Lewende mosaïeke in Montreal
DEUR ONTWAAK!-MEDEWERKER IN KANADA
DIE betowerende stad Montreal, Kanada, was van 19 Junie tot 9 Oktober 2000 die gasheer van Plantmosaïek Internasionaal Montreal 2000 (MIM 2000), die eerste internasionale tentoonstelling van blommekunswerke. Kunstenaars uit 14 lande is genooi om honderd blommetentoonstellings te ontwerp en te maak met “Die planeet is ’n mosaïek” as tema.
Tweedimensionele blommosaïeke—waarin plante gebruik word om ’n prentjie te skilder—versier openbare tuine al eeue lank. Maar die afgelope 50 jaar het tuinboukundiges in China, Europa en elders driedimensionele kunswerke gemaak deur metaalraamwerke met ’n goed gekose versameling plante te bedek. Deur albei soorte mosaïeke in een tentoonstelling saam te bring, het die organiseerders van MIM 2000 die term “plantmosaïek”—wat oorspronklik gebruik is om blommebedekkings in Frankryk te beskryf—laat herleef en dit op twee- sowel as driedimensionele blommekunswerke toegepas. Altesaam is ongeveer driemiljoen spesiaal gekose plante vir MIM 2000 gebruik. Die vaardighede van 68 tuinboukundiges en tuiniers was nodig om die lewende plantmosaïeke nat te gooi en te versorg.
Die Chinese mosaïeke was veral interessant omdat hulle ontwerpers ’n mengsel van klei, perdemis en rysstrooi deur die metaalraamwerk van ’n driedimensionele kunswerk gevleg het. Hulle het ook klein plantjies met klein worteltjies gebruik wat baie min grond nodig het.
Elke kunstenaar wat vir MIM 2000 ingeskryf het, het gehoop om die kompetisie te wen. Maar die meeste besoekers was tevrede om eenvoudig die oorspronklike ontwerpe en skouspelagtige prag van elke mosaïek te bewonder. “Dit is werklik kunswerk”, het Lynn Duranceau, direktrise van die internasionale kompetisie, gesê. “Dit is soos ’n klein museum. Ons is nogal trots op die resultaat.”
[Prente op bladsy 24, 25]
Bo: Kunswerk van panda, uit China
Middel: Antieke paleis, uit Thailand, saam met skoenlapper, uit China
Onder: Wilde-eende, uit Quebec, Kanada
[Prente op bladsy 25]
Bo: Blommekunswerk van skildery deur Vincent van Gogh, uit Kanada; pou, uit Frankryk