Van ons lesers

Godsdiensvryheid Ek lees die Ontwaak! nou al ’n hele paar dekades lank, en ek skryf om te sê hoeveel ek die reeks “Jou godsdiensvryheid—Word dit bedreig?” (8 Januarie 1999) waardeer het. Ek het geweet dat godsdiensonverdraagsaamheid gedurende die sogenaamde Donker Eeue in Europa bestaan het en dat die Katolieke Kerk daarin geslaag het om die owerhede so te manipuleer dat hulle mense verhinder het om hulle vryheid van gewete en godsdiens uit te oefen. Noudat ek uitgevind het wat vandag in Frankryk aan die gang is, vra ek my af: ‘Waarom bring hierdie land ’n klad op sy naam deur nie gewaarborgde godsdiensvryheid toe te staan nie?’ Hou julle miljoene lesers asseblief op hoogte van die uiteindelike verloop van hierdie situasie. Ek glo dat Frankryk verdraagsaamheid sal openbaar en ’n goeie voorbeeld vir ander lande sal stel.

C. C., Puerto Rico

Om sewe seuns groot te maak Dankie vir die ondervinding van Bert en Margaret Dickman wat in die Ontwaak! van 8 Januarie 1999 vertel is. Dit het ons regtig aangemoedig om ons drie kinders so groot te maak dat hulle ’n goeie geestelike erfenis sal hê. Ons kinders het ook die artikel geniet. Ons hoor hoe hulle mekaar herinner aan die les wat Doug geleer het, toe hy nie sy koek gekry het nie! Dankie dat julle so ’n aanmoedigende ondervinding gepubliseer het.

S. J., Indië

Heilige gees Ek wil julle graag bedank vir die uitstekende artikel “Die Bybelse beskouing: Wat is God se heilige gees?” (8 Januarie 1999). Hoewel ek al ’n paar jaar lank een van Jehovah se Getuies is, wil ek altyd meer oor Jehovah God leer. Hierdie artikel het die vraag in die titel baie goed beantwoord en was maklik om te verstaan. Hoe groter my begrip van Jehovah en sy werke word, hoe groter word my liefde vir hom.

J. B., Rusland

Goud Ek het julle artikel “Goud—die geheimsinnige bekoring daarvan” (22 September 1998) gelees. Julle het gesê dat Geallieerde troepe ná die kapitulasie van Duitsland in 1945 ’n groot hoeveelheid goud in die Kaiseroda-soutmyne, in Duitsland, ontdek het. Die Geallieerdes het in werklikheid drie weke voor die einde van die oorlog op die myn beslag gelê.

J. S., Duitsland

Dankie vir hierdie opheldering. Daar is in werklikheid op 4 April 1945 op die Kaiseroda-myne beslag gelê, meer as ’n maand voor die Duitse kapitulasie op 8 Mei 1945.—RED.

Om iemand wat ver woon die hof te maak Die artikel “Jongmense vra . . . Hoe kan ek iemand wat ver woon die hof maak?” (22 Januarie 1999) het te laat vir my gekom. Ek woon in die Verenigde State en het vir ’n jong man in Latyns-Amerika begin skryf. Nog nooit in my lewe het ek met so ’n moeilike situasie te doen gehad nie. ’n Mens kan regtig nie iemand anders deur briewe leer ken nie, selfs al doen jy jou bes om eerlik te wees. Aangesien julle so ver uitmekaar is, is ’n mens geneig om te fantaseer. In ons geval was ons kulture heeltemal uiteenlopend. Toe ons verhouding uiteindelik verby was, het ek gevoel of ek niks meer het om voor te lewe nie. Danksy my liefdevolle gesin wat my ondersteun het, het ek hierdie ondervinding oorleef.

S. H., Verenigde State

Ek skryf vir ’n meisie wat ek by ’n internasionale byeenkoms van Jehovah se Getuies ontmoet het. Dit is moeilik om aan iemand anders te verduidelik wat jy dink wanneer verskille in kultuur en taal betrokke is. Ek het dus haar taal begin leer. Die wenk om ’n bandopnemer te gebruik, was uitstekend. Baie dankie.

A. S., Duitsland

Ek het ’n Oosterse suster by ’n internasionale byeenkoms in die Verenigde State ontmoet. Ek was baie onseker oor wat ek vir haar moet skryf. Ek het daaroor gebid, en net ’n paar dae later het ek hierdie wonderlike artikel ontvang. Ek het dit oor en oor gelees. Dit het al my vrae beantwoord.

G. R., Italië