’n Einde aan verderf

DEUR ONTWAAK!-MEDEWERKER IN BRITTANJE

“’n Derde van die sigbare wêreld is in die afgelope 25 jaar deur menslike bedrywighede vernietig.”

SO BERIG die Wêreld-natuurfonds. Hierdie verbysterende statistiek is bekend gemaak by die vrystelling van ’n Indeks van Lewe op die Planeet, ’n nuwe statistiese ontleding van die wêreld se omgewing.

Bewaringsgesindes het berig dat die planeet se woude 10 persent kleiner geword het. Maar hierdie syfer verberg groter verliese in tropiese reënwoude sowel as in droë woudgebiede, om nie eens te praat van die verlies aan plant- en diersoorte wat in die woud lewe nie, wat heel waarskynlik meer as 10 persent is, sê die koerant The Independent van Londen. Die oseane het ook ’n verlies van 30 persent gely, wat blyk uit die vermindering van spesies soos die blouvintuna in die Atlantiese Oseaan en die leerdopskilpad van Asiatiese waters. Die ergste van alles is die vermindering van 50 persent in die Varswaterekosisteemindeks, wat hoofsaaklik toegeskryf word aan toenemende landboukundige en industriële besoedeling sowel as aan baie groter waterverbruik.

“Die bewaring van natuurlike ekosisteme is nie ’n luukse wat net die rykes kan bekostig nie”, sê sir Ghillian Prance, Direkteur van die Koninklike Botaniese Tuine in Kew, Londen, “maar is onontbeerlik om te verseker dat die noodsaaklike ekologiese funksies van ons planeet waarvan ons almal se voortbestaan afhang, in stand gehou word.” Elke bewoner van hierdie planeet is hierby betrokke. Hoe kan ’n wêreldwye oplossing dus gevind word?

Dit is interessant dat die laaste boek van die Bybel, Openbaring, praat van diegene wat die aarde verderf. Dit voorspel ’n tyd wanneer sulke mense self verderf sal word (Openbaring 11:18). Sal daar oorlewendes wees? Ja, want dit sal teweeggebring word deur die ingryping van “Jehovah God, die Almagtige”, wat die enigste oplossing vir hierdie aarde se omgewingsprobleme het, asook die mag om dit uit te voer (Openbaring 11:17). Openbaring 21:3 beskryf ’n tyd wanneer God ‘by die mens sal woon en hulle sy volke sal wees’.

Hoe kan jy ’n lid word van ‘sy volk’ en die vooruitsig hê om te sien hoe die huidige verval van die aarde se omgewing omgekeer word? Jy kan gerus met Jehovah se Getuies in jou omgewing in verbinding tree deur na een van die adresse op bladsy 5 te skryf. Of jy kan met hulle gesels wanneer hulle jou weer tuis besoek. Hulle sal jou met graagte help om meer te leer oor wat jy nóú kan doen om gereed te wees wanneer God binnekort gaan ingryp.