’n Boom wat jou in jou spore sal laat vassteek
DEUR ONTWAAK!-MEDEWERKER IN ECUADOR
TEEN die middel van Desember het die seisoenreën nog nie op die Ecuadoriaanse kusvlakte geval nie. Die stof wat die golwende heuwels bedek, het die plantegroei ’n vaal voorkoms gegee. Bo in die lug het digte, grys wolke dit maar ’n triestige dag gemaak vir ’n groep reisigers wat met ’n hoofweg weswaarts na die Stille Oseaan op pad was. Skielik het almal na ’n boom langs die pad gestaar. Die motor het skielik tot stilstand gekom. Watter boom het hulle gesien?
Dit was ’n trompetboom in volle bloei! Die tydelike stilte is deur ’n uitroep verbreek: “Hoe pragtig! Het julle al ooit sulke helder kleure gesien? Ek het al talle bome met pienk, pers, rooi of oranje blomme gesien, maar die prag van hierdie een oortref hulle almal!”
Nadat hulle sy goue prag bewonder het, het hulle uiteindelik vertrek. Min het hulle besef dat dit maar net die begin was. ’n Entjie verder aan het hulle op nog ’n trompetboom in volle bloei afgekom en toe nog een. Dit het gelyk asof die heuwels met goue sonskyn bedek was! Dit was die jaarlikse seisoen van die trompetboom—die tyd wanneer die somber woud met pragtige kleure oortrek word.
Die prag van hierdie boom is egter nie net tot een land beperk nie. Trouens, hierdie boom is inheems aan baie dele van Suid- en Sentraal-Amerika. Dit staan ook bekend as araguanay, guayacan amarillo en die gouetrompetboom, wat na sy goue trompetvormige blomme verwys. Die wetenskaplike naam is Tabebuia chrysantha.
Die trompetboom vervaardig ook hout met ’n baie fyn grein waarvan goeie gehalte meubels al jare lank gemaak word. Omdat hierdie boom skaars is, is party lande genoodsaak om wette in te stel sodat hierdie bome beskerm kan word. Dit is om te verseker dat die inwoners sowel as die toeriste nog steeds hulle buitengewone prag kan geniet wanneer hulle blom, hoewel dit net ’n paar dae lank en een keer per jaar is.
Die trompetboom is voorwaar ’n lewende huldeblyk aan die grootste kunstenaar van almal—ons Grootse Skepper, die argitek van hierdie wonderlike aarde waarop ons woon.