Van ons lesers

God se bestaan Ek kan nie beskryf hoe nuttig die reeks “Bestaan God werklik?” (8 Februarie 1999) vir my was nie. Dit het aan my die God geopenbaar van wie ek so baie gehoor het, maar nie kon vind nie. Ek wil julle uit die diepte van my hart bedank dat julle die weg van waarheid vir mense soos ek verlig.

C. P., Brasilië

Nuttig al is sy blind Dankie vir die lewensverhaal van Polytimi Venetsianos, “Nuttig en gelukkig al is ek blind”, in die nommer van 8 Februarie 1999. Haar moed en onwankelbare geloof in God het my hart diep geraak. Aan die een kant is die lewe van hierdie uitsonderlike vrou met hartseer en teëspoed gevul. Maar aan die ander kant is dit ryk aan kosbare seëninge. Ek glo dat haar verhaal ’n groot hulp en aanmoediging sal wees vir almal wat moeg geword het in hierdie moeilike wedloop om die lewe.

K. R., Rusland

Klere Ek is 11 jaar oud, en ek kan nie sê hoe dankbaar ek is vir die uitstekende inligting in die artikel “Die soort klere wat ons dra—Maak dit werklik saak?” (8 Februarie 1999) nie. Voorheen wou ek soos my klasmaats aantrek. Maar hierdie artikel het my gehelp om te sien dat my klere netjies moet wees—en nie skokkend of uitspattig nie.

A. S., Estland

Ek voel soms hartseer wanneer ander sê dat my klere outyds of formeel is. Julle artikel was baie aanmoedigend omdat dit bevestig het dat dit die moeite werd is om Bybelbeginsels te volg.

R. L., Brasilië

Ek het jare lank gedink dat Jehovah se Getuies bejammerenswaardig, maar terselfdertyd ook nogal eienaardig is. Toe het ’n vriend vir my die Ontwaak! van 8 Februarie 1999 gegee. Ek het die tydskrif baie geniet, en dit het my siening van die Getuies verander. Ek is veral beïndruk deur die artikel oor klere, wat presies beskryf het hoe ek klere koop. In die toekoms sal ek nie so behep wees met ontwerpersklere nie. En ek sal my vriend vra om vir my nog van julle tydskrifte te kry om te lees!

U. B., Duitsland

Plaagdoders Ek en my vrou was baie beïndruk deur die artikel “Chemiese plaagdoders maak meer as net skadelike insekte dood” (22 Februarie 1999). As bewaringsgesindes het ons die vergiftiging van die aarde probeer beveg. Dit is bemoedigend om te weet dat daar mense in Brasilië, China en ander lande is wat ook hieroor besorg is en wat iets konstruktiefs doen.

W. G., Kanada

Skinderpraatjies Baie dankie vir die artikel “Jongmense vra . . . Wat is so skadelik omtrent skinderpraatjies?” (22 Februarie 1999). Toe iemand ’n ruk gelede die storie begin versprei het dat ek die volgende persoon is wat uit die gemeente gesit gaan word, het ek persoonlik ondervind presies hoe pynlik skinderpraatjies kan wees. Daardie leuen het my diep seergemaak! Die persoon wat daarvoor verantwoordelik was, het om verskoning gevra, maar ek het my vertroue in hom verloor.

R. M., Switserland

Skinderpraatjies is ’n groot probleem by ons skool, en gevolglik het ek die artikel baie aanmoedigend en versterkend gevind. Ek moet tot my skande erken dat ek al geskinder het om ander in ’n slegte lig te stel. En wanneer vriende slegte dinge van ander gesê het, het ek geluister en selfs saamgepraat. Toe ek dus die artikel gelees het, was ek geskok en het ek gevoel dat elke sin raad bevat het vir my oor dinge wat ek doen. Ek is baie skaam oor al die kere wat ek geskinder het. Ek weet die skinderpraatjies by ons skool sal aanhou, maar ek is vasbeslote om sterk genoeg te wees om nie daaraan deel te neem nie.

M. W., Japan