Radioaktiewe neerslag wek kommer
NADAT kernwapens in die 1950’s getoets is, is stronsium 90 (Sr90), ’n neweproduk van kernreaksies, in babatande gevind, berig die Kanadese koerant Globe and Mail. Dit is destyds blameer vir die skielike toename in kanker onder kinders.
Nou, ná dekades, is wetenskaplikes wat aan die Amerikaanse Bestralings- en Openbare Gesondheidsprojek verbonde is, weer eens besorg. Dr. Janet Sherman, ’n internis wat met die projek werk, verduidelik dat “Sr90 in babatande van kinders wat sedert 1990 gebore is dieselfde vlakke bereik as dié gedurende die jare toe kernwapens nog bogronds getoets is”.
Waar kom die Sr90 vandaan? Party wetenskaplikes verwys na kernongelukke in die verlede, na die bestraling afkomstig van behoorlik funksionerende kernaanlegte of na die bomtoetse van baie jare gelede as moontlike bronne.a Waar dit ook al vandaan kom, mense neem Sr90 in deur kos te eet wat van besmette plante kom en melk van koeie te drink wat besmette gras geëet het. Aangesien Sr90 se chemiese samestelling baie dieselfde as kalsium is, berg mense die radioaktiewe materiaal in hulle bene, wat die risiko van beenkanker en leukemie verhoog.
Die Globe spreek ook hulle kommer uit oor toekomstige geslagte se blootstelling aan bestraling. “Wanneer [kernafval] uit die reaktorhart verwyder word”, verduidelik die koerant, “is dit ongeveer ’n miljoen keer meer radioaktief as toe dit gelaai was. ’n Pas verbruikte brandstofbundel is so dodelik dat ’n persoon wat net ’n meter ver weg staan binne ’n uur weens stralingsvergiftiging sal sterf.”
Is dit realisties om op ’n veilige toekoms te hoop, aangesien die gevaar van radioaktiewe neerslag die mensdom bedreig? Toe die aarde en die lewende dinge daarop in die begin geskep is, sê die Bybel vir ons dat alles “baie goed” was (Genesis 1:31). Ons kan op die Bybel se belofte vertrou dat ons planeet binnekort ’n paradys sal wees. Kos en water wat deur bestraling besmet is, sal net ’n vae herinnering wees.—Psalm 65:10-14; Openbaring 21:1-4.
[Voetnoot]
a Ná die ongeluk in 1986 by die kernaanleg in Tjernobil, in die Oekraïne, het Sr90-vlakke in die babatande van Duitse kinders tienvoudig verhoog.
[Foto-erkenning op bladsy 31]
Foto: U. S. Department of Energy photograph