Terrorisme neem ’n nuwe vorm aan
Die laaste keer toe die hoofartikels van hierdie tydskrif oor terrorisme gehandel het, is ’n bekende voorstelling op die voorblad gebruik—gemaskerde aanvallers met rewolwers en ’n groot ontploffing op die agtergrond. Maar vandag is die prentjie anders.
IN DIE skemerlig beweeg ’n konvooi ongemerkte vragmotors stilletjies deur die woonbuurt. Die vragmotors hou naby ’n skoolgebou stil. Kort voor lank kom ’n spesiaal opgeleide span met gasmaskers en beskermende oorpakke tussen die struike te voorskyn. Al wat hulle weet, is dat ’n klein ploftoestel tydens ’n sportbyeenkoms in die paviljoen ontplof het wat gasdampe afgegee en baie toeskouers siek gemaak het. In samewerking met plaaslike nooddienspersoneel gaan vier mans versigtig in die besmette gebied in om uit te vind wat gebeur het. Wat het die toestel afgegee? Bakterieë wat miltsiekte veroorsaak? Senuweegas?
Die mans loop stadig na die paviljoen en neem verskillende toestelle saam met hulle om chemiese ontledings mee te doen. Hulle kom by ’n klein kamer waar hulle die oorblyfsels van die ploftoestel vind. Dit is delikate werk, en hulle moet klein opsporingsinstrumente gebruik en swaar voorwerpe skuif.
Hulle maskers wasem gou op. Dit is harde werk, selfs vir opgeleide personeel. Maar in minder as tien minute word die residu geïdentifiseer. “Dit is definitief miltsiekte”, bevestig die skeikundige wat saam met hulle is.
Nuwe vorme van terreur
Hierdie voorval was nie so gevaarlik soos dit klink nie. Dit was ’n oefening om die span se reaksie op ’n nagebootste gasaanval iewers in die noorde van New York te toets. Die groep is een van die burgerlike ondersteuningspanne wat onlangs gestig is om op te tree wanneer wapens vir massavernietiging gebruik word. Sulke spanne word uitgestuur om die omvang en erns van ’n nuwe klas terroristeaanvalle vas te stel deur die kieme, chemikalieë of radioaktiewe materiaal te ontleed wat hulle dink gebruik is.
Dit is een van baie spanne regoor die wêreld wat gevorm is weens die nuwe gevare en uitdagings wat terrorisme inhou.a Voorvalle in onlangse jare dui daarop dat onafhanklike groepe en individuele ekstremiste vir al hoe meer terreurdade verantwoordelik is. Hoewel baie terroriste nog steeds militêre aanlegte en diplomatieke missies aanval, val party ook nou sogenaamde sagte teikens aan, soos openbare vervoerstelsels, sportbyeenkomste, besige stadsgebiede, hotelle en toeristebesienswaardighede.
Porter Goss, die voorsitter van die Amerikaanse Huis van Verteenwoordigers se Intelligensiekomitee, het bevestig dat daar ’n verandering in die gedrag van terroriste is en gesê: “Ons moet leer om ons ou denke oor staatsgesteunde terrorisme aan te pas by die nuwe vorm van terrorisme. Ons het al hoe meer te doen met terrorisme wat gemotiveer word deur mense wat vir ’n saak veg.”
Die nuwe soort terrorisme sluit dade en strategieë in wat dalk moeiliker is om te voorkom of te beveg. Dit is al hoe makliker vir terroriste om nuwe tegnologie in te span en onafhanklike finansiering te kry. USA Today berig: “Nuwe rekenaar- en kommunikasietegnologie asook bande met georganiseerde misdaad maak terrorisme selfs moeiliker om te beveg.” Die nuwe geslag terroriste het ook nuwe teikens, wat verslaggewers en nuusontleders dwing om woorde soos “kuberterrorisme”, “bioterrorisme” en “ekoterrorisme” te skep.
Hoe gevaarlik is hierdie nuwe soort terrorisme? Word jou persoonlike veiligheid bedreig? Is daar ’n oplossing vir die plaag van internasionale terrorisme? Die volgende artikels sal lig op hierdie vrae werp.
[Voetnoot]
a Daar is uiteenlopende beskouings oor wat terrorisme is. Byvoorbeeld, in lande wat deur ’n burgeroorlog geteister word, kan geweldpleging deur een groep teen ’n ander as geoorloofde oorlogsdade of as terrorisme beskou word, afhangende van watter kant gevra word. In hierdie reeks artikels verwys die woord “terrorisme” oor die algemeen na die gebruik van geweld as ’n dwangmiddel.
[Venster/Kaart op bladsy 4, 5]
(Sien publikasie vir oorspronklike teksuitleg)
’n Dekade van TERRORISME
1. Buenos Aires, Argentinië
17 Maart 1992
’n Motorbom verwoes die Israeliese ambassade: 29 dood, 242 beseer
2. Algiers, Algerië
26 Augustus 1992
’n Bom ontplof in die internasionale lughawe: 12 dood, minstens 128 beseer
3. New York-stad, Verenigde State
26 Februarie 1993
Godsdiensekstremiste is verantwoordelik vir ’n reusebomontploffing onder die World Trade Center: 6 dood, ongeveer 1 000 beseer
4. Matsoemoto, Japan
27 Junie 1994
Lede van die Aoem Sjinrikio-groep spuit sariengas in ’n woonbuurt: 7 dood, 270 beseer
5. Tokio, Japan
20 Maart 1995
Aoem Sjinrikio-lede klim in moltreine in Tokio met ses pakkies, wat dodelike sariengas vrystel: 12 dood, meer as 5 000 beseer
6. Oklahoma City, Verenigde State
19 April 1995
’n Vragmotorbom ontplof by ’n federale gebou. Regse ekstremiste word verantwoordelik gehou: 168 dood, meer as 500 beseer
7. Colombo, Sri Lanka
31 Januarie 1996
Etniese terroriste ry met ’n vragmotor vol plofstof in ’n bankgebou in: 90 dood, meer as 1 400 beseer
8. Londen, Engeland
9 Februarie 1996
Ierse terroriste laat ’n bom in ’n parkeergarage ontplof: 2 dood, meer as 100 beseer
9. Jerusalem, Israel
25 Februarie 1996
’n Selfmoordbomplanter blaas ’n bus op. Godsdiensekstremiste word verdink: 26 dood, ongeveer 80 ander beseer
10. Dhahran, Saoedi-Arabië
25 Junie 1996
’n Brandstofwa waarop daar ’n bom was, ontplof by ’n Amerikaanse militêre behuisingskompleks: 19 dood, 515 beseer
11. Phnom Penh, Kambodja
30 Maart 1997
Aanvallers gooi vier granate tussen ’n betogende skare: Tot 16 dood, meer as 100 beseer
12. Coimbatore, Indië
14 Februarie 1998
’n Reeks bomaanvalle deur ’n militante godsdiensgroep: 43 dood, 200 beseer
13. Nairobi, Kenia, en Dar es Salaam, Tanzanië
7 Augustus 1998
Bomontploffings by die Amerikaanse ambassades: 250 dood, meer as 5 500 beseer
14. Colombia
18 Oktober en 3 November 1998
Een aanval met bomme en ’n ander een met missiele. ’n Oliepyplyn is die teiken van die eerste aanval: 209 dood, meer as 130 beseer
15. Moskou, Rusland
9 en 13 September 1999
Twee reuseontploffings vernietig twee woonstelblokke: 212 dood, meer as 300 beseer
[Erkennings]
Bron: The Interdisciplinary Center, Herzliya, Israel
Mountain High Maps® Copyright © 1997 Digital Wisdom, Inc.
Victor Grubicy/Sipa Press
[Venster/Prent op bladsy 6]
Kuberaanvalle
Maart 1999: Verslae toon dat indringers die Pentagon se rekenaars op ’n “gekoördineerde, georganiseerde” wyse aanval. Elke dag word tussen 60 en 80 aanvalle van rekenaarinbrekers (hackers) op die rekenaarstelsels van die Amerikaanse Departement van Verdediging aangeteken.
Middel-1999: Oor ’n tydperk van drie maande het rekenaarinbrekers wat die regering vyandiggesind is, onwettig toegang verkry tot webblaaie van die Amerikaanse Senaat, Federale Speurdiens, Weermag, die Wit Huis en verskeie staatsdepartemente in die Verenigde State.
Januarie 2000: Daar word berig dat ondernemings gedurende die vorige jaar wêreldwyd R93 miljard bestee het aan die stryd teen “ekonomiese terrorisme” in die vorm van skadelike rekenaarvirusse.
Augustus 2000: ’n Rekenaarinbreker breek in by webwerwe van regeringsagentskappe en plaaslike owerhede in die Verenigde Koninkryk.