Van ons lesers

Internetpornografie Die nommer van 8 Junie 2000 wat ek ontvang het, met die reeks “Internetpornografie—Watter skade kan dit doen?” het my werklik diep getref! ’n Maand of wat vroeër het ek my man betrap terwyl hy na pornografie op die rekenaar gekyk het; hy het dit nog daardie selfde dag geïnstalleer. Ek het die deur onverwags oopgemaak en hom na ’n onsedelike prent sien kyk. Ek kan nie vir julle sê wat dit aan ons verhouding gedoen het nie. Hy sê hy is jammer, maar hy het ons huwelik geskend.

L. K., Verenigde State

Ek wil graag my dankbaarheid vir hierdie artikels uitspreek. Ek probeer al byna agt jaar lank die probleem oorkom om na pornografie te kyk. Ek het onlangs gebid en my voorgeneem om los te breek van my verslawing aan pornografie. Daardie selfde dag het ek hierdie artikels ontvang.

L. M., Verenigde State

’n Paar maande gelede het ek per ongeluk ’n pornografiese webwerf oopgemaak. Ek het gereeld ander webwerwe begin besoek wat meer eksplisiet was. As gevolg hiervan het ek teruggetrokke en ongesellig begin raak en my liefde vir geestelike dinge verloor. Dit is baie maklik om aan hierdie prente verslaaf te raak. Maar nou sal ek hard daaraan werk om hierdie verslawing te oorkom.

M. G., Verenigde State

Dasse Ek wil my waardering uitspreek vir die interessante artikel “Dasse—destyds en vandag” (8 Junie 2000). Ek is ’n ma van drie kinders, en ek leer hulle om Jehovah lief te hê. My oudste seun is 13 jaar oud, en nie een van ons het geweet hoe om ’n das te knoop sodat hy toewysings op die Teokratiese Bedieningskool kon behartig nie. My man, wat ’n ongelowige is, het nog nooit een gedra nie. Dankie dat julle vir ons op ’n eenvoudige manier gewys het hoe om ’n das te knoop.

M. B., Verenigde State

Ek is 11 jaar oud, en dit klink dalk vreemd, maar die illustrasies het my uiteindelik geleer hoe om my das te knoop. Nou kan ek al my dasse gebruik!

A. P., Italië

Evolusie ’n Paar struikelblokke tot ’n openhartige debat oor die onderwerp van evolusie het in die artikel “Is evolusie logies?” (8 Junie 2000) verskyn. Julle sê: “Is dit redelik om te dink dat die spinnekop ’n vervaardigingstegniek deur evolusie ontwikkel het wat so ingewikkeld is dat die mens dit nog moet ontrafel?” Waarom nie? Wetenskaplikes het nie al die antwoorde nie.

C. W., Australië

Wanneer die spinnekop sy vervaardig, maak dit van verskeie ongelooflik ingewikkelde meganismes gebruik wat wetenskaplikes nog steeds nie ná dekades van navorsing verstaan nie. Tog sê hulle dogmaties dat dit alles die produk van evolusie is. Ons glo dat hierdie en baie ander voorbeelde die basiese onredelikheid van evolusie toelig en toon dat dit meer met geloof as met die wetenskap ooreenkom om in hierdie teorie te glo.—RED.

Daar is een punt, waaroor ek nog nooit enigiets gelees het nie, wat ek nog altyd gedink het ’n sterk argument is teen die logika van evolusie: Hoe het ons voorouers (wat hulle ook al volgens party was) verdeel en twee verskillende geslagte geword? Om te sê dat dit oor miljoene jare plaasgevind het, is nouliks ’n verduideliking, aangesien ’n vrou nie geleidelik swanger kan raak nie.

H. R., Verenigde State

Ons leser maak ’n geldige punt, een wat ons in die artikel “Is daar enige grondslag vir evolusie?” van 8 Mei 1997 bespreek het. Ons het gesê: “Daar [word] van ons verwag om te glo dat evolusie ook per ongeluk ’n mannetjie en ’n wyfie gelyktydig voortgebring het sodat die nuwe spesie kan voortbestaan. Om dit nog onwaarskynliker te maak, moet ons ook glo dat die mannetjie en die wyfie nie net op dieselfde tyd geëvolueer het nie, maar ook op dieselfde plek! Geen ontmoeting, geen voortplanting!”—RED.