Die kernbedreiging—Vir goed uit die weg geruim!

GOD wil nie hê dat die mensdom in morbiede vrees moet lewe nie. As “die gelukkige God” wil hy hê dat hulle vrede moet geniet en in veiligheid moet lewe— kortom, dat hulle gelukkig moet wees (1 Timotheüs 1:11, NW). In ’n wêreld vol kernbedreigings is dit beslis onmoontlik.

“Vrede en veiligheid”—’n skyn

Dit behoort duidelik te wees dat die kernbedreiging nog glad nie verby is nie. Nogtans lyk dit of die nasies oor die algemeen optimisties is, ten spyte van politieke, ekonomiese en maatskaplike onrus. ’n Volgehoue poging om die gevaar te ontlont, is sedert die VN se Internasionale Vredesjaar in 1986 duidelik te sien.

The Bulletin of the Atomic Scientists het sy oordeelsdaghorlosie—die metode wat hy gebruik om die waarskynlikheid van kernoorlog aan te dui—die afgelope dekade van 3 minute voor middernag tot 17 minute voor middernag teruggestel. In 1989 het Stockholm se Internasionale Vredesnavorsingsinstituut gesê dat “daar meer hoop is om konflikte op ’n vreedsame wyse op te los as in enige ander jaar sedert die einde van die Tweede Wêreldoorlog”.

In onlangse jare is die Verenigde Nasies versterk om probleme in internasionale konflikgebiede aan te pak. Sy sukses, hoewel dit nie volkome was nie, was genoeg om tot ’n algemene gees van optimisme by te dra. In die toekoms sal daar waarskynlik verdere deurbrake wees. Uitroepe van “vrede en veiligheid” sal waarskynlik harder en vuriger word. Hulle sal dalk selfs in geloofwaardigheid toeneem.

Maar pas op! “Wanneer hulle sê: Vrede en veiligheid”, waarsku die Bybel, “dan oorval ’n skielike verderf hulle soos die barensnood ’n swanger vrou, en hulle sal sekerlik nie ontvlug nie.” Uitroepe van “vrede en veiligheid” sal dus ’n teken wees dat God se tyd aangebreek het “om die verderwers van die aarde [wat die aarde verderf deur besoedeling, kernbesoedeling en op ander maniere] te verderf”.—1 Thessalonicense 5:3, 4; Openbaring 11:18.

Let op dat die Bybel nie sê dat die nasies “vrede en veiligheid” sal teweegbring nie. Hulle sal blykbaar op ’n unieke manier daaroor praat en ’n optimisme en ’n oortuiging uitspreek wat tot nog toe nie ervaar is nie. Dit sal lyk of die kanse om vrede en veiligheid teweeg te bring, nader as ooit tevore is. Ondanks ’n voortdurende kernbedreiging sal die nasies ’n valse gevoel van veiligheid hê.

Maar ware Christene sal nie mislei word nie. Hulle sal met lewendige belangstelling verder as menslike vrede en veiligheid kyk na iets beters!

Ware vrede en veiligheid

Volgens Psalm 4:9 kan ware vrede en veiligheid slegs binne Jehovah God se reëling gevind word: “Ek wil in vrede gaan lê en meteens aan die slaap raak; want U, o HERE, alleen laat my in veiligheid woon.” Enige uitroep van “vrede en veiligheid” wat nie in ooreenstemming met Jehovah se Koninkryksreëling gemaak word nie, kan net vals wees. Dit kan niks van blywende waarde teweegbring nie.

Gedeeltelike oplossings is nie goed genoeg vir God se Koninkryk onder Christus nie. God se regering sal meer doen as om net die aantal kernwapens te verminder; dit sal hulle en alle ander oorlogswapens heeltemal vernietig. Psalm 46:10 belowe: ‘Hy laat die oorloë ophou tot by die einde van die aarde, hy verbreek die boog en slaan die spies stukkend, hy verbrand die strydwaens met vuur.’

Kernbedreigings wat deur die foutiewe werking van kernreaktors of deur radioaktiewe afval veroorsaak word, sal eweneens tot die verlede behoort. Anders sal hierdie woorde ’n leuen wees: “Hulle sal sit elkeen onder sy wingerdstok en onder sy vyeboom, sonder dat iemand hulle verskrik; want die mond van die HERE van die leërskare het dit gespreek.” God kan nie lieg nie. Ons het geen rede om sy woorde in twyfel te trek nie.—Miga 4:4; Titus 1:2.

Sou jy graag die vooruitsig wou hê om in ’n wêreld te lewe waarin die kernbedreiging vir goed uit die weg geruim is? Jy kan, want God se Woord sit die vereistes duidelik uiteen. Deur uit te vind wat hulle is en daarvolgens te lewe, kan jy eendag die vreugde hê om met ’n sug van verligting te sê: “Die kernbedreiging—uiteindelik verby!”

[Prent op bladsy 7]

In God se nuwe wêreld sal daar vrede heers sonder enige kernbedreigings

[Erkenning]

M. Thonig/H. Armstrong Roberts

[Foto-erkenning op bladsy 6]

U.S. National Archives photo