Het jy versekering nodig?

IN SOMMIGE lande is sekere soorte versekering verpligtend. In ander is die meeste soorte versekering feitlik onbekend. Die koste van versekering en die soort dekking wat gebied word, verskil ook grootliks van land tot land. Maar die grondbeginsel van versekering—om risiko te deel—bly dieselfde.

Hoe meer eiendom iemand natuurlik besit, hoe meer het hy om te verloor. Hoe meer gesinsverantwoordelikhede iemand eweneens het, hoe groter is die gevolge indien hy sou sterf of liggaamlik gestremd raak. As ’n mens versekering het, kan dit jou minder besorg maak oor die moontlikheid van eiendomsverlies of dat jy ’n ongeluk sal hê wat jou gestremd sal laat.

Maar is dit verstandig om geld aan versekering te bestee hoewel jy dalk nooit ’n eis sal instel nie? Wel, is dit ’n verkwisting van geld om ’n spaarwiel in jou motor te hou, al gebruik jy dit moontlik nooit nie? Die gevoel van veiligheid wat dit die motorbestuurder gee, maak dit dalk die moeite werd om vir ’n ekstra wiel te betaal. Hoewel finansiële vergoeding nie vir sekere verliese kan vergoed nie, kan dit wel vir ander verliese vergoed.

Watter soort verliese word deur versekeringspolisse gedek?

Soorte versekering

Baie van die versekering wat mense uitneem, val in die volgende kategorieë: eiendoms-, aanspreeklikheids-, gesondheids-, ongeskiktheids- en lewensversekering.

Eiendomsversekering: Versekering teen die verlies van eiendom—huis, sakeonderneming, motor of ander besittings—is een van die algemeenste vorme van risikobestuur. Dit is die versekering wat John, wat in die vorige artikel gemeld is, besluit het om nie vir sy timmermanswinkel en -gereedskap uit te neem nie.

Party huisversekeringspolisse sluit dekking van sekere items in die huis in. As dit die soort versekering is wat jy gaan uitneem, is dit verstandig om ’n lys van jou versekerde huishoudelike besittings te maak en, indien moontlik, foto’s of ’n video-opname in te sluit. Hierdie lys tesame met enige waardasies van die items of kwitansies daarvoor moet op ’n veilige plek gehou word, maar nie in die huis nie. As ’n mens hierdie rekords het, kan dit baie makliker wees om ’n eis te skik.

Aanspreeklikheidsversekering: Enigiemand wat ’n motor bestuur, ’n huis of ander vaste eiendom het, ’n sakeonderneming besit of ’n werkgewer is, loop die risiko om vir ’n ongeluk aanspreeklik gehou te word. En daardie ongeluk kan eiendomskade tot gevolg hê of veroorsaak dat iemand beseer word of sy lewe verloor. Die motorbestuurder of die eienaar van die eiendom of ’n sakeonderneming kan verplig word om vir die herstel van eiendom of vir die mediese behandeling of selfs vir die pyn en lyding wat iemand verduur het te betaal. In baie lande word werkgewers en voertuigbestuurders volgens wet verplig om aanspreeklikheidsversekering te hê om hierdie uitgawes te help dek. Selfs waar versekering nie ’n wetlike vereiste is nie, kan ’n voertuigbestuurder, die eienaar van eiendom of ’n werkgewer wetlik of sedelik aanspreeklik gehou word om slagoffers van ’n ongeluk of hulle gesin te help.

Gesondheidsversekering: Baie lande het die een of ander vorm van staatsgesubsidieerde versekering wat voordele soos pensioene vir senior burgers en mediese sorg voorsien. Maar selfs waar dit die geval is, betaal sulke versekering dalk net ’n deel van die mediese uitgawes of dalk net vir sekere mediese uitgawes. Party mense neem gevolglik bykomende privaat versekering uit om hulle te help om die res van die bedrag te betaal. Op baie plekke ontvang werkers gesondheidsversekering as deel van hulle werksooreenkoms.

Ongeskiktheids- en lewensversekering: Ongeskiktheidsversekering voorsien iemand van ’n inkomste as hy beseer word en nie kan werk nie. Lewensversekering voorsien finansiële bystand aan ’n persoon se afhanklikes by sy dood. Sulke versekering het baie gesinne al in staat gestel om uitstaande skulde te vereffen en met hulle daaglikse lewe aan te gaan nadat hulle hoofbroodwinner beseer is of gesterf het.

Hoe om betroubare versekeraars te vind

Omdat versekering op die beginsel gebaseer is dat ’n mens nou geld betaal vir finansiële beskerming in die toekoms, is dit nie verbasend dat die versekeringsbedryf baie swendelaars lok nie. Dit is die geval in ontwikkelde sowel as ontwikkelende ekonomieë. Gevolglik is dit verstandig om op jou hoede te wees vir sogenaamde laekosteversekering en lig te loop vir enige ander twyfelagtige versekeringsplanne. Te veel optimistiese kopers het met leë hande gesit toe sulke maatskappye nie hulle polisse uitbetaal het nie—of net oornag verdwyn het!

Soos met enige ander belangrike aankope, is dit dus verstandig om te vergelyk wat verskillende maatskappye aanbied, en dit bespaar dikwels geld. Party maatskappye bied byvoorbeeld laer tariewe vir gesondheidsversekering aan nierokers en vir motorversekering aan diegene wat bestuurskursusse geslaag het. Maar hoe kan ’n potensiële koper betroubare versekering vind?

Eerstens kan ’n mens uitvind wat ander se ondervinding met verskillende versekeringsmaatskappye en -agente was. Vriende en bure weet dalk wat ’n maatskappy se reputasie is wat diens betref of wat ’n agent se reputasie is wanneer dit by eerlikheid en persoonlike besorgdheid kom. Dit is ook goed om nuusverslae dop te hou om te sien watter versekeringsmaatskappye probleme ondervind.

Daarbenewens kan ’n mens ’n maatskappy se geskiedenis en finansiële posisie nagaan deur ’n prestasieskattingsgids by ’n biblioteek of ’n boekwinkel of op die Internet te raadpleeg. Dit kan die antwoorde verskaf op vrae soos: Geniet die maatskappy finansiële sekuriteit? Is dit al baie jare lank suksesvol in die bedryf? Is dit daarvoor bekend dat dit eise vinnig en vriendelik afhandel?

Prestasieskattingsgidse moet egter nie as onfeilbaar beskou word nie. ’n Langgevestigde, multimiljardrand-versekeringsmaatskappy moes deur die staat oorgeneem word slegs een week nadat ’n bekende gids dit ’n eersteklasmaatskappy genoem het!

Rol van versekeringsagente

’n Versekeringsagent is gewoonlik aan ’n spesifieke versekeringsmaatskappy verbonde. ’n Makelaar, of onafhanklike agent, sal dalk na verskillende maatskappye gaan om die beste beskikbare versekering vir ’n gegewe prys te vind. Albei moet ’n goeie verhouding met hulle kliënte behou sodat hulle nie besigheid verloor nie. Wanneer ’n versekeringsagent betroubaar en besorg is, kan hy ’n groot hulp vir sy kliënte wees.

Eerstens kan ’n goeie agent of makelaar ’n kliënt help om die regte dekking uit die skynbaar eindelose lys versekeringsopsies te kies. Hy sal ook die besonderhede van die polis aan sy kliënt verduidelik. Soos baie mense alte goed weet, is versekeringspolisse baie ingewikkeld. Die president van een versekeringsmaatskappy het erken dat daar dele van sy eie huiseienaarspolis is wat hy nie verstaan nie!

’n Agent se verduideliking kan die kliënt help om onaangename verrassings te vermy. Die meeste eiendoms- en gesondheidsversekeringspolisse het byvoorbeeld ’n bybedragklousule. Dit is ’n vasgestelde bedrag wat die versekerde moet betaal—byvoorbeeld vir motorherstelwerk of mediese rekeninge—voordat die versekeringsmaatskappy sy deel van die eis betaal. Die agent kan ook as tussenganger tussen die versekeringsmaatskappy en sy kliënt optree as die kliënt probleme ondervind om sy eis te skik.

Versekering en Christene

Het ’n Christen wat op God se hulp vertrou en die einde van die stelsel van dinge verwag, versekering nodig? In 1910 het party hierdie vraag gestel aan Charles Taze Russell, redakteur van die tydskrif wat vandag as Die Wagtoring bekend staan en die Ontwaak! se medetydskrif is. Russell het erken dat die Bybel die einde van die huidige ekonomiese stelsel voorspel en bygevoeg dat hy self geen lewensversekering het nie.

“Maar almal se situasie is nie dieselfde nie”, het Russell gesê. “’n Vader met ’n vrou en kinders—as laasgenoemde nog jonk is en nie vir hulleself kan sorg nie—het ’n verantwoordelikheid teenoor hulle” (1 Timoteus 5:8). ’n Man kan geld opsy sit om vir sy gesin voorsiening te maak, het Russell gesê. “Maar as hy dit nie kan doen nie, kan hy dalk deur middel van lewensversekering sy plig teenoor hulle nakom.”

Iemand wat vir ’n gesin moet sorg, kan ook gesondheids-, ongeskiktheids- en ander vorme van versekering vir hulle voorsien. Baie ongetroudes het versekering sodat dit makliker is om noodsaaklike dienste te verkry sowel as om te voorkom dat hulle weens ’n ongeluk of siekte in die skuld raak.

Eerlikheid is ook ter sprake wanneer dit by versekering kom. ’n Ware Christen sal ’n versekeringsmaatskappy beslis nooit bedrieg nie, of dit nou is wanneer hy ’n versekeringsaansoekvorm invul of wanneer hy ’n eis instel (Hebreërs 13:18). Hy sal in gedagte hou dat ’n mens versekering het om vir verliese te vergoed. Dit is nie ’n loterykaartjie nie—’n kans om in weelde te lewe nie.—1 Korintiërs 6:10.

Christene gehoorsaam alle wette in verband met vereistes om versekering te kry. Wanneer die wet sê dat hulle geskikte versekering moet hê om ’n sakeonderneming te bedryf of ’n motor te bestuur, is hulle gehoorsaam daaraan (Romeine 13:5-7). Eerlikheid en praktiese wysheid sal ’n mens ook beweeg om jou premies gereeld te betaal. As hierdie betalings nie gedoen word nie, kan die maatskappy die polis kanselleer en weier om eise te betaal. Dit is verstandig om van tyd tot tyd by die maatskappy self seker te maak dat betalings ontvang is en om skriftelike bewyse van betaling, soos gekanselleerde tjeks, te hou.

Hetsy versekering beskikbaar is waar jy woon of nie, daar is eenvoudige voorsorgmaatreëls wat jou kan help om verliese te vermy en jou en jou geliefdes sodoende pyn kan spaar—pyn wat geen versekeringseis kan wegneem nie. Ons sal nou na sommige van hierdie voorsorgmaatreëls kyk.

[Prent op bladsy 7]

’n Betroubare agent kan jou help om besluite oor versekering te neem

[Prent op bladsy 7]

Baie het versekering, hetsy die wet dit vereis of nie