Hoe dwelms ’n greep op die wêreld kry
DEUR ONTWAAK!-MEDEWERKER IN SPANJE
’N PASGEBORE baba skreeu onbeheers in ’n hospitaal in Madrid, Spanje. ’n Verpleegster probeer wanhopig om hom te kalmeer, maar tevergeefs. Die baba ondervind die pynlike onttrekkingsimptome van heroïenverslawing. Nog erger, hy is HIV-positief. Sy ma was aan heroïen verslaaf.
’n Ma van Los Angeles ry onbewustelik met haar motor in ’n straat af wat deur ’n bende dwelmsmouse beheer word. Sy word begroet met ’n koeëlreën, wat haar babadogtertjie se lewe eis.
Duisende kilometers daarvandaan, in Afganistan, bewerk ’n boer ’n papawerland. Dit is ’n goeie jaar; die oes is 25 persent groter as verlede jaar. Opiumpapawers lewer goeie profyt, en die boer se gesin sukkel juis om ’n bestaan te maak. Maar hierdie mooi papawers sal verwerk word tot heroïen, en heroïen vernietig lewens.
’n Skaam tienermeisie in Sydney, Australië, gaan elke Saterdagaand na ’n disko toe. Dit was voorheen moeilik vir haar om met die skare te meng, maar ’n pil wat ecstasy genoem word, het haar onlangs nuwe selfvertroue gegee. Die pille wat sy neem, is uit Nederland in Australië ingesmokkel, hoewel plaaslike laboratoriums dit ook begin vervaardig. Ecstasy laat die musiek beter klink, en sy verloor haar inhibisies. Sy voel selfs aantrekliker.
Sedert Manuel, ’n geharde boer wat met moeite ’n bestaan maak op sy plasie in die Andes, koka begin verbou het, het die lewe ’n bietjie makliker geword. Manuel sal graag wil ophou om die gewas te oes, maar hy is bang dat dit die genadelose mans, wat kokaverbouing in sy gebied beheer, woedend sal maak.
Dit is net ’n paar van die mensegesigte agter die dwelmplaag wat ons planeet teister.a Hetsy hierdie mense verbruikers, vervaardigers of onskuldige bystanders is, dwelms kry ’n al hoe groter greep op hulle.
Hoe groot is die dwelmprobleem?
Die sekretaris-generaal van die VN, Kofi Annan, sê: “Dwelms verwoes ons gemeenskappe, lei tot misdaad, versprei siektes soos vigs en vernietig ons jeug en ons toekoms.” Hy voeg by: “Volgens skatting is daar vandag wêreldwyd 190 miljoen dwelmgebruikers. Geen land is immuun daarteen nie. En alleen kan geen land hoop om die dwelmhandel binne sy grense te stuit nie. Die wêreldwye omvang van die dwelmhandel vereis internasionale optrede.”
Om sake te vererger, het ontwerpersdwelmsb in die laaste jare op die toneel verskyn. Hierdie sintetiese chemiese middels is ontwerp om die gebruiker ‘hoog’ te laat voel of ’n euforiese gevoel te gee. Omdat ontwerpersdwelms byna oral goedkoop vervaardig kan word, kan die polisie dit feitlik nie beheer nie. In 1997 het die Verenigde Nasies se Kommissie vir Verdowingsmiddels gewaarsku dat hierdie sintetiese dwelms in baie lande deel geword het van “hoofstroomverbruikerskultuur” en dat dit beskou moet word as ’n “gedugte bedreiging vir die internasionale gemeenskap in die volgende eeu”.
Die nuwer dwelms is nie swakker as die oorspronklikes nie. Crack-kokaïen is selfs meer verslawend as kokaïen. Nuwe soorte daggac het erger hallusinogeniese uitwerkings, en ’n nuwe ontwerpersdwelm wat ice genoem word, is dalk die dodelikste van almal.
Dwelmgeld en dwelmmag
Hoewel dwelmgebruikers dalk in die minderheid is, is daar genoeg van hulle om die dwelmbase, die persone wat die vervaardiging en verspreiding van dwelms organiseer, geweldige mag te gee. Hierdie gewetenlose mense sit agter ’n bedryf wat die winsgewendste—en feitlik die grootste—op aarde geword het. Dwelmtransaksies maak nou ongeveer 8 persent uit van alle internasionale handel, of naastenby R2 400 000 000 000 elke jaar. Namate die dwelmgeld om die wêreld beweeg, verryk dit bendelede, maak dit polisiemagte korrup, koop dit politici om en finansier dit selfs terrorisme.
Kan enigiets gedoen word om die dwelmprobleem hok te slaan? Tot watter mate beïnvloed die dwelmhandel jou beursie, jou veiligheid en die lewe van jou kinders?
[Voetnote]
a In hierdie artikels verwys ons na dwelms wat vir niemediese redes gebruik word en onwettig versprei word.
b ’n Dwelm met ’n effens gewysigde chemiese struktuur, wat dikwels vervaardig word om beperkings op verbode verdowingsmiddels of hallusinogene te ontduik.
c Die gedroogde blomtoppe van die daggaplant is die bron van marijuana. Die hars van dieselfde plant is hasjisj. Albei produkte word deur dwelmgebruikers gerook.
[Kaart op bladsy 4, 5]
(Sien publikasie vir oorspronklike teksuitleg)
Wêreldwye dwelmvervaardiging en -handel
VERNAAMSTE GEBIEDE VAN VERVAARDIGING:
Dagga—kruie (marijuana) en hars (hasjisj)
Heroïen
Kokaïen
Die pyltjies dui die vernaamste smokkelroetes aan.
[Erkenning]
Bron: Verenigde Nasies se World Drug Report
[Foto-erkenning op bladsy 3]
U.S. Navy photo