Versekering wat almal nodig het
HETSY jy woon waar versekering algemeen is of waar dit glad nie bestaan nie, daar is ’n soort versekering wat almal kan en behoort te verkry. Aangesien versekering na ’n middel kan verwys waardeur beskerming of sekuriteit gewaarborg word, kan ’n mens vra: Hoe kan jy sulke versekering verkry?
Jy kan dit verkry deur praktiese stappe te neem om die risiko’s te verminder waaraan jy blootgestel word. Die Bybel sê dat “tyd en lotgeval” almal tref (Prediker 9:11). Maar die moontlikheid dat ’n mens beseer sal word of ’n verlies sal ly, word verklein as jy nie onnodige kanse waag nie.
Dink aan die toekoms
Dit dien as ’n beskerming om praktiese wysheid aan die dag te lê. Gedurende tye van betreklike ekonomiese voorspoed sal ’n mens moontlik iets kan spaar vir wanneer jy dit later nodig het. Die godvresende man Josef van die ou tyd het hom as “’n verstandige en wyse man” onderskei deur voedsel vir die hele Egipte gedurende ’n tyd van oorvloed te versamel. Toe die land later deur ’n hongersnood getref is, het Josef se optrede nie net die Egiptenaars bevoordeel nie, maar ook sy eie familie.—Genesis 41:33-36.
Dit kan ook as ’n beskerming dien as ons matig in ons verbruik is. Ons kan geld spaar en spanning verminder deur nie voortdurend die nuutste toestelle, modes of vermaak na te jaag nie—’n weg wat min of geen bydrae tot ons werklike sekuriteit lewer nie. Trouens, soos reeds gemeld is, hoe meer materiële besittings iemand het, hoe groter is die moontlikheid dat hy verlies sal ly.—Lukas 12:15.
Wees veiligheidsbewus
Ons kan baie van die risiko’s in die lewe verminder deur bloot veiligheidsbewus te wees. Hoeveel tragiese motorongelukke kan vermy word as almal versigtig en teen ’n veilige spoed bestuur? Dink ook aan hoeveel lewens gespaar kan word as niemand bestuur terwyl hy te moeg is of nadat hy gedrink het nie. Daar is ook ander bestuursrisiko’s waaroor ons beheer het.
In verskeie lande verbied die wet byvoorbeeld die gebruik van selfone terwyl ’n mens bestuur. Een studie het getoon dat die gebruik daarvan die risiko van ’n ongeluk viervoudig laat toeneem. Dit verhoog die risiko van ’n ongeluk net soveel as wanneer ’n mens met ’n bloedalkoholvlak van 0,1 persent bestuur, wat ’n mens in baie plekke volgens die wet te dronk maak om te bestuur.
Die gebruik van veiligheidsgordels verminder ook die risiko wat bestuurders en passasiers loop om in ’n ongeluk te sterf. Maar moet nooit dink dat jy kanse kan waag omdat jy veiligheidstoestelle soos veiligheidsgordels en lugkussings of versekering het nie. Navorsing toon dat sulke denke tot meer ongelukke lei.
Om veiligheidsbewus te wees, dien ook as ’n beskerming in die huis en by die werksplek. Is jou woon- en werksplek netjies en vry van gevare? Kyk ’n bietjie rond. Is daar enigiets in ’n gang waaroor mense kan val? Is skerp voorwerpe of warm toestelle—stowe, verwarmers, strykysters—op plekke waar mense gesny of gebrand kan word? Hoop papier of ander vlambare materiaal op? Wees veral bewus van dinge wat vir kinders gevaar kan inhou. Is drank en alle giftige skoonmaakmiddels byvoorbeeld buite die bereik van klein kindertjies?
Sien om na jou gesondheid
As ’n mens tot ’n redelike mate gesondheidsbewus is, kan jy jou risiko om siek te word, verminder. In hierdie verband kan kennis as ’n vorm van versekering dien. Wees bewus van gesondheidsgevare, en tree onmiddellik op wanneer gesondheidsprobleme ontwikkel. Nog belangriker, leer hoe om jouself en jou gesin gesond te hou. Onthou die ou gesegde: “’n Bietjie voorsorg is beter as baie nasorg.”
Die Ontwaak! voorsien al lank inligting wat mense aanspoor om in ooreenstemming met Bybelbeginsels te lewe en sodoende gewoontes en lewenswyses te vermy wat skadelik vir hulle gesondheid is. Van die talle onderwerpe wat byvoorbeeld al in die Ontwaak! bespreek is, is onder meer die belangrikheid van sindelikheid, ’n gesonde dieet, genoeg slaap, gereelde oefening en om spanning en die pas van die lewe onder beheer te hou.
’n Noodsaaklike vorm van versekering
In hierdie onvolmaakte wêreld kan versekering ’n baie praktiese hulpmiddel wees, maar geen versekeringspolis kan ons algehele beskerming bied of ons ten volle vir ons verliese vergoed nie. Maar of versekering nou beskikbaar is of nie, daar is mense wat vol vertroue is dat hulle nie sonder hulp gelaat sal word nie. Waarom? Want wanneer daar ’n ramp is, doen ware volgelinge van Jesus Christus—diegene wat sy Vader, Jehovah God, dien—alles in hulle vermoë om mekaar se laste te verlig.—Psalm 83:18, NW; Jakobus 2:15-17; 1 Johannes 3:16-18.
Daarbenewens belowe Jehovah self dat hy nooit sy getroue knegte sal verlaat nie. ’n Bybelpsalmis het geskryf: “Want my vader en my moeder het my verlaat, maar die HERE sal my aanneem” (Psalm 27:10). Aangesien Jehovah die Bron van die lewe is, kan hy diegene opwek wat gesterf het, en volgens die Bybel het hy sy Seun, Jesus Christus, die mag gegee om die dooies op te wek (Psalm 36:10; Johannes 6:40, 44). Maar God se Woord toon dat nie almal opgewek sal word nie (Johannes 17:12). Hoe kan ons dus seker maak dat God ons in die opstanding sal onthou?
In sy beroemde Bergpredikasie het Jesus in werklikheid van die betroubaarste vorm van versekering gepraat. Hy het gesê: “Hou op om vir julle skatte op die aarde op te gaar, waar mot en roes verteer en waar diewe inbreek en steel. Gaar eerder vir julle skatte in die hemel op, waar nóg mot nóg roes verteer en waar diewe nie inbreek en steel nie. Want waar jou skat is, daar sal jou hart ook wees.”—Matteus 6:19-21.
Mense dink dikwels daaraan om ’n neseier op te bou in die hoop dat dit hulle van ’n gemakliker lewe sal verseker wanneer hulle ouer is. Jesus het egter van ’n belangriker soort versekering gepraat. Dit is van onskatbare waarde en sal nooit faal nie! Hy het verduidelik: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus.”—Johannes 17:3.
As ons juiste kennis van God en sy Seun inneem en dit in ons lewe toepas, sal ons ’n goeie naam by God opbou (Hebreërs 6:10). Die apostel Petrus en Johannes, wat hulle oortuiging op die lering van hulle Meester, Jesus Christus, gebaseer het, het beklemtoon dat die huidige stelsel van menseheerskappy tot ’n einde sal kom. Maar Johannes het verduidelik: “Hy wat die wil van God doen, bly vir ewig.”—1 Johannes 2:17; Matteus 24:3, 14; 2 Petrus 3:7, 13.
As ons God dien en sou sterf, kan ons seker wees dat hy ons sal opwek, of as ons lewe tot die tyd wanneer hy hierdie stelsel van dinge tot ’n einde bring, weet ons dat hy ons tot in sy regverdige nuwe wêreld behoue sal laat bly. Trouens, God belowe om ‘elke traan van ons oë af te vee’ en ‘alles nuut te maak’ (Openbaring 21:4, 5). Om God te dien en op sy beloftes te vertrou, is waarlik die heel beste versekering. En dit is aan almal beskikbaar.
[Prente op bladsy 8, 9]
Om veiligheids- en gesondheidsbewus te wees, is ’n vorm van versekering
[Prent op bladsy 10]
Om van God te leer en sy wil te doen, is die beste versekering vir die toekoms