op die menslike natuur en op wêreldtoestande hê: “Die werking van die geregtigheid sal vrede wees, en die voortbrengsel van die geregtigheid rus en veiligheid tot in ewigheid” (Jesaja 32:17). Alle aggressiewe impulse of gewelddadige instinkte sal deur naasteliefde en besorgdheid oor die welsyn van almal vervang word. Die aarde se bewoners “sal van hul swaarde pikke smee en van hul spiese snoeimesse; nie meer sal nasie teen nasie die swaard ophef nie, en hulle sal nie meer leer om oorlog te voer nie”.—Jesaja 2:4.

In profetiese taal het Jesaja voorspel dat mense met dierlike neigings verander sal word. Hy het van ’n tyd gepraat wanneer ‘die aarde vol van die kennis van die HERE sal wees’. Gevolglik sal “die wolf by die lam [wei], en die luiperd gaan lê by die bokkie, en die kalf en die jong leeu en die vetgemaakte vee bymekaar, en ’n klein seuntjie sal hulle aanja. . . . Hulle sal geen kwaad doen of verderf aanrig op my hele heilige berg nie.”—Jesaja 11:6-9.

Geloof in hierdie Goddelike beloftes het Jehovah se Getuies ’n optimistiese uitkyk op die lewe gegee. Wanneer ons aan die toekoms dink, verwag ons nie ’n aarde wat deur kernwapens verwoes is nie. Ons sien eerder die vervulling van die Bybelse belofte: “Die regverdiges sal die aarde besit en vir ewig daarop woon” (Psalm 37:29). Party mense sal hierdie soort geloof naïef en onrealisties noem. Maar wie is werklik naïef? Iemand wat op die belofte van God vertrou of iemand wat die leë beloftes van politici vir soetkoek opeet? Vir ware liefhebbers van vrede is die antwoord voor die hand liggend.a

[Voetnoot]

[Lokteks op bladsy 11]

“Nie meer sal nasie teen nasie die swaard ophef nie, en hulle sal nie meer leer om oorlog te voer nie.”—Jesaja 2:4

[Prente op bladsy 9]

In God se nuwe wêreld sal gesinne “in veiligheid woon”, en alle soorte wapens sal uit die weg geruim wees

[Prent op bladsy 10]

Oorlogsugtige eienskappe verdwyn namate mense van God se Woord, die Bybel, leer en dit toepas