Van ons lesers
Nie anti-Semities nie Dankie dat julle nie dinge wegsteek waaroor julle spyt is dat julle dit in die verlede gesê het nie. Alhoewel ek graag sou wou hê dat julle om verskoning vra vir hierdie stelling, was julle dít-was-die-konteks-verduideliking heel voldoende. Hou asseblief aan met julle goeie werk, en weet dat julle lesers dit waardeer dat Ontwaak! so ’n weldeurdagte en eerlike tydskrif is.
W. H., Verenigde State
Die leser verwys na stellings in die “Verklaring van feite”, ’n resolusie wat in 1933 by ’n byeenkoms in Berlyn, Duitsland, aangeneem is. (Sien “Jehovah se Getuies—Moedig ten spyte van Nazi-gevaar”, in die “Ontwaak!” van 8 Julie 1998.) Soos die artikel gesê het, was niks wat in die 1933-verklaring gesê is, bedoel om vyandigheid teenoor die Jode uit te druk of goed te praat nie, en ons is jammer as van die stellings vandag daardie indruk skep. As enigeen in die dertigerjare gedink het dat die “Verklaring van feite” beteken het dat Jehovah se Getuies anti-Semities is, sou hierdie wanindruk maklik reggestel kon word deur te kyk na die moedige en medelydende optrede van individuele Getuies ten behoewe van Jode. Publikasies van die Wagtoringgenootskap was boonop onder die eerstes om die behandeling van Jode in Europa aan die kaak te stel en hulle skok daaroor uit te spreek.—RED.
Om sewe seuns groot te maak Ek moes net van hierdie geleentheid gebruik maak om julle te bedank vir die artikel “Die uitdagings en seëninge om sewe seuns groot te maak” (8 Januarie 1999). Ek het gevind dat dit nogal ’n uitdaging is om ’n tiener groot te maak, veral as ’n weduwee. Dit was eers toe ek hierdie artikel lees dat ek besef het ek sal heel waarskynlik deur hierdie stadium in my kinders se lewe kom.
A. R., Verenigde State
Ek kom ook uit ’n gesin van sewe kinders. Tot onlangs nog was ons verenig in ons aanbidding van Jehovah. Maar ongeveer ses maande gelede is een van my jonger susters uit die gemeente gesit. Toe ek aanvanklik die artikel gesien het, wou ek nie die verhaal van ’n suksesvolle gesin lees nie. Ek het gebid dat ek baat kan vind by die artikel sonder om jaloers te wees. Dit het my baie bemoedig om uit te vind dat daar ’n gesin is wat soortgelyke ondervindings as ons het en dat Jehovah oor ons situasie besorg is. Ek wil die Dickmans bedank dat hulle hulle verhaal vertel het. Ek is seker dat my ouers en my jonger broers en susters grootliks bemoedig en vertroos is deur hierdie artikel.
W. J., Japan
Gesigsmerke Ek wil julle hartlik bedank vir die artikel “Gesigsmerke—Nigerië se verdwynende ‘identiteitsbewys’” (8 Januarie 1999). Ek en my man het vriende van Afrika met littekens op hulle gesigte, en ons het gewonder wat dit was. Ons het die antwoord op ons vraag in julle artikel gekry.
M. V., Italië
Leeus Dankie vir die artikel “Leeus—Afrika se majestueuse maanhaarkatte” (22 Januarie 1999). Hierdie artikel was baie belangrik vir my, want ek hou al jare lank van leeus. Ek bewonder hulle baie omdat hulle so mooi en dapper is. Ek sal graag eendag by “die jong leeu” wil wees.—Jesaja 11:6-9.
E. A. S., Brasilië
Plante versus besoedeling Die kort artikeltjie “Plante versus besoedeling” (22 Januarie 1999) was regtig uitstekend. Die inligting het bo alle twyfel bewys dat daar ’n liefdevolle, intelligente Skepper moet wees. Dit het getoon hoe Jehovah die aarde geskep het om homself in stand te hou, selfs wanneer die mens se pogings dreig om die aarde te verderf. Die artikel het ook my hoop versterk om in die Paradys te lewe wat Jesus in Lukas 23:43 belowe het.
R. J., Verenigde State