’n Bedryf met ’n lang geskiedenis
John het die mooiste en bes toegeruste timmermanswinkel in die omgewing gehad. Hy was baie trots daarop. Maar een aand het ’n brand uitgebreek. Binne ’n paar uur was sy pragtige werkswinkel net ’n hoop smeulende as.
JOHN het dit vroeër oorweeg om brandversekering uit te neem met ’n deel van die geld wat hy gebruik het om sy werkswinkel te bou. Maar hy het geredeneer: ‘Ek is baie versigtig. En as daar nooit ’n brand is nie, sal versekering ’n verkwisting van geld wees.’ Maar daar was ’n brand. As John se werkswinkel verseker was, sou hy heel waarskynlik weer ’n werkswinkel kon bou. Sonder versekering kon hy nie.
Wat is versekering?
Versekering is nie noodwendig ’n belegging waarvan ’n mens verwag om jou geld terug te kry nie. Dit is ook nie dobbelary nie. ’n Dobbelaar loop risiko’s, terwyl versekering beskerming bied teen risiko’s wat reeds bestaan. Versekering is ’n manier om risiko’s met ander te deel.
Gemeenskappe het sedert antieke tye ’n deel van hulle middele saamgegooi om individue te help wat verlies ly. Ongeveer 3 500 jaar gelede het Moses die nasie Israel opdrag gegee om ’n deel van hulle opbrengs vir “die vreemdeling en die wees en die weduwee” by te dra.—Deuteronomium 14:28, 29.
Die oorsprong van versekering
Versekering bestaan al duisende jare. ’n Vorm van kredietversekering is ingesluit in die kodeks van Hammoerabi, ’n versameling van Babiloniese wette wat na bewering voor die Wet van Moses bestaan het. Skeepseienaars in antieke tye het lenings by beleggers aangegaan om hulle handelsekspedisies te finansier. As ’n skip vergaan het, was die eienaars nie daarvoor verantwoordelik om die lenings terug te betaal nie. Aangesien baie skepe veilig teruggekeer het, het die rente wat talle skeepseienaars betaal het, die risiko gedek wat die leners geloop het.
Skeepvaart het ook later aanleiding gegee tot die ontstaan van een van die wêreld se bekendste versekeringsmaatskappye, Lloyd’s van Londen. In 1688 het Edward Lloyd ’n koffiehuis besit waar Londense handelaars en bankiers informeel ontmoet het om sake te doen. Hier het finansiers wat versekeringskontrakte aan seemanne aangebied het, hulle name onder die spesifieke risiko geskryf waarvoor hulle, in ruil vir ’n sekere betaling, of premie, verantwoordelikheid sou aanvaar. Hierdie versekeraars het as onderskrywers begin bekend staan. Uiteindelik, in 1769, het Lloyd’s ’n amptelike groep onderskrywers geword wat mettertyd die grootste versekeringsmaatskappy vir seerisiko’s geword het.
Versekering vandag
Wanneer mense vandag versekering uitneem, deel hulle nog steeds hulle risiko. Hedendaagse versekeringsmaatskappye bestudeer statistiek wat toon hoe dikwels verliese in die verlede gely is—byvoorbeeld, verliese weens brande in winkels—in ’n poging om te voorspel watter verliese hulle kliënte in die toekoms sal ly. Die versekeringsmaatskappy gebruik die geld wat deur baie kliënte betaal word om die kliënte wat verliese ly, te vergoed.
Het jy versekering nodig? Indien wel, watter soort versekering pas by jou omstandighede? En watter voorsorgmaatreëls kan jou help om die lewe se risiko’s te hanteer, hetsy jy versekering het of nie?
[Prent op bladsy 3]
Een van die wêreld se bekendste versekeringsmaatskappye het in ’n koffiehuis begin
[Erkenning]
Met vergunning van Lloyd’s van Londen